LAYINKI MOOTOOLLA 2 - Qullaawa Maxaafa

EELIYAASI GORDO HA'RI

¹ Kaaliiqi Eeliyaasi hombobolattetenni gordo haa're ha'rannosi yanna iillite heedheenna, Eeliyaasinna Elsai Galgalunni ka'e hadhu.

² Hadhanni heedheenna Eeliyaasi Elsaira, «Kaaliiqi ane Beeteli soyinoena, ati konne agari» yiisi. Elsai kayinni, «Atenna Heeshshote Kaaliiqi halaali afanna, ani atewiinni horonta baxxeemmokkita egensiiseemmohe» yiisi. Kunnira lamunku mitteenni Beeteli hadhu.

³ Beeteli heedhannori himanaanote gaamo Elsaiwa dagge, «Kaaliiqi mootichakki Eeliyaasi techo atewiinni bade haa're ha'rannota afootto?» yitusi. Elsai qole, «Ee afoommona, ki'ne sammi yiiyye!» yiinsa.

⁴ Hakkunni gedensaanni Eeliyaasi, «Elsai, Kaaliiqi ane Iyyaarko soyinoena, ati kawiicho agari!» yiisi. Elsai kayinni, «Atenna Heeshshote Kaaliiqi halaali afanna, ani atewiinni horonta baxxeemmokkita egensiiseemmohe» yee dawari. Kunnira lamunku mitteenni Iyyaarko hadhu.

⁵ Iyyaarko heedhannoti himanaanote gaamono Elsaiwa dagge, «Kaaliiqi mootichakki techo atewiinni bade haa're ha'rannota afootto?» yitusi. Elsaino daware, «Ee afoommona, ki'ne sammi yiiyye» yiinsa.

⁶ Hakkunni gedensaanni Eeliyaasi Elsai, «Kaaliiqi Yordaanoosi Wayiwa ha'reemmo gede hajajinoena, ati kawiicho agari!» yiisi. Elsai qole, «Atenna Heeshshote Kaaliiqi halaali afanna, ani atewiinni horonta baxxeemmokkita egensiiseemmohe» yii. Kunnira lamunku mitteenni hadhu.

⁷ Himanaanote giddonni 50 insa hoode Yordaanoosi hadhu; Eeliyaasinna Elsai marte Yordaanoosi Wayiwa iillituta, himanaano kayinni insawiinni shiima geeshsha faffe uurritu.

⁸ Hakkunni gedensaanni Eeliyaasi kaabbasi fushshe xaaxe kae isinni waa gani; wayino guraranna qiniitira lamewa beehameenna, lamunku moola baatto aanaanni higge fultu.

⁹ Fultuhu gedensaanni Eeliyaasi Elsaira, «Atewiinni baxxe ha'rammora albaanni maricho assammohera hasi'rattoro kulie!» yee xa'misi. Elsaino daware, «Ayyaanikki anera lame ero ikkannoe gede huucci'reemmohe!» yii.

¹⁰ Eeliyaasino, «Qarrisanno coye xa'moottoe. Ikkirono ani atewiinni hawulukame ha'ranna afittoro, yootto coyi ikkannohe; ha'ranna afa hoogittoro kayinni diafi'ratto» yiisi.

¹¹ Hasaabbanni hadhanni heedheenna, giirate gaare goshooshannohu giirate faradi hedeweelcho mereero e"e lamenka badi. Eeliyaasino hombobolatte haadhe gordo hadhusi.

¹² Elsaino konne coye lae, «Anna'ya! Anna'ya! Israeelete hexxo ikkoottohu wonqonsa anewiinni badamittoni?» yee raari. Hakkunni gedensaanni Eeliyaasi diafino. Qoleno Elsai dadille uddanosi baacci asse dari.

¹³ Hakkunni gedensaanni Eeliyaasiwiinni uwino kaabba uullanni haa'ri. Hakkiinni galagale hige Yordaanoosi Wayi gama mare uurri.

¹⁴ Waano Eeliyaasi kaabbinni gane, «Eeliyaasi Magani Kaaliiqi hiikkiicho no?» yii. Waano lede ganita lamewa beehameenna widoonni fuli.

¹⁵ Iyyaarkonni dagginori 50 himanaano iso affe, «Eeliyaasi ayyaani Elsaira saino» yitu. Insano isiwa shiqqi yite albasiinni ubbe keere haadhe,

¹⁶ «Kuneeti konniicho 50 jawaatu manni no; miteekke Kaaliiqi ayyaani mootichakki masse mitu ilaali aana woy mitu lagichira worannona, hanni marre hanso ikka?» yitusi. Elsai qole, «Dee'nina, hadhinoonte!» yii.

¹⁷ Insa kayinni agura gibbe qarrisseennasi yaannore hooge, «Maahoyyena hadhexa!» yii. Ontawunku mannino ha're 3 barra wo'ma Eeliyaasi hase hoogi.

¹⁸ Insano galagalte Iyyaarko Elsaiwa daggu. Elsaino, «Ani albanni hadhinoonte diyoommo'ne?» yiinsa.

ELSAI WAA KEEREENSI

¹⁹ Mitto barra Iyyaarkote Katami manni Elsaiwa daye, «Ati mootichinke afoottonte gede kuni katami hee'rate danchaho. Ikkollana wayi busha ikkino daafira baatto laalcho diuyitanno» yitusi.

²⁰ Isino, «Hanni haaro gachera maxine wortine abbe"e» yii. Insano yiino gede assite abbitu.

²¹ Buichonniwa mare maxine giddo tuge, «Kaaliiqi, ‹Ani konne waa hurse keereensoommo; kunni gedensaanni reyonna laalcho hooga diheedhanno› yiino» yiinsa.

²² Elsai coyi'rinonte gede hatte yannanni kayise wayi keeraa'mi.

ELSAI XONTINO OOSO

²³ Elsai Iyyaarkotenni fule Beeteli ha'rara kai; ha'ranni hee'reenna doogote katamu ooso fulte marro marro higge, «Baddaamu kuni, kawiichinni fuli!» yitanni cancitu.

²⁴ Elsaino caaqqi yee lae, ooso Kaaliiqi su'minni rumi; hakkiinni 2 meyari dibi yinanni moyichubba dubbunni fule hattenne ooso giddonni 42 beetto cancane tugi.

²⁵ Elsaino Qermeloosi Ilaala fuli; shiima yanna keeshshe galagale Samaariya higi.