LAYINKI MOOTOOLLA 18 - Qullaawa Maxaafa

YIHUDU MOOTE HIZIQIYAASI

¹ Eela beetti Hoosei Israeelete moohihunni sayikki diro, Akaaziyaasi beetti Hiziqiyaasi Yihudaho moohi.

² Moohinohu 25 dirisinniiti. Yerusaalame teesso assi're 29 diro gashshino. Amasi Abiya Zakkaariyaasi beettooti.

³ Isi albi annisi Daawiti gede Kaaliiqi baxanno coye assino.

⁴ Dagate maganna magansi'nanni darguwa diigino; sooddiyyeno hiiqqaqqino; Asheera mokkollono cancanino. Muse camotenni seekkinotera Nehushita yinanni misile hamashshunnitera mannu hixaana giirino daafira cancane hunino.

⁵ Hiziqiyaasi Israeelete Magano Kaaliiqa addaxxino. Hakkunnira albaannino gedensaannino isi gedee moote Yihudaho anfe diegenninoonni.

⁶ Hiziqiyaasi Kaaliiqira ammanamino daafira, isi doogonni wirri yee diegennino; Kaaliiqi Muse widoonni qole uyino hajajo agadhino.

⁷ Kaaliiqino ledosi noo daafira assiri baalu qiniinosi. Asoori mooterano hajajama giwe badhe wodhi.

⁸ Filisxeeme qase qeele shiimu qachinni kayise lowo katami Gaazahu geeshshanna qooxeessaho noo gobba baala amadi.

⁹ Hiziqiyaasi moohihunni shoolki diro, Hoosei Israeelete moohihunni lamalki diro, Asoori moote Seliminaasoori Israeele qase Samaariya doyisse amadi.

¹⁰ Doyisse amadihunni sayikki diro Samaariya gudise angara qo'li. Kuni ikkinohu Hiziqiyaasi moohihunni leelki dirooti; Hoosei moohihunni qole honsikki dirooti.

¹¹ Asoori moote Israeele qafade haa're ha're gama Halaahi Katamira, gama Goozaani awuraajjira Haboori Wayi mule, woloota qole Medooni katammara heedhanno gede assino.

¹² Samaariyu uwinohu, Israeele Kaaliiqira hajajama gibbino daafiraati. Kaaliiqi insa ledo eino gondoorono diiggino. Soqqamaanchisi Muse widoonni qole uyino hajajono diwonshitino. Isi yiinota macciishshano hajajamano dihasidhino.

MOOTE SENAAKIREEMI YERUSAALAME HASIISI

¹³ Hiziqiyaasi moohihunni tonaa shoolki diro, Asoori moote Senaakireemi qiinshoonnita Yihudu katamma baala qase amadi.

¹⁴ Hiziqiyaasino Lakiishi noohura Senaakireemira, «Anewa sa'inona, yoottore baala eemmona ballo eeggatena agurie» yee manna soqqi. Senaakireemino, «Ani 10,000 kiilo birranna 1,000 kiilo culka soyattoera hasi'reemmo» yii.

¹⁵ Hiziqiyaasino Qullaawa Minenna mootete mine noo birra baala gamba asse,

¹⁶ qoleno Qullaawu Mini waalchira xallinoonni culkanna isi umisi Qullaawu Mini waalchi tuuqqara xallino culka baala haa're Senaakireemira soyi.

¹⁷ Hatto assanni hee'reennanni Senaakireemi 3 jawaata bagadaano lowo olanto Lakiishinni haadhe hadhe Hiziqiyaasi qassanno gede Yerusaalame soyi. Insano Yerusaalame iillite aliidi kofamenni wayi ha'ranno gede fannoonni doogora imaana hayishshinanni darga massitanno doogora marte uurritu.

¹⁸ Hakkunni gedensaanni Hiziqiyaasira sokka sokku. Isino mootete mini roorricha Hiliqiya beetto Eeliyaaqeemi, mootete mini borreessaancho Shebinanna tajete mini roorricha Asaafi beetto Yoaahi insanni xaaddanno gede soyi.

¹⁹ Asoori gaadaanni, «Hiziqiyaasira, ‹Jawu Asoori moote kageeshshi geeshsha wodanaa'moottohu aye hexxiteeti?

