LAYINKI MOOTOOLLA 13 - Qullaawa Maxaafa

ISRAEELETE MOOTE IYOAHAAZI

¹ Akaaziyaasi beetti Iyoaasi Yihudaho moohihunni lemiina sayikki diro, Iyu beetti Iyoahaazi Israeelete moohi. Samaariya teesso assi're 17 diro gashshino.

² Isino Israeele cubbu giddora eessihu Naabaaxi beetti Iyorbiaami gede, Kaaliiqi giwanno coye assino; bunshete doogonni horonta dihigino.

³ Kaaliiqi hanqino Israeelete aana buwi. Kunnira marro marro hige Sooriyu moote Azaheelinna beettisi Benihadaadi angara sayise uyinsa.

⁴ Hakkunni gedensaanni Iyoahaazi Kaaliiqa huucci'ri. Kaaliiqino Sooriyu moote Israeelete aana assino beebba lowo geeshsha batidhinota lae, Iyoahaazi huuccatto macciishshi.

⁵ Kunnira, Kaaliiqi Israeele Sooriyootu anganni gatisannonsaha soyi. Hakkunni gedensaanni albi gede keere heedhu.

⁶ Ikkollana Israeele so'risiisihu Iyorbiaami mini loosino cubbo loosa diagurtino. Qolteno Samaariyaho nooti Asheera mokkollichono didiigantino.

⁷ Iyoahaazira 50 faradaasine, 10 faradi gaarenna 10,000 olanto agurranna wole olanto dinosi. Kuni ikkinohu Sooriyu moote wole olantosi ayiddummete kuri gede fee mucuqqi asse gude agurino daafiraati.

⁸ Iyoahaazi assinohu wolu coyinna bareendesi loosi baalu Israeelete mootoolla dhagge borreessinoonni maxaafi giddo no.

⁹ Iyoahaazi annuwasi gede reenna Samaariyaho madaarrisi. Beettisi Yoaasi isi darga moohi.

ISRAEELETE MOOTE YOAASI

¹⁰ Yihudu moote Iyoaasi moohihunni sajjiina lamalki diro, Iyoahaazi beetti Yoaasi Samaariya teesso assi're Israeele 16 diro gashshino.

¹¹ Isino Kaaliiqi giwanno coye assino. Israeele cubbu giddora eessihu Naabaaxi beetti Iyorbiaami loosino cubbo loosa diagurino.

¹² Yoaasi assinohu wolu coyi baalu, qoleno Yihudu moote Amesiyaasi ledo olami wari bareende Israeelete mootoolla dhagge amadino maxaafi giddo borreessineenna no.

¹³ Yoaasino annuwasi gede reenna Samaariyaho nootewa mootoollate waammawa madaarrisi. Beettisi Iyorbiaami isi darga moohi.

ELSAI REYI

¹⁴ Himanaanchu Elsai lowo geeshsha dhiwame reyara rahe hee'reenna, Israeelete moote Yoaasi la"asira daye, «Anna'ya! Anna'ya! Ati Israeelete mannira hexxonsaatinna wonqonsaati!» yaanni wi'lisi.

¹⁵ Elsaino moote, «Digaananna worbicho haadhe abbi!» yii. Isino haa're abbi.

¹⁶ Elsai, «Digaana bedeedi!» yiisi. Isino digaana bedeedita Elsai angasi mootete anga aana wore,

¹⁷ «Soojjaati masikoote fani» yiisi. Mooteno masikoote fani. Elsaino, «Worbicho facci assite aguri!» yiisi. Moote worbicho facci asse aguranni hee'reennanni Elsai, «Ati Kaaliiqi worbichooti! Kaaliiqi ate widoonni qole Sooriyoota qeelanno. Atino Sooriyoota gudatto geeshsha Afeeqi Katamira qasatto» yii.

¹⁸ Qoleno, «Wole worbichuwano haadhe insanni baatto gani!» yiisi. Iyoaasino haa're baatto 3 hige gane aguri.

¹⁹ Elsaino mootete hanqe, «Baatto 5 woy 6 higge ganoottoro, Sooriyoota co'o assite gudattohu baino. Xa kayinni 3 higge calla qeelatto» yiisi.

²⁰ Elsai reenna madaarrisi. Hakka waro Moaabootu diru dirunkunni dagganni Israeele horritanno.

²¹ Mitte hinge Israeelete gobbara mitto mancho madaarrara ka'ne hee'neenna bala tuggannori ka'e daggeenna muddante reeshsha Elsai waammara tugge xooqqino. Reeshshuno hedeweelcho Elsai miqicho kisanni hee'renni hakkawoyintenni kae uurri.

ISRAEELETENNA YIHUDU MEREERO KAINO OLA

²² Iyoahaazi moohe noo yanna baalantera Sooriyu moote Azaheeli Israeele shetisanni hee'rino.

²³ Kaaliiqi kayinni shaqqillisinni mararinonsata ikkinnina techo geeshsha albisinni dihuninonsa. Hatto assinohu Abirihaami, Yisihaaqinna Yaiqoobi ledo eino gondoori daafira yeeti.

²⁴ Sooriyu moote Azaheelino reenna, beettisi Benihadaadi isi darga moohi.

²⁵ Hakkunni gedensaanni Israeelete moote Iyoahaazi beetti Yoaasi Benihadaadi 3 hige qeele, annisi Iyoakaazi yannara Azaheeli adhino katamma Benihadaadiwiinni qo'li.