LAWISHSHA 8 - Qullaawa Maxaafa

EGENNO MANNA WOSHSHITANNO

¹ Macciishshe! Egenno woshshitanni noona; wodanchano coyidhanni noona.

² Doogote mule noo gaarraranna, doogga xaaddannowa baala uurritanno.

³ Katama e'nanni farora, xullicho baalaho qoonqose naggi assite woshshitanni,

⁴ «Manna, ki'newe woshshanni noomma; manna baalaho qoonqo'ya naggi asse coyi'reemma.

⁵ Ki'ne wodana shotu manni hayyo rosse; ki'ne hawanyootu egennaamma ikkate jawaatte.

⁶ Coyi'reemmahu danchu coyi noona macciishshe; afii'yanni suwashshu coyi fulanno.

⁷ Ani halaale coyi'reemma; kaphu afii'yanni difulanno.

⁸ Afii'yanni fulannori baalu halaaleho; shokkashshonna gara hawisanno coye arrawi'ya dicoyi'ranno.

⁹ Wodancha noo'neha ikkiro, ane coyi suwashshoho; egenno hasidhiniro, coyi'ya gara ikkinota affinanni.

¹⁰ Birrunni roore amaale'ya doodhe; filu culkinni roore egenno hasidhe.

¹¹ Ani egenno, dilqu kinchinni rooreemma, halchitinanniri giddo ane ledo taalannori mitturino dino.

¹² «Ani egenno, wodanchate ledo mitteenni hee'reemma; afanna buuxa anereeti.

¹³ Kaaliiqa waajja bunshe giwate; ani boo'nanna boollaqi'ra giweemma; bunshenna sarraanqanni coye dibaxeemma.

¹⁴ Malunna amaale anereeti; wodanchanna jawaante woxe'yaati.

¹⁵ Mootoolla anenni mookkanno; gashshaano halaalaancho seera fushshitannohuno anenniiti.

¹⁶ Halaalaano gashshaano baala, anenni gashshitanno.

¹⁷ Ani baxxannoere baxeemma; hasidhannoeri afidhannoe.

¹⁸ Durummanna ayirrinyu, geedote jironna qiniitu anewa no.

¹⁹ Ani eemma'neri, filu culkinninna daashshinoonni birrinni rooranno.

²⁰ Ane doogo keeraanchimmannite; ha'rumi'yano halaalunniho.

²¹ Baxxannoerira jiro eemmansa; minensa miinjunniha asseemma.

²² «Kaaliiqi baalunkura alba asse kalaqinoe; bi're wolere kalaqi waro ane umita assinoe.

²³ Kalqe kalaqantara albaanni, bi're hundanni seekkinoonnie.

²⁴ Baaru kalaqamara albaanni, wayi burqara balaxe ilamoomma.

²⁵ Ilaalla safantara albaanni, gaarrano kalaqantukkinni ilamoomma.

²⁶ Baattonna xawu kalaqamara albaanni, aanase noo bushshino hee'rara balaxe ilamoomma.

²⁷ Gordo dargasi diriirsi yannara, gordonna baatto xaadisi waro ledosi noomma.

²⁸ Gomicho gordoho uurrisi yannara, lowo baari burqannowa qixxeessi waro,

²⁹ noowiinni sa"annokki gede baaraho danna wori waro, baattote safo dhaawi yannara ani hakkiicho noomma.

³⁰ Hatte yannara, iso ogimma'yanni kaa'loomma; wo'manka woyite iso hagiirsiisanni, barru barrunkunni tashshi yaannae hee'roomma.

³¹ Isi kalaqino baattonni tashshi yiinoe; mannu sirchinnino hagiidhoomma.

³² «Xa ki'ne ooso'ya, macciishshe"e; seejjo'ya macciishshitannori baraadhinoreeti.

³³ Hajajo'ya macciishshe; lashshi assitinoontena, egennaamma ikke.

³⁴ Ani yeemmare macciishshannohu, barru baala waalchi'yara uurrannohunna, nafarchi'yara agadhannoehu ba'raa'rinoho.

³⁵ Ane afi'rannohu, heeshsho afi'ranno; Kaaliiqiwiinnino ayirrinye adhanno.

³⁶ Ane hooginohu umosi gawajjanno; ane giwannohuno reyo baxanno» yitanno.