²⁰ Mulla haafa olu busullenna wolqa nooe yaatto? Afummona, ati aye hexxiteeti anera gara giwattohu?

²¹ Kune Gibitse kaa'litannoe yite heddanni nootto. Gibitse hexxa fiinxaaraame shomboqqo siqqi'rate ledo mittete; fiinxaaraame shomboqqo siqqi'niro anga qassanno. Gibitsete moote hexxannohano hattoo coyi agadhannosi.

²² Kaaliiqa Magano'ne hexxitinannita anera kultinannie? Yihudunna Yerusaalamete manni mitto darga calla magansi'ranno gede Maganoho kakkallanniwanna magansi'nanni darga baala diigoottohu Hiziqiyaasi ate di"ikkootto?

²³ « ‹Ani kayinni Asoori moote su'minni woyyannohe coye kuleemmohe. Gulufa dandaanno manni hee'rihero 2,000 farado eemmohe.

²⁴ Gibitsennita faradi gaarenna faradaasine hexxittorono, Asoori gaadaannuwa giddonni woriidiha nafa hoo'la didandaatto.

²⁵ Anino tenne gobba qasatenna horrate Kaaliiqi fajjikkinni dayommoha lawinohe? Tenne gobba gaade daye gudeemmo gede hajajinoehu umisi Kaaliiqaatiwe!› yitine kullesi» yii.

²⁶ Hakkunni gedensaanni, Eeliyaaqeemi, Shebinanna Yoaahi Asoori gaadaannira, «Ninke qaale egenninoommo daafira, Sooriyu qaalinni kulinke. Huxxu aana noo manni macciishshannona Ibiraawootu qaalinni kultootinke» yitusi.

²⁷ Asoori gaadaannino, «Mootichi'ya Asoori moote konne coye ki'neranna moote'nera calla kulammora soyinoeha lawino'ne? Kuni huxxu aana noo manni, ki'ne sasunkunte gede uminsata lowo shuma itaranna wayi shumansa agara nooha ikkinota afanno gedeetiwe!» yiinsa.

²⁸ Hakkunni gedensaanni Asoori gaadaanni kae uurre, qoonqosi naggi asse Ibiraawootu afiinni coyi'ranni, «Jawu Asoori moote yiino'nere macciishshe!

²⁹ Hiziqiyaasi dogoonke'ne; isi horonta ane anganni gatisa'nera didandaanno.

³⁰ Hiziqiyaasi, ‹Kaaliiqa addaxxe; gatisannonkena; kataminkeno Asoori moote angara eannokki gede hoolanno› yaannota macciishshitinoonte.

³¹ Hiziqiyaasi yaannota macciishshitinoonte. Asoori moote, ‹Daggine anera anga uuyye! Hatto ikkitiniro woyine'nenna balase'ne laalo ittinanni; waa'neno agginanni.

³² Kuni ikkannohu ani ki'neta labbanno baattora masse worammo'ne geeshshaati. Hatte baattono woyinete haqqenna haaro woyinete xajje, ejersu laalonna ejersu zayite, malawunna gidu fulannote› yiinoe. «Kunnira, moote yiino'ne gede ikkitiniro lubbotenni heedhinannita ikkinnina direyitinanni. Hiziqiyaasi, ‹Kaaliiqi gatisannonke› yaanni gowwisoonke'ne.

³³ «Wole gosa maganna giddonni Asoori moote anganni mannasi gatise egennino magani nooni?

³⁴ Hatto ikkiro, Hamaatinna Arfaadi maganna mama nooyya? Sefariwayimi, Henainna Iiwa maganna hiikka higguyya? Insa giddonni Samaariya ane anganni gatisihu nooni?

³⁵ Tenne gobba baalate maganna mannansa ane anganni gatisidhino yanna nooni? Ki'ne, ‹Kaaliiqi Yerusaalame gatisanno› yitine heddinannihu mayiraatiyya?» yii.

³⁶ Sasunku manni kayinni moote Hiziqiyaasi hajajinonsante gede mittoreno dawartannokkiha sammi yitu.

³⁷ Hakkunni gedensaanni, Eeliyaaqeemi, Shebinanna Yoaahi dadillunni uddanonsa dartu. Asoori gaadaanni yiinore baalano dagge moote Hiziqiyaasira kultusi.