LAWISHSHA 6 - Qullaawa Maxaafa

GOWWA IKKITOOTI

¹ «Beetto'ya ballo, olliichikkira waase ikkate umikki baxxe eittoro,

² yoottori qole woshshaado ikke amadinnohe.

³ Beetto'ya, olliichikki angara eitto geeshsha, waasinate aanikkinni hoolannohe gede eegami.

⁴ Hatto assittokkinni goxxooti; gaarakki gamba assidhooti.

⁵ Ugaaxaasinete anganni gatino bullichi gedenna, amaddannoriwiinni luxuphitino ceicho gede ikkite atino luxuphite fuli.

⁶ «Ati cee'maleessu hanni gooxaamunniwa mari; ikkitosi buuxxe la'e atino hayyoo'mi.

⁷ Gooxaamoho albisanno sooreessi woy gashshaanchu dinosi.

⁸ Ikkollana arro itannore duu'nanno; gide gudhinanni yannara sagale gamba assi'ranno.

⁹ Ati cee'maleessu mamooti geeshsha goxattoyya? Goxoottowiinni mamoote ka"atto?

¹⁰ ‹Shiima geeshsha goxeemmo; shiima yanna liphi asseemmo; shiima geeshsha anga gamba assi're fooliishshi'reemmo› yaatto.

¹¹ Hatto ikkite heedheenna buxima addi-fulu gede, hoongu bagado amaxxino manchi gede hedeweelcho daannohe.

¹² «Bushunna tafaafuru manni, kapho coyi'ranni doyanno.

¹³ Ate dogate albunni qiphi assitanni, lekkatenni baatto kaddanni qubbicho mirmirsitanno.

¹⁴ Wodaninsanni busha maltannori, martuwa baala gibbo wixxanno.

¹⁵ Kunninni kainohunni hedeweelcho bao daggannonsa; hurtannokki mada madidhanno.

¹⁶ «Kaaliiqi tiyyi're giwannohu lamalu coye no. Hakkuno:

¹⁷ Boonaleette illeeti, kaphaancho arrawooti, keeraancho manna shitanno angaati,

¹⁸ busha malanno wodanaati, bunshete rakkanno lekkaati,

¹⁹ kaphu aana kapho leddanno naqaashsheetinna roduuwu mereero gibbo wixannoreeti.

FOORRETEWIINNI FAFA

²⁰ «Beetto'ya ballo, annikki hajajo ayirrisi; amakki rosiissinohereno habbooti.

²¹ Wo'manka woyite wodanikkira wodhi; goowikkirano usudhi.

²² Ha'rattowa baala leellishshannohe; goxatto yannarano agartannohe; baqqi yaatto woyiteno amaaltannohe.

²³ Hajajonsa caabbichoho; rosiishshinsano xawaabbaho; seejjonsano hee'ratto gara kultannohe.

²⁴ Busha manchowiinni fafatto gede assitannohe; arrawunni dogganno mancho wolunnitewiinni gatissannohe.

²⁵ Xummese halchitooti; illese qipheessinni qeelantooti.

²⁶ Foora mancho mitto hurbaate tayisse adhitannohe; wolu galte kayinni noohere baala gudisse adhitannohe.

²⁷ Imaanisi giiramikkinni giira angatenni hanqafe ha'rannohu nooni?

²⁸ Lekkasi giirantukkinni kashilo kaxxe sa"annohu nooni?

²⁹ Manni galte ledo goxannohuno hattooti; hattoo manchi qorichishamikkinni digatanno.

³⁰ Mooraanchu hudi're sagale mooriro, mannu dimishannosi.

³¹ Amadamiro 7 anga lede baatanno; afi'rinore baala tayise aanno.

³² Fooranno manchi kayinni wodana diafi'rino. Hattoo manchi umosi hunanno.

³³ Shollinyunna ganama iillitannosi; saalu aanisinni diho'lanno.

³⁴ Galtesira hamashshaawino manchi hanqanno; mararro nookkiha rabbisi'ranno.

³⁵ Murroonnisi murono adhara dihasi'ranno; aye geeshshi afanshino hanqosi diqiissanno.