LAYINKI DUDUWO 4 - Qullaawa Maxaafa

QULLAAWU MINIRA IKKANNO UDUUNNE

¹ Moote Selemooni seendille 20 cigile, godowano 20 cigile, hojja 10 cigile ikkinoha kakkalote uduunnicho camotenni seekki.

² Qoleno hala'linye 10 cigile, hojja 5 cigile, baqo 30 cigile ikkitannota quuqqado Baaraho yinanni gawate camotenni seekki.

³ Gawatete gooro gudinse 2 dira assine anawarsine seekkinoonni. Cigile cigilete mereero 10 boottate suudi misilla seekkinoonni.

⁴ Gawate sase sase alba addi addi widira higge nootera 12 boottate misilla aana worroonni.

⁵ Gawatete du'milli mereeri qubbichi hojja geeshsha ikkanno. Goorosino suufu daraarcho labbanno. Gawateno 60,000 litire ikkanno waa amaddanno.

⁶ Qoleno 10 hayishshi'nanni gawate seekke 5 Qullaawu Minira wodiidoonni, 5 qole aliyyeenni wori. Tenne gawattara shilqote kakkalora gorrinanni saada maala hayishshinanni. Jawa gawatera noo wayi kayinni qeesootu hayishshidhannoho.

⁷ Selemooni hedino hedo garinni, 10 caabbicho worranniha culku uduunne seekkisiise Qullaawu Mini giddo 5 aliyyeenni 5 qole wodiidoonni worino.

⁸ Tonne xarapheezza seekkisiise Qullaawu Mini giddo 5 aliyyeenni, 5 qole wodiidoonni wori. Qoleno 100 gawate culkunni seekkisiisi.

⁹ Qeesootu ofoltannowa giddoonni nafarcho seekki. Qoleno jawa nafarcho seekkisiisi. Lamunku nafarchi mereero noo waalchuwa seekkisiise aanaho camo xallinanni gede assi.

¹⁰ Gawate Qullaawu Minira wodiidi soojjaati maddera worroonni.

¹¹ Qoleno gambayibba, baccenna gawatta seekkisiisi. Selemooni hasi'rino garinni Huraami loose gudinohu Maganu Mini loosi kunninni aane nooho:

¹² Lame mokkollo, mokkollote umira worrannire 2 guutonna 2 sissillinoonni cagaage,

¹³ lamenka dira seesiisate mokkollote guutora worroonnita 400 shaffo,

¹⁴ gawatta worrannire gawattante ledo,

¹⁵ jawa gawatenna ise dukkannore 12 boottate misilla,

¹⁶ gambayibba, buluulo hoollanni bacce, maalu qarabbanna woleno hakkonne lawanno uduunne baala seekkino. Huraami moote Selemoonira Qullaawu Minira ikkanno uduunne baala fiinoonni camonni seekkino.

¹⁷ Moote Selemoonino konne uduunne baala loosiisinohu Yordaanoosi Lagichira, Sukootinna Tsereda mereero doru suudinni camo daashshine seekkinanniwaati.

¹⁸ Seekkinoonni uduunni lowo geeshsha bati'rino daafira, mageeshshi camonni seekkinoonniro afinohu dino.

¹⁹ Selemooni Qullaawu Minira ikkanno uduunne baala culkunni seekkisiisino. Culkunni seekkinoonniha hixaana giirranniha kakkalote uduunnicho, Kaaliiqira fushshaate assine shiqinshanni tima worranni xarapheeyye,

²⁰ filu culkinni seekkinoonnihu caabbicho worranni uduunnichi, hendoonni garinni Qullaawu Minira albaanni xabbanno caabbiyye,

²¹ daraarchu suudi seesa, caabbiyye qansanni buudda, giira gamba assinanniri,

²² caabbicho xoyissinanniri, winxanni gawatta, hixaana giirranni baccinna giira haa'nanni bacci culkunni seekkinoonnireeti. Qullaawu Miniti gobbayidi cufannanna Giddoyiditi Qullaawu Holgi cufanna aanaho culka xallinoonnite.