LAYINKI MOOTOOLLA 1 - Qullaawa Maxaafa

KAALIIQI MOOTE AKAAZIYAASI QORICHISHI

¹ Israeelete moote Akiaabi reyihu gedensaanni, Moaabi gosa Israeelete aana ka'u.

² Hatte yannara Akaaziyaasi Samaariyaho mootete minira iimaanni noo darginni uwe lowo geeshsha madi'ri. Kunnira dhiwame hee're, «Kunni dhibbinni gateemmoronna hoogeemmoro Filisxeemete katama Eqirooni martine maganonsa Bielizebuuli xa'mitine amme"e» yee manna soqqi.

³ Kaaliiqi sokkaasinchi kayinni Tesibicha Eeliyaasi, «Fulte Samaariyu moote Akaaziyaasi soyino manni ledo xaadde, ‹Eqirooni Katami magano Bielizebuuli xa'midhinara hadhinannihu Israeelete Maganu hoogeennaatini?›

⁴ Kunnira Kaaliiqi, ‹Reyattota ikkinnina digatatto› yiinohe yitine kullesi» yii. Eeliyaasino Kaaliiqi yiinosi gede assi.

⁵ Soqqino mannino galagale higeenna moote, «Hiitto ikkitine rakkine daggini?» yee xa'minsa.

⁶ Insano dawarte, «Doogote xaandoommohu mittu manchi galagalle atewa hingeemmo gedenna Kaaliiqi yiinore kulleemmohe gede hajajinonke. Isino, ‹Israeelete Maganu hoogeennaatini Eqirooni maganiwa Bielizebuuliwa manna soqqittohu? Kunnira reyattota ikkinnina digatatto yitine kullesi› yiinonke» yitu.

⁷ Mooteno, «Konne coye kuli'ne manchi hiittooho?» yee xa'minsa.

⁸ Insano, «Ordaame uddano uddi're hallo sunchunni qodhinoho» yite dawartusi. Mooteno qole, «Hakku Tesibichu Eeliyaasiiti!» yii.

⁹ Hakkunni gedensaanni moote mitto olu roorricha 50 manni ledo ha're Eeliyaasi abbanno gede soyi. Olu roorrichino Eeliyaasi mittu gaari aana ofolle nooha afe, «Maganu mancho! Moote, ‹Dirrite kawa amo!› yiinohe» yiisi.

¹⁰ Eeliyaasino daware, «Ani Maganu mancho ikkoommoro, gordunni giira dirrite atenna mannakki itto!» yii. Giira hakkawoyintenni dirrite isonna mannasi ittu.

¹¹ Moote layinkimeeshshono wole olu roorricha 50 manni ledo soyi. Isino Eeliyaasiwa mare, «Maganu mancho! Moote, ‹Rakke dirrite kawa amo!› yiinohe» yiisi.

¹² Eeliyaasino daware, «Ani Maganu mancho ikkoommoro gordunni giira dirrite atenna mannakki itto!» yii. Hakkawoyintenni Maganu giira gordunni dirrite isonna mannasi ittu.

¹³ Moote sayikkimeeshshono mitto olu roorricha 50 manni ledo soyi. Kuni roorrichi gaaru aanira fule Eeliyaasi albaanni guluphe, «Maganu mancho! Anenna ledo'ya noo manna mararinke! Lubbonkeno gatisi!

¹⁴ Kuneeti 2 woloota olu roorroota ledonsa noo manni baalu ledo gordunni dirritino giira ittino; ane kayinni mararie!» yee eegami.

¹⁵ Hatte yannara Kaaliiqi sokkaasinchi Eeliyaasira, «Dirrite isi ledo ha'ri; waajjitooti!» yiisi. Eeliyaasino dirre roorrichu ledo mootenniwa mare,

¹⁶ «Kaaliiqi, ‹Israeelete Maganu nookkihu gede kiirte, Eqirooni magano Bielizebuuli xa'mahera manna soqqootto daafira, reyattota ikkinnina digatatto!› yiinohe» yee kulisi.

¹⁷ Akaaziyaasi Kaaliiqi Eeliyaasi widoonni qole coyi'rino garinni reyi. Akaaziyaasira labballi ooso noosikkihura, rodiisi Iyoraami isi darga moohi. Kuni ikkinohu Iyosaafiixi beetti Iyoraami Yihudaho moohihunni layinki dirooti.

¹⁸ Moote Akaaziyaasi assinohu wolu coyi baalu Israeelete mootoolla dhagge amadino maxaafi giddo borreessineenna no.