LAWISHSHA 9 - Qullaawa Maxaafa

EGENNO JILTINO JILA

¹ Egenno minese mi'nitino. Miniserano 7 heelliicho uurrisidhino.

² Hardino booto gorrite, woyinete xajjeno worte, jila qixxeessitu.

³ Katamu tullichira uurre woshshanno gede meya soqqamaanose sokke,

⁴ «Egenno xe'inohu baalu anewa amo!» yitanno.

⁵ Wodanu nookkihano, «Amo qixxeessoomma sagale iti! Woroommata woyinete xajjeno agi!

⁶ Lubbotenni hee'rattona, hawanyootu ledo hosa aguri; wodanchate doogo higge ha'ri» yitanno.

⁷ Boonaleessa mancho seejjannohu xono adhanno; busha mancho rufannohura gawajjo iillitannosi.

⁸ Boonaleessa mancho rufittoro giwannohe; egennaamu seejjittosiro baxannohe.

⁹ Egennaamo rosiisittoro, egenno lexxanno; keeraancho mancho rosiisittoro, lede wodanchanno.

¹⁰ Kaaliiqa waajja egennote umoho. Qullaawa Magano egennittoro wodancha afi'ratto.

¹¹ Dirikki anenni bati'ranno; heeshshokki dirino lexxanno.

¹² Egenno heedhuhero, umokki kaa'litannohe; egenno giwittoro umikki qarramatto.

HAMBE JILTANNO JILA

¹³ Hambe cancaaleettete; wodaniweelote; mittoreno diegentinote.

¹⁴ Sammi yite nafara fitidhanno; katamu tullichira ofoltanno.

¹⁵ Hakkaanni hige sa"annohanna, sammi yee doogosi ha'rannoha woshshitanni,

¹⁶ «Egenno xe'inohehu baalu anewa amo!» yitanno.

¹⁷ Wodana afi'rinokkihano, «Moorre anganni wayinna moorre intanni sagale coommitanno» yitanno.

¹⁸ Hawanyu kayinni minisera marannohu baalu reyannotanna, jeennaate dirrannota diafino.