LAWISHSHA 28 - Qullaawa Maxaafa

¹ Bushu manchi shorrinikkinni xooqanno; keeraanchu kayinni doobbiichu gede bashshi assikkinni hee'ranno.

² Mannu bushiro gashshaano dikeeshshitanno; egennaammunna wodancha afidhino gashshaano kayinni, gobba noowa geissanno.

³ Buxane gadadisanno gashshaanchi, gide huntanno barada gedeeho.

⁴ Seera ayirrisannokki manchi busha manna galatanno; seera agadhannohu kayinni busha giwanno.

⁵ Bushu manni halaalu maatiro diegennino; Kaaliiqa hasidhannori kayinni seekkite egentino.

⁶ Yawaawulu dureessinni, ammanamino buxichi woyyate.

⁷ Seera agadhanno beetti egennaamoho; tafaafurrootu ledo hosannohu kayinni annasi saalfachishanno.