LAWISHSHA 3 - Qullaawa Maxaafa

KAALIIQA CALLA ADDAXXI

¹ Rosiisaanchu, «Beetto'ya ballo, rosiiseemmohere habbooti; hajajo'yano wodanikkira wodhi.

² Rosiishshi'yanna hajajo'ya diro seedissannohe; qawaaxxaamono assitannohe.

³ Halaalaanchimmanna ammanama mulinni faffoonkehe; insano goowikkira wodhi; wodanikkira borreessi'ri.

⁴ Hatto assittoro, Maganunna mannu albaanni ayirrinyenna baxille afi'ratto.

⁵ «Wo'mu wodanikkinni Kaaliiqa addaxxi ikkinnina, umikki egennora irkidhooti.

⁶ Assattorira baalaho Magano albaanni qo'li; isino halaalaancho doogo kulannohe.

⁷ ‹Ani egennaamoho› yitooti. Kaaliiqa waajji; bunshetewiinnino xooqi.

⁸ Hatto ikkittoro, manninatikki fayyimma afi'ranno; atino jawaatatto.

⁹ Jirokki aaninninna baattokkiha umi laalcho baala fushshaate assite aatenni Kaaliiqa ayirrisi.

¹⁰ Hatto assittoro, gootarrakkira gidu wo'manno; haaro woyinete xajjekki kooffichuwate wo'mite safarantanno.

¹¹ «Beetto'ya ballo, Kaaliiqi seejjo mishshooti; seejjannohe yannarano caaccaabbooti.

¹² Annu baxanno beetto seejjannonte gede, Kaaliiqino baxannonsare seejjannonsa.

¹³ «Egenno afi'rannohunna buuxa lexxannohu ba'raa'rinoho.

¹⁴ Woxe egenno roortino; culka lexxantenni, egenno lexxa woyyitanno.

¹⁵ Egenno dilqu kinchinni roortanno; egennote ledo taashshinanniri mitturi nafa dino.

¹⁶ Egenno diro seedissanno; jironna ayirrinyeno leddanno.

¹⁷ Heeshshokkira hagiirrenna keere wonshitanno.

¹⁸ Egenno heeshsho uyitanno; ise cu'mi'rinohu ba'raa'rinoho.

¹⁹ «Kaaliiqi egennosinni baatto kalaqino; afasinni gordo mitto darga uurrisino.

²⁰ Isi egennonni baaru beehamino; gomichuno xeena lolaasino.

²¹ «Beetto'ya ballo, egennonna wodancha seekkite cu'mi'ri; mulikkinni fafisidhooti.

²² Kuri hee'rihero, heeshshokki seedanna biiffinota ikkitanno.

²³ Ha'ratto doogono keere ikkitanno; horonta digufi'ratto.

²⁴ Goxatto yannarano diwaajjatto; goxichikkino coomminoha ikkanno.

²⁵ Hedeweelcho balanna bushuullu aana dagganno dano amaddannoe yite diyaadatto.

²⁶ Kaaliiqa hawaqi'ratto; isino lekkakki woshshaadotewiinni agarannohe.

²⁷ «Kaa'lattonsara hasidhannorira, dandaattore assinsa.

²⁸ Qarraminoha olliichokki techonni kaa'la dandiitanni heedhenni, ga'ara yitanni daafursitootisi.

²⁹ Addaxxe ledokki hee'ranno olliichokki xagarate heddooti.

³⁰ Mittore assinihekkinni beebbatenni mannu ledo giwantooti.

³¹ Beebba assanno mancho hinaassooti; isi ha'rannota busha doogo hadhooti.

³² Kaaliiqi busha assitannore giwanno. Suwashshu wodanirira kayinni wodanisire kulanno.

³³ Kaaliiqi bushu manni minira rumo abbanno. Keeraanote mine kayinni maassi'ranno.

³⁴ Isi boonaleeyye arrassanno. Jooguulle kayinni mararanno.

³⁵ Egennaammu ayirrinye ragidhanno. Hawanyootu kayinni shollinye duu'nitanno» yii.