LAYINKI MOOTOOLLA 7 - Qullaawa Maxaafa

¹ Elsaino, «Kaaliiqi yiinota macciishshi! Ga'a tenne yannara, Samaariyaho 3 kiilo fila qamade woy 6 kiilo hayixe 1 kinchu birrinni hidhinanni» yii.

² Hakko mereero mootete gamba yiino amaalaanchi Elsaira, «Kaaliiqi gordu waalcho fane gide xeenimma dirrisiro nafa kuni ikkara didandaanno!» yii. Elsaino, «Kuni coyi ikkanna illekkinni la"atto. Ati kayinni mittoreno suumekkinni dikisatto» yiisi.

SOORIYU OLANTO XOOQQU

³ Hatte yannara taraawannoha gogu dhibba afidhinori 4 manchi katamu waalchira gobbaanni no. Insano mimmitoho, «Reyinammo geeshsha kawiicho mayira ofollineemmo?

⁴ Katama ea kaa'litannonkeri dino. Hakkiira e'nummoro hude shitannonke; kawiicho keeshshinummorono reyanke digattinote. Kunnira amme ka'e Sooriyootu qacha ha'nona; marartunkero hee'neemmo; shitunkerono reyantella» yitu.

⁵ Kunnira hawarro leeshshote ka'e Sooriyu qacha hadhu; hakkiira iillitanno woyite kayinni mittuno noohu dino.

⁶ Kuni ikkinohuno Kaaliiqi Sooriyootu faradunnihanna faradi gaaretenni nootenniha lowo olantoha lawanno hirba macciishshitanno gede asseenna, Israeelete moote Hitootunna Gibitsete mootoolla olantonsa ledo kodhe qasansara dayinoha laweennansa xooqqe ba'inohuraati.

⁷ Kunnira Sooriyootu hatte hawarro dukkannansa, faradonsa, harrensanna qachansa noo gedeenni agurte lubbonsa adhite xooqqino.

⁸ Taraawannoha gogu dhibba afidhinori shoolunku manchi Sooriyootu qachi qooxeessa iillituhu gedensaanni, mittu dukkani giddora e'e afidhino sagale itte agge ka'e birra, culkanna imaana adhite massite maaxidhu. Xaano galagalte higge wolu dukkani giddora e'e adhitinore massite maaxidhu.

⁹ Hakkunni gedensaanni mimmitoho, «Assinoommo coyi dancha di"ikkino; kune techo lowo ba'raa'ra afi'noommo. Konne dancha duduwo maaxi'ra dihasiissannonke; sooda geeshsha konne ba'raa'ra kullummokkinni keeshshinummoro qorichishammeemmona, amme xaanni marre mootete minira kullona» yitu.

¹⁰ Kunnira ka'e Samaariya marte katamu waalcho agartannore woshshite, «Ninke Sooriyu qacha marroommo; marreemmo woyite usuramino faradonna harre agurranna mittuno noohu dino; mitte huurono dimacciishshinoommo; dukkannano uurritinowa no» yite kultunsa.

¹¹ Waalcho agartannorino konne coye halashshiteenna, duduwu mare mootete mini geeshsha iilli.

¹² Moote hashsha kae ledosi gashshaanora, «Sooriyootu assitinore kuleemmo'nena macciishshe! Hudi'noommota affino daafira, ninke sagale hasi'rate fulleemmo woyite, lubbotenni hee'neennanni qafadde katamanke adhitara yite qachinsanni fulte gobbaanni maaxantino» yii.

¹³ Ledosi gashshaano giddonni mittu, «Kunni katami giddo noo mannino reyotenni gatannoha di"ikkinona, gatino faradi giddonni 5 farashsho uyine, shiima manna konne coye buuxanno gede sonko» yee mala abbi.

¹⁴ Kunnira shiima manna doortu; mooteno hakku manni 2 faradi gaarenni mare Sooriyu olanto ikkitinore buuxe daanno gede hajaji.

¹⁵ Sonkoonni mannino hakkiinni kae Yordaanoosi Wayi geeshsha ha'ri. Dooggate aana Sooriyootu xooqqanni hunte hadhino uduunnenna bagado baala la'u. Hakkunni gedensaanni galagalte higge affino coye baala mootete kultu.

¹⁶ Samaariyu mannino rahe fule Sooriyootu qacha saami. Kaaliiqi balaxe coyi'rinonte gede 3 kiilo fila qamade woy 6 kiilo hayixe 1 kinchu birrinni hidhini.

¹⁷ Hatte yannara Israeelete moote katamu waalcho isira gamba yaannohu amaalaanchisi towatanno gede assino. Isono mannu mimmito xiiwanni tuge kakkadeenna reyi. Kuni coyi ikkinohu moote Elsaiwa dayi woyite coyi'noonni himani wo'manno gedeeti.

¹⁸ Elsai mootete balaxe, «Ga'a tenne yannara Samaariyaho 3 kiilo fila qamade woy 6 kiilo hayixe 1 kinchu birrinni hidhinanni» yee kulino.

¹⁹ Hakku reyi manchi kayinni, «Kaaliiqi gordo fane gide xeenimma dirriseenna nafa kuni ikkara didandaanno» yiino. Elsai qole, «Kuni coyi ikkanna illekkinni la"atto. Ati kayinni mittoreno suumekkinni dikisatto» yiinosi.

²⁰ Hakku manchi Samaariyu katami waalchira mannu kakkadeenna reyinohu kuni himani wo'meennaati.