LAWISHSHA 30 - Qullaawa Maxaafa

AGUURI COYI'RINO COYE

¹ Maasa gobba manchi Yaaqe beetti Aguuri, kunninni aane noo coye coyi'rino: Mittu manchi Maganunniwa hige, «Ani horonta qeelamoommo; hiitto ikke hee'reemmo?

² Mannimmatewiinni fule saadate gedeeha ikkoommo; mannaho noo wodanano diafi'roommo.

³ Anera egenno dinoe; Qullaawu Maganire mittoreno diafoommo.

⁴ Iimira gordo mare dayinohu ayeti? Bubbe angatenni cu'minohu ayeti? Waa uddanosinni xaaxe amadannohu ayeti? Baattote danna worinohu ayeti? Afoottoha ikkiro, su'misi ayeti? Beettisi su'mino ayeti?

⁵ «Kaaliiqi uyino hexxo wonshanno; irkidhannosirira isi wonqonsaati.

⁶ Rufannohekki gedenna kaphaanchoho yaannohekki gede, isi yiinokkire yitooti.

⁷ «Magano, reyammora albaanni, atewiinni 2 coye hasi'reemmona wonshie.

⁸ Dogatenninna kapho coyi'ratenni gatisie; hasiissanno sagale uyie; kayinnilla buxicho woy dureessa assitootie.

⁹ Duuwummoro, ate haweemmo; buxummoro mooraancho ikke, ate Magani'ya su'ma xonsiiseemmo» yee woxaratino.

¹⁰ Rumannohehanna qarra abbannoheha ikkannona, soqqamaancho mootichisi albaanni bushiishshooti.

¹¹ Annansa runtannorinna, amansano naaddannokki ilama no.

¹² Lowo geeshsha battaabbe heedhe, insanaa keeraano assite kiirtannori no.

¹³ Boo'natenni ufuufante, manna mishshannori no.

¹⁴ Hinko bisete gedeeri, kelta billawu gedeerinna, buxanenna gadadaamma marartannokkiha miiccannori no.

¹⁵ Ulaaullete, «Uyie, uyie» yaannori, lame seenni noose. Hattonni, ikkinonke yaannokkiri shoolurichi no.

¹⁶ Insano, jeennaateho, gaana manchooti, waa goodhe heedhanno baattootinna xo'annokki giiraati.

¹⁷ Annasi arrassannohanna amasi mishannoha, illesi haraqeeyye kurkurtanno; maalasino allaatte ittanno.

¹⁸ Lowo geeshsha maala'linannihu, shoolu coyi no.

¹⁹ Insano, iima allamurchu buuwanno garaati, hamashshu kinchu aana ha'ranno garaati, markaawe baaru aanaanni hadhanno garaatinna, meyatinna labbaahu baxillunni xaadanno garaati.

²⁰ Foortuhu gedensaanni isenee xaphi assidhe, «Mitte bunsheno diassoomma» yitanno manchono hattoote.

²¹ Baatto duqqa dundiitinokkihu, shoolu coyi no.

²² Hakkuno, borojjichu moohaati, gowwu manchi duuwaati,

²³ gimboonni mancho galte afi'ratenna, meya borojjicho mootittese ragi'rate.

²⁴ Baattote aana busulletenni egennaminori, shoolu shiimmaaddu kalaqami no:

²⁵ Gooxaamu wolqa diafi'rinoho; ikkollana, sagalesi arro gamba assi'ranno.

²⁶ Weceece jawaata di"ikkitino; ikkollana, heedhannohu kinnate giddooti.

²⁷ Kanchafaru moote diafi'rino; ikkollana, baalunku amanyaatunni ha'ranno.

²⁸ Danda'le angatenni amandanni; mootete mine nafa heedhanno.

²⁹ Danchu garinni qaafannori, shoolu kalaqami no.

³⁰ Insano, wolqa saada baalanta roorinohu, ayeno waajje badhera xooqannokki doobbiichooti,

³¹ meichu gocooti, qa'naafanni ha'ranno kormaatinna, gosasi albaanni hawaqi're qaafanno mooteeti.

³² Giwwimmakki naaxxaleessa assituheronna, bunshe malattoha ikkittoro, hanni galfatte ka'e, shiima geeshsha hedi.

³³ Ado shanfiro buuro fulanno; sano ganniro sananno fultanno; hattonni, hanqo kakkayisa gibbo abbitanno.