LAWISHSHA 4 - Qullaawa Maxaafa

ANNU EGENNOTE DAAFIRA AANNO SEEJJO

¹ Ooso'ya ballo, ane anni'ne seejjo macciishshe: huwanyoote afidhinanni gede diinaggaabbe.

² Ani rosiiseemmo'ne rosi danchahona, habbinoonte.

³ Anino shiimu noommo waro anni'ya mine hee'reemmo; ama'yano lowo geeshsha baxxannoe.

⁴ Hatte yannara anni'ya, «Lubbotenni hee'rattona, kuloommohere baala wodanaho wodhi; hajajo'yano agadhi.

⁵ Egenno afi'ri; wodancha cu'mi'ri; kuloommohere habbooti; agurtooti.

⁶ Agartannohena, egenno lashshi assitooti; baxise; iseno keere uyitannohe.

⁷ Egenno wo'munku coyira aliidita ikkitino daafira, ise afi'rate jawaati; noohere baala uyittorono wodancha woxekki assi'ri.

⁸ Egenno ayirrisi; iseno qolte ayirrinye uyitannohe; seekkite cu'mi'ri; iseno ayirrissannohe.

⁹ Daraarotenni seekkinoonnita ayirrinyu ba'latto ikkitannohe yaanni rosiisinoe» yii.

¹⁰ Rosiisaanchu lede, «Beetto'ya ballo, dirikkino seedannona macciishshie; kuleemmohereno seekkite wodanchi.

¹¹ Egenno rosiisoommohe; suwashsho doogono leellishoommohe.

¹² Ha'ratto farora ittisannoheri dihee'ranno; dodatto woyiteno digufi'ratto.

¹³ Seejjo seekkite cu'mi'ri; facci assite agurtooti; heeshshokkiitina seekkite agadhi.

¹⁴ Bushuullu hadhanno doogo higge hadhooti; bushu manni ikkanno gede ikkitooti.

¹⁵ Hakkaanni higge horonta hadhooti; hattenne faro xooqqe, umikki doogo amadde ha'ri.

¹⁶ Bushuullu bunshe assitukkinni difooliishshidhanno; manna gawajjitukkinni goxano diamaddannonsa.

¹⁷ Cubbu sagale ittanno; barshu agatto agganno.

¹⁸ «Keeraanote doogo, soodo arrishsho gedeete; barri taalooti geeshsha lexxitanni hadhanno.

¹⁹ Bushu manni doogo kayinni beebbu tunsichi gedeete; sarraaqe tugannonsareno diaffanno.

²⁰ «Beetto'ya ballo, kuleemmohere wodanchite macciishshi; coyi'reemmoreno huwati.

²¹ Mulikkinni fafisidhooti; wodanikkira wodhi.

²² Coyi'ya adhitannorira heeshsho ikkannonsa; mannimma baalate fayyimma aannonsa.

²³ Wodanu heeshshote buichootina, wo'munkurinni roorsite iso agadhi.

²⁴ Afiikkinni sarraaqo coyidhooti; suumekkinni busha coye hoo'li.

²⁵ Illekki dhaabbe la'o; albano shawwu yitooti.

²⁶ Assattore buuxxe afittoro, loosattori gara ikkannohe.

²⁷ Guranna qiniite yiittokkinni lekkakki bunshetewiinni agadhite qaafi.