LAWISHSHA 29 - Qullaawa Maxaafa

¹ Batinye hinge seejjineenna, mokkookke higa giwannohu, hurannokki gede ikke hedeweelcho hiiqqamanno.

² Keeraano gashshitanno yannara, mannu hagiidhanno; bushuullu gashshitanno yannara kayinni, mannu dadillanno.

³ Egenno baxanno beetti anna hagiirsiisanno; fooru meenti hoode ha'rannohu kayinni, jirosi billaallisanno.

⁴ Taashshe gashshanno moote gobba geisanno; woxe baxannoha ikkiro kayinni diiganno.

⁵ Jaalasi afuunni dogannohu, lekkasira woshshaado wodhanno.

⁶ Bushu manchi loosino cubbinni amadamanno; keeraanchu kayinni hagiidhanni faarsanno.

⁷ Keeraanchu manchi buxanete daafira coyi'ramanno; bushu manchi kayinni hattoore diegennino.

⁸ Haariimaasine katamaho lowo qarra kalaqqanno; egennaammu kayinni hanqo qiissitanno.

⁹ Egennaamu manchi gowwu ledo coye yoote shiqishi'riro, gowwu hanqanni oso'lanno; sammino diyaanno.

¹⁰ Manna shitannori, fayyaaleessa mancho gibbanno; keeraancho manchono shitara hasidhanno.

¹¹ Gowwu manchi hanqosi gudise leellishanno; egennaamu kayinni aarasi cincatenni sayisanno.

¹² Gashshaanchu kaphu coye macciishshannoha ikkiro, isira woroonni gashshitinori baalu bushuulle ikkitanno.

¹³ Buxichonna buxicho gadadisannoha, Kaaliiqi taashshe kalaqino.

¹⁴ Moote buxane taashshe la"annoha ikkiro, gashshootisi seeda diro hee'ranno.

¹⁵ Ooso gananna seejja egennaamma assitanno; seejjo bainohu kayinni amasi saalfachishanno.

¹⁶ Bushuullu gashshituro cubbu bati'ranno; mitto barra kayinni keeraano hakkuri ubbanna illensanni la'anno.

¹⁷ Oosokki seejjite lossittoro, fooliishsho afi'ratto; insano wodanakki tashshi assitanno.

¹⁸ Ajuuja afi'rinokki manni ragimaleho; Maganu seera agadhannohu kayinni ba'raa'rinoho.

¹⁹ Yoottore macciishshiro nafa dihajajamannohena, soqqamaanchokki afuu callunni seejjitooti.

²⁰ Hedikkinni muddame coyi'ranno manchinni, gowwu manchira roore hexxo noosi.

²¹ Soqqamaanchikkira anjenni kayisse hasi'rinore baala uyittoro, gedensaanni noohere baala gudise adhara hasi'ranno.

²² Hanqaaleessu manchi gibbo kayisanno; aaramanno manchi sao batisanno.

²³ Boonaleessu manchi shollanno; umosi heeshshi assannohu kayinni ayirranno.

²⁴ Lubbosi cee'minohu, mooraanchu ledo hosanno; yoote alba xa'mineenna ammanirono, qorichishamanno; halaale coyi'ra hoogiro kayinni, Maganu qorichishannosi.

²⁵ Manna waajjannohu woshshaado eanno; Kaaliiqa addaxxannohu kayinni keere afi'ranno.

²⁶ Lowo manni gashshaanchu yaannore agadhanno; taashshannohu kayinni Kaaliiqa callaati.

²⁷ Suwashshu manni shokkashsho manna dibaxanno; shokkashshu mannino suwashsho giwanno.