LAYINKI MOOTOOLLA 11 - Qullaawa Maxaafa

ATAALIYA YIHUDAHO MOOKKU

¹ Akaaziyaasi ama Ataaliya beettise reyinota affe, mootete ilama ikkitinore baala shine gundanni gede assitu.

² Mitte Yihosheeba yinanniti Iyoraami beetto Akaaziyaasi rodoo no. Ise shinanna gattinori Akaaziyaasi ooso giddonni mitticho Iyoaasi yinanni beetto awuutosi ledo massite Qullaawu Mini mule noohura gallanni minira maaxxino.

³ Ataaliya mookkuhu 6 diri giddo Yihosheeba Iyoaasi hakkiicho noowa towattanni lossitinosi.

⁴ Ikkollana lamalki diro qeesichu Yoodahe mootenna mootete mine agartannore roorroota ikkitinore baala Qullaawu Minira dagganno gede woshshiishe, isi hedino coyira sumuu yitanno gede xaarsiisinsa. Hakkunni gedensaanni Akaaziyaasi beetto Iyoaasi leellishinsa.

⁵ Qoleno, «Fooliishshote Barra agarete fultinanni yannara, ki'ne sasente gaamo giddonni mitte gaamo mootete mine agartona;

⁶ layinki gaamo qolte Suuri huxxi waalcho agartona; gattinori qolte agaraasinete badheenni noo huxxi waalcho agartona.

⁷ Fooliishshote Barra agarate bado fushshidhinori 2 gaamo kayinni moote gawajjamannokki gede Qullaawa Mine agartona.

⁸ Moote Iyoaasi agartinanni yannara, iso dukkissine bise fushshidhine ha'rannowa baala ledosi hadhinanni, muli'nera shiqqi yaannoha baala shiiyye!» yii.

⁹ Olu hajajaanono Yoodahe yiino coye adhite Fooliishshote Barra agartannorenna bado fushshidhinore baala haadhe isiwa abbitu.

¹⁰ Yoodahe Qullaawa Mine maanxeenna heedhannota Daawiti wonquwanna amaxxuwa olu hajajaasinera uyinsa.

¹¹ Bagado anga adhite noore baala kakkalote dargi widoonni Qullaawu Minira albaanni moote agartanno gede assi.

¹² Hakkunni gedensaanni Yoodahe mootete beetto Iyoaasi haa're abbe ayirrinyu ba'latto umoho worisi; gashshootu seera amaddino borrono uyisi. Kunni garinni Iyoaasi buurre moohinsi. Mannuno qoonqonsa naggi asse anga gananni, «Seeda diro moohi!» yii.

¹³ Mootitte Ataaliya agaraasinennihanna mannu luulo macciishshite, mannu gamba yee noowa Qullaawu Minira rakke martu.

¹⁴ Hakkiichira iillitanno woyite haaru moote budu garinni Qullaawu Mini waalchira noo mokkollichi mule uurre nooha affu. Isono olu hajajaanonna xurumba ufuuffannori dukkisse noosi; mannu baalunku hagiidhe ilillisanni xurumba ufuufanni no. Ataaliyano masse uddanose darte, «Tini ganote! Tini ganote!» yite cancitu.

¹⁵ Yoodahe Qullaawu Mini qoqqowi giddo reyitannokki gede olu hajajaano woshshe, «Mereerinni fushshitine abbe; hoolara hedannoha affiniro shiiyye» yii.

¹⁶ Insano ise haadhe massite, faradu mootete mini hoowe eannowa shitu.

YOODAHE WOYYEESSINO COYE

¹⁷ Yoodahe, mootenna Yihudu gosa Kaaliiqi manna ikkate Kaaliiqi ledo gondooro e'anno gede assi; qoleno mannu mootete ledo gondooro eanno gede assi.

¹⁸ Hakkunni gedensaanni baalunku marte Ba"aali galma diiggu; kakkalote darganna misilla baala cancantu; Maataani yinanniha Ba"aali qeesichano kakkalote dargira albaanni shitu. Qeesichu Yoodahe Qullaawa Mine agartannore wori.

¹⁹ Hakkunni gedensaanni olu hajajaano, mootete muli agaraasinchinna mootete mini agaraasine moote dukkisse Qullaawu Mininni hadhanno gedenna mannuno hoodete ha'ranno gede assi; Iyoaasino agaraasinete waalchi widoonni hige e"e ayirradu barcimira ofolli.

²⁰ Ataaliya mootete mine shinihu gedensaanni mannu baalu hagiidhi; katamuno harshammi yii.

²¹ Iyoaasi moohinohu 7 dirisinniiti.