LAYINKI MOOTOOLLA 14 - Qullaawa Maxaafa

YIHUDU MOOTE AMESIYAASI

¹ Iyoahaazi beetti Yoaasi Israeelete moohihunni layinki diro, Iyoaasi beetti Amesiyaasi Yihudaho moohi.

² Moohinohu 25 dirisinniiti. Yerusaalame teesso assi're 29 diro gashshino. Amasi Yihoadaani Yerusaalamete Katamira ilantinote.

³ Isino Kaaliiqi baxanno coye assino. Ikkeennano albi annisi Daawiti gede ikkikkinni ilinosihu Iyoaasi loosino gedee bunshe assino.

⁴ Gaarrate aana seekkinoonnita dagate maganna magansi'nanni darguwa didiigino; mannuno gaarrate aana kakkalanna hixaana giira diagurino.

⁵ Amesiyaasi gashshootesi jawaachishi'rihu gedensaanni, annasi shitino gashshaano shii.

⁶ Ikkollana Seeru Maxaafi Musehura, «Annuwa oosonsa cubbi daafira, ooso annuwansa cubbi daafira yine shinoonke; mittu mittunku umisi cubbi callunni reyanno» yine borreessinoonni garinni oosonsa dishiino.

⁷ Amesiyaasi, Maxinete Lagichira 10,000 Edoomoota shii. Seelai yinanni katama amade su'ma soorre, Yoqixieeli yii. Xaa geeshshano hakko su'minni woshshinanni.

⁸ Hakkunni gedensaanni Amesiyaasi Israeelete mootera Iyu beetti Iyoahaazi, «Hanni amo albaanni xaande olammona» yee sokkaancho soyi.

⁹ Yoaasi kayinni Amesiyaasira, «Mitte higge Libaanoosi Ilaali aana noo qu'muudo hakkiicho noo dagucho, ‹Beetti'yara beettokki uyie› yite sokka soqqitino. Ikkollana mittu moyichi hakkaanni hige sa"anni hattenne qu'muudo kade mirciishshino.

¹⁰ Amesiyaasi, Edoomoota qeelootto daafira boo'nootto. Afi'rootto qeellenni hagiidhite minekki gabbi yite ofollittoro woyyannohe; umikkiranna Yihudu mannira bao abbanno coye mayira hasi'ratto?» yii.

¹¹ Amesiyaasi kayinni Yoaasi yiinore miteno diyiino. Kunnira Yoaasi olantosi hoodete adhe Amesiyaasi qasara gaade mareenna, lamunku Yihudu gobbara Beetesaamisa Katamira olaho xaaddu.

¹² Amesiyaasi olanto qeelante, xooqqe qae qaensa higgu.

¹³ Yoaasi Amesiyaasi qafade kae Yerusaalame daye, katamu huxxa iillanni hee'renni Efireemi Huxxi waalchinni kayise, Huxxu Madde Furcho geeshsha nooha 200 qaafo ikkanno geeshshiwa huxxa diigi.

¹⁴ Qullaawa Minenna mootete mine noo culkanna birra, qoleno hakkiicho noo uduunne baala qafadino manni ledo mitteenni adhe Samaariya higi.

¹⁵ Moote Yoaasi assinohu wolu coyi baalu, qoleno Yihudu moote Amesiyaasi aana leellishino bareende baala Israeelete mootoolla dhagge amadino maxaafira borreessineenna no.

¹⁶ Yoaasino reenna Samaariyaho mootoollate waamma giddo madaarroonnisi. Beettisi Iyorbiaami isi darga amade moohi.

YIHUDU MOOTE AMESIYAASI REYI

¹⁷ Israeelete moote Iyoahaazi beetti Yoaasi reyihu gedensaanni, Yihudu moote Yoaasi beetti Amesiyaasi 15 diro hee'rino.

¹⁸ Amesiyaasi assinohu wolu coyi baalu Yihudu mootoolla dhagge amadino maxaafira borreessineenna no.

¹⁹ Amesiyaasi shaate Yerusaalamete gano gannoonni daafira xooqe Lakiishi ha'ri. Ikkollana baarigaarrasi manna sokke shiishiishshusi.

²⁰ Reeshshasino farashshoho hogobbe Yerusaalame abbite, Daawiti Katamira mootoollate waammawa madaartino.

²¹ Yihudu manni 16 diriha beettosi Ooziya isi darga moohisi.

²² Ooziya annisi reyihu gedensaanni, amadame hee'rannoha Elaati Katama qase qole galagalche gatamari.

ISRAEELETE MOOTE IYORBIAAMI

²³ Iyosiyaasi beetti Amesiyaasi Yihudaho moohihunni tonaa ontikki diro, Yoaasi beetti Iyorbiaami Israeelete moohi; Samaariya teesso assi're 41 diro gashshino.

²⁴ Isino Kaaliiqi giwanno coye assino; Israeele cubbu giddora eessihu Naabaaxi beetti Iyorbiaami loosino bunshewiinni agure dihigino.

²⁵ Alba Israeelete amado ikkitinota aliyyeenni Hamaati sa'nanni faronni kayise wodiidoonni Reyino Baari geeshsha noo gobba baala qase qo'li. Kuni baalu ikkinohu Israeelete Magani Kaaliiqi Gaatihefeeri yinanniwa ilaminohu Amiitayi beetti himanaanchu Yoonaasi widoonni qole coyi'rino garinniiti.

²⁶ Kaaliiqi Iyorbiaami kaa'linohu, Israeelete manni baalu wolaphinohuno borojjimma noohuno kaa'lannonsahu nookkiha shete noota afeeti.

²⁷ Kaaliiqi Israeele Iyorbiaami widoonni qole gatisinohu co'o yite gooffara hasi'rinokki daafiraati.

²⁸ Iyorbiaami assinohu wolu coyi baalu, olunni leellishinoti bareendesi, qoleno Yihudu amado ikkitinore Hamaatinna Demaasiqo Israeelete qolsiisino gari baalu Israeelete mootoolla dhagge amadino maxaafira borreessineenna no.

²⁹ Iyorbiaamino annuwasinte gede reenna, Israeelete mootoolla waammawa madaarroonnisi. Beettisi Zakkaariyaasi isi darga moohino.