LAYINKI MOOTOOLLA 12 - Qullaawa Maxaafa

YIHUDU MOOTE IYOAASI

¹ Iyu Israeelete moohihunni lamalki diro Iyoaasi Yihudaho moohi. Yerusaalame teesso assi're 40 diro gashshino. Amasi Tsiibiya ilantinohu Bersaabehi Katamiraati.

² Qeesichu Yoodahe lubbotenni hee're rosiisannasi noo yannara, Iyoaasi Kaaliiqi baxanno coye assanni hee'rino.

³ Ikkollana gaarrate aana noota magansi'nanni darguwa diiginokki daafira, mannu hakkiichira mare hixaananna kakkalo shiqisha diagurino.

⁴ Iyoaasi qeesoota woshshe, «Qullaawu Minira shiqannoha giwireno ikko mannu umisi baxe aannoha fushshaate ikkanno woxe baala gamba asse.

⁵ Mittu mittunku qeesichi gamba assanno woxe seekke amada hasiisannosi. Hakko woxinni Qullaawa Mine gatamarrona» yiinsa.

⁶ Ikkollana Iyoaasi moohihunni 23 diri geeshsha qeesootu Qullaawa Mine digatamartino.

⁷ Kunnira Iyoaasi qeesicha Yoodahenna wole qeesoota woshshe, «Qullaawa Mine gatamara mayira gibbini? Techo ka'a woxe ki'ne amaddinoonte; xa anga'ne noo woxe Qullaawa Mine gatamarrona uuyye» yiinsa.

⁸ Qeesootuno woxe amadanna Qullaawa Mine gatamarate uyinoonninsa murrimma agurtu.

⁹ Hakkunni gedensaanni qeesichu Yoodahe mitte saaxine haa're iimaanni xullo fushshe, masse Qullaawu Minira e'nannihura qiniiteenni kakkalote dargi mule wori. Waalcho agarte noo qeesooti Qullaawu Minira daanno manni aanno woxe wo'manka haadhe saaxinete giddo wortanno gede assi.

¹⁰ Saaxinete giddo woxu wo'manno yannara, mootete mini borreessaanchinna qeesootu roorrichi dagge woxe kiirte ogoroho wortanno.

¹¹ Woxu ikkino geeshsha affuhu gedensaanni, massite Qullaawa Mine gatamarate murrimma uyinoonni mannira uyitanno. Insano haqqunni mintannoriranna kinchunni mintannorira baattanno.

¹² Kincho boccannorira, gatamarranni haqqenna kinna hirtannoriranna wolu addi addi coyira baattanno.

¹³ Ikkollana konne woxe birrunni seekkinannirira xiltaame saannara, qarabbate, quuqqadda xiltuwara, xurumbaho woy culkunni ikko birrunni seekkinannihura qullaawu uduunnira difushshinanni.

¹⁴ Konne woxe Qullaawa Mine gatamaranno mannira calla uyinanni.

¹⁵ Kunni loosira murrimma uyinoonni manni ammanantinore ikkitino daafira, woxe fushshitanno gara qorqorannohu wolu dino.

¹⁶ Cubbunna saote kakkalo daafira uyinanni woxe kayinni qeesootaho uyinannita ikkinnina Qullaawu Mini saaxine giddo diworranni.

¹⁷ Hatte yannara Sooriyu moote Azaheeli Gaati Katama qase amadi. Hakkiinnino sae Yerusaalameno qase amadara hedi.

¹⁸ Yihudu moote Iyoaasi isi albaanni mookkinori Iyosaafiixi, Iyoraaminna Akaaziyaasi Kaaliiqira badde wortino uduunnenna isi umisihano aanaho lede, Qullaawu Mininna mootete mini miinji darga nooha culka baala gamba asse Sooriyu mootera Azaheelira afansha asse soyi.

¹⁹ Moote Iyoaasi assinohu wolu coyi baalu Yihudu mootoolla dhagge amadino maxaafira borreessame no.

^20-21 Hakkunni gedensaanni ledosi gashshaano moote Iyoaasi aana ka'u. Insa giddonni 2 Shimiaati beetti Yozaakaarinna Shomeeri beetti Yozaabaadi Yerusaalamete soojjaatoonni nootera Siila massitannotera taashshinoonni baatto aana minnoonni mini giddo shitusi. Iyoaasino massine Daawiti Katamira mootoollate waammawa madaarrisi. Beettisi Amesiyaasino isi darga moohi.