LAYINKI MOOTOOLLA 3 - Qullaawa Maxaafa

ISRAEELETENNA MOAABI MEREERO KAINO OLA

¹ Yihudu moote Iyosaafiixi moohihunni tonaa settikki diro, Akiaabi beetti Iyoraami Israeelete moohi. Samaariya teesso assi're 12 diro gashshino.

² Isino Kaaliiqi giwannoha busha looso loosino. Ikkollana loosino bunshe annisi Akiaabitenna amasi Elzaabeelite gedeeta di"ikkitino. Annisi kinchunni seekkisiisinota Ba"aali misile hunino.

³ Ikkeennano Naabaaxi beetti Iyorbiaami gede Israeelete manna cubbu giddora eessino; isino hakko cubbiwiinni dibaxxino.

⁴ Moaabi moote Meesha ge'reewo ceino; Israeelete mooterano 100,000 ge'reewu wilii'lenna 100,000 ge'reewi goccata orda gabbarannosi.

⁵ Akiaabi reyihu gedensaanni kayinni Moaabi moote Israeelete mootera gara giwi.

⁶ Moote Iyoraamino hakkawoyintenni Samaariyunni fule olantosi baala gamba assi'ri.

⁷ Yihudu mootera Iyosaafiixirano, «Moaabi moote gara giwinoena, iso qasa kaa'lattoeni?» yee manna soqqi. Iyosaafiixino, «Ee kaa'leemmohe; ane ate gede, manna'ya mannikki gede, farado'yano faradikki gede assite kiidhi!» yee dawarisihu gedensaanni,

⁸ «Hiikkaanni hinge gaandeemmo?» yee xa'misi. Iyoraamino, «Edoomi halallitte ragaanni hinge ha'neemmo» yee dawarisi.

⁹ Kunnira Israeelete moote, Yihudu mootenna Edoomi moote mitteenni gaadoho hadhu. Lamala barra halallittennita seeda doogo gaangaabbe hadhuhu gedensaanni olantonsanna saadansa agganno waa hooggu.

¹⁰ Moote Iyoraamino, «Kaaliiqi ninke sasenka Moaabi mootera sayise aankeraatina ba'nummo!» yee raari.

¹¹ Moote Iyosaafiixi, «Kaaliiqi yaannore kulannonkehu konniicho mittu himanaanchino dinoni?» yee xa'mi. Iyoraami olanto albisooti giddonni mittu, «Alba Eeliyaasira kaa'lannohu Saafaaxi beetti Elsai konniicho no» yii.

¹² Iyosaafiixino, «Kaaliiqi qaali isiwa hee'ranno» yii. Kunnira sasunku mootoolla Elsaiwa hadhu.

¹³ Elsaino Israeelete mootera Iyoraamira, «Anewa mayira daatto? Hadhe annikkinna amakki himanaano xa'mi'ri!» yiisi. Moote Iyoraamino daware, «Dihattootiwe! Ninke sasenka mootoolla Moaabi angara sayise aara haa're abbinohu Kaaliiqaati» yii.

¹⁴ Elsaino, «Soqqameemmosihu Olantote Mootichi Kaaliiqi afanna, Yihudu moote Iyosaafiixi daafira yeenna ikkinnina, atera mittoreno assa dihasiisannoe.

¹⁵ Hanni kayinni bagana ganannoha haadhine abbe"exa!» yii. Baganunnihuno daye bagana gananna, Kaaliiqi anga Elsai aanira daggeenna,

¹⁶ «Kaaliiqi, ‹Kunni moolu lagichira lowo balla umme.

¹⁷ Bubbeno xeenano affinikkinni, kunni lagichira wayi wo'manno; ki'ne, lali'nenna hogowi saada'ne agginanniha lowo waa afidhinanni› yiino.

¹⁸ Kuni Kaaliiqira shota coyeti. Hakkiinnino sae Moaabi anga'nera sayise aanno'ne.

¹⁹ Qiinshoonnitanna woyyitino katammansa baala angara qo'litinanni. Laaltannota haqqensa baala kartine guddinanni; bu'ansa wo'manta beeshshitinanni; loosidhannotera shaqqado baattora kinna duuntinanni» yii.

²⁰ Layinki soodo guto kakkalo shiqinshanni yannara, hedeweelcho Edoomi raginni wayi burqe baatto wo'mi.

²¹ Moaabootu sase mootoolla qassansara dagginota macciishshite, ola dandaannoha aja akkala baala lassite fulte qaccete marte agartino.

²² Soodo gutte ka'e la'anno woyite, arrishshote lekka wayi aana ubbeenna wayi mundee lawinsa.

²³ Kunnira, «Tini mundeetewe! Sasenti diinu olanto mimmito shite guddino. Xaa woyite ka'e, marre jajjansa gudhinona!» yitu.

²⁴ Ikkollana Moaabootu Israeelootu noo qacha marte iillituta, Israeelootu ka'e insa qasse badhera qolte shorritu; hakkiinnino sa'e baattonsa amadde insa shite guddu.

²⁵ Katammansa diigganni, mittu mittunku Israeelichi loosi'nannitera shaqqado baatto baalate kinna tuganna baatto gudisante kinna calla ikkitu. Bu'a baala beeshshitu; laalanno haqqa baala karte guddu. Goofimarchoho Qiirihereesi yinannihu dannawu katami callu gatino; isirano corqaayye anga adhitino olanto doyissite bala tuggu.

²⁶ Moaabi moote qeelamanni noota afe, bise suxxitinore 700 manna hoodete adhe diinu dira tayise fule Sooriyu mootewa xooqara wo'naali; ikkollana diqiniinosi.

²⁷ Hakkunni gedensaanni dargasi amade moohannoha bayira beettosi kinchu huxxi aana Moaabi maganira shilqote kakkalo asse shiqishi. Israeelete mannino lowo geeshsha mase katama agure gobbasi higi.