LAYINKI MOOTOOLLA 10 - Qullaawa Maxaafa

AKIAABI SIRCHO GUNDI

¹ Hatte yannara 70 Akiaabi ilama ikkitinori Samaariyu Katamira heedhanno. Iyuno borrote sokka borreesse hakko noorira Iyiziraeeli gashshaanora, geerrahonna Akiaabi sircho amadde noorira soyi. Sokkano,

² «Mootichi'ne ooso amadate annimma ki'nera uyinoonni; faradunna faradi gaare, olu bagadinna qiinshoonni katami anga'ne no. Xa tini borrote sokka iillitanni heedheenna'nenni,

³ mootete sirchi giddonni mitto woyyannoha la'ine moohisse; isira ha'litine gaaramme!» yitannote.

⁴ Insa kayinni waajjite mimmitoho, «Lame mootoolla dandiitinokki mancho Iyu, ninke hiitto assine dandiineemmo?» yitu.

⁵ Kunnira mootete mini roorrichi, katamu gashshaanchi, geerrunna Akiaabi sircho amadde noori mitteenni Iyura, «Ninke ate soqqamaanooti; yaattore baala assate qixxaambe hee'noommo; ninke wole ayeno dimoohisi'neemmona, ati seyanno yaattore baala assi» yite dawartu.

⁶ Iyuno, «Ane garo ikkitinannihanna hajajantinannieha ikkiro, Akiaabi sircho baala goowa murtine umonsa ga'a tenne yannara Iyiziraeeli haadhine abbe!» yee wole borrote sokka soyi. Hatte yannara Akiaabi sircho ikkitinori lamalawunku manni Samaariyaho egennantinori gobbate geerri anga no.

⁷ Borrote sokka iillitanni heedheennansanni, Samaariyu gashshaano lamalaanka Akiaabi sircho ikkitinore shitu; goowansano murte umonsa gimboolaho worte Iyuwa Iyiziraeeli sokku.

⁸ Lamalawunku manni umo murre abbinoonnita kulleennasi Iyu, katamu waalchira lamewa duunne layinkiidi soodo geeshsha keeshshiinshanni gede hajaji.

⁹ Iyu layinki soodo gute kae gamba yee noo mannira, «Moote Iyoraamira gano gane shoommohu aneeti. Kunni coyira ki'ne dixa'mantinanni. Konne manna baala shiihu kayinni ayetiyya?

¹⁰ Xa Kaaliiqi Akiaabi sirchi daafira coyi'rino coyi mittuno uulla uwannokkita affe. Kaaliiqi soqqamaanchisi himanaanchu Eeliyaasi widoonni qole coyi'rinore wonshino» yii.

¹¹ Hakkunni gedensaanni Iyu Iyiziraeeli noore Akiaabi ayidde, ledosi gashshaano, jaallasinna qeesootasi baala mucuqqi asse gudi.

IYU AKAAZIYAASI FIIXA BAALA SHII

¹² Iyu kae Samaariya ha'ri. Doogote aana hee're, allaalaasine xaaddannowa iille,

¹³ Yihudu moote Akaaziyaasi fiixa ikkinohunni shiimu manninni xaade, «Ki'ne ayeooti?» yee xa'minsa. Insano, «Ninke Akaaziyaasi fiixaati; xa mootitte Elzaabeeli oosonna mootete mini manna keere haa'nammora Iyiziraeeli ha'nanni hee'noommo» yite dawartusi.

¹⁴ Isino, «Konne manna lubbotenni hee'reennanni amadde!» yee hajaji. Olantosi amaddeenna Iyu hakkiicho noo bale wayinnite mule shii. Shinoonnihu 42 mannaati. Insa giddonnino gatinohu dino.

IYU GATINOHA AKIAABI FIIXA BAALA GUDI

¹⁵ Iyu hakkiinnino kae ha'ranni hee'reenna doogote Rekaabi beetti Iyonaadaabi isinni xaadara dayi. Iyuno keere haa'rihu gedensaanni, «Atenna ane hedo mittetena, ane garo ikkattoni?» yee xa'misi. Iyonaadaabino, «Ee ate garo ikkeemmo!» yee dawari. Iyuno, «Hattootiro anga'ya amadi!» yiisi. Lamunku mimmitu anga amaddeenna Iyu irkise faradi gaaresi aanira giddisiisisi.

¹⁶ Qoleno, «Xa mitteenni ha'neenna ani Kaaliiqira mageeshshi geeshsha aamamoommoro la"atto» yiisi. Lamunku faradi gaarete ofolte Samaariya hadhu.

¹⁷ Samaariya iillituta, Iyu gatinoha Akiaabi fiixa baala shee gudi. Kuni baalunku ikkinohu Kaaliiqi himanaanchu Eeliyaasi widoonni qole coyi'rino garinniiti.

IYU BA"AALI SOQQAMAANO SHII

¹⁸ Iyu Samaariyu manna baala gamba asse, «Akiaabi Ba"aalira shiima geeshsha soqqamino; ani kayinni hakkiinni roorse soqqamammosira hasi'roommo.

¹⁹ Kunnira Ba"aali himanaano, soqqamaanosinna qeesootasi baalanka gamba asse"e; mittuno xeoonke. Ani Ba"aalira jawa kakkalo shiqisheemmo daafira, daannokkihu hee'riro lubbotenni dihee'ranno» yii. Iyu kayinni konne assinohu Ba"aali soqqamaano gudara hayyo qaleeti.

²⁰ Hakkunni gedensaanni Iyu, Ba"aali ayyaana ayirrinsanni gede hajaji; konne coyeno mannaho lallambe kulli.

²¹ Iyu Israeelete gobba baalate manna soyenna, Ba"aalira soqqamanno manni baalu gamba yii; mittuno gatikkinni baalunku daye Ba"aali galma hicikki yee wo'mi.

²² Iyuno uddanote mini murricha, Ba"aali soqqamaano baalantera uddanna fushshe aannonsa gede hajaji. Isino hajajinosi gede assi.

²³ Hakkunni gedensaanni Iyu Rekaabi beetti Iyonaadaabi ledo galmu giddora e"e Ba"aali soqqamaanora, «Konniicho Ba"aali soqqamaano agurranna Kaaliiqa magansi'rannohu mittuno nookkita seekkitine egenne!» yiinsa.

²⁴ Hakkiinni isinna Iyonaadaabi Ba"aalira shilqote kakkalo shiqishshu. Hakkunnira albaanni Iyu 80 olanto galma gaangeessite agartanno gede asse, «Kunni manni giddonni mitto nafa fule ba"anno gede assannohu hee'riro, hakkunni darga isi reyanno» yee qorophisiisino.

²⁵ Iyu kakkalo shiqishe ka"anni hee'renni agaraasinenna olantote roorroota, «E'ine shiiyye; mittuno gatoonke» yee hajaji. Insano bisensa fushshidhe e'e wo'manka shite guddu. Reeshsha baalanka goshooshshe gobbara fushshite galmu holgira sa'e,

²⁶ kinchunni seekkinoonnita Ba"aali misile fushshite giirtu.

²⁷ Kunni garinni Ba"aali misilenna galmasi diigge shumate ofollinanniwa assitu. Techo geeshshano hakko garinni no.

²⁸ Iyu Israeelete gobbara Ba"aali magansi'nannikki gede assinohu kunni garinniiti.

²⁹ Ikkollana Iyu Israeele cubbu giddora eessinohu Naabaaxi beetti Iyorbiaami ha'rino doogo ha'ra diagurino. Iyorbiaami Beetelinna Daani uurrisi'rinota culkunni seekkinoonnita siitu misileno dihunino.

³⁰ Kaaliiqino Iyura, «Yoommo garinni Akiaabi sircho gudde ani baxeemmo coye assootto. Kunnira sirchikki Israeelete 4 ilama geeshsha moohanno» yiisi.

³¹ Iyu kayinni Israeelete Magani Kaaliiqi Seera wo'mu wodaninni agadha agure, Israeele cubbu giddora eessinohu Iyorbiaami loosino gedee bunshe loosino.

IYU REYI

³² Hatte yannara Kaaliiqi Israeelete baatto ajjanno gede assa hanafi. Sooriyu moote Azaheelino Israeele qase qeele gobba amadi.

³³ Amadinoti: Yordaanoosi Wayira soojjaatoonni, wodiidoonni Arnooni Wayira aleenni noo katami Aroeerihu geeshsha noota Gaadi, Roobeelinna qoleno soojjaatoonni noota darate Minaase ga're heedhannota Geleaadinna Baasaani baatto baalate.

³⁴ Iyu assinohu wolu coyinna bareendesi baala Israeelete mootoolla dhagge amadino maxaafira borreessineenna no.

³⁵ Iyuno annuwasinte gede reenna Samaariyaho madaarrisi. Beettisi Iyoahaazi dargasi moohi.

³⁶ Iyu Samaariya teesso assi're Israeele 28 diro gashshino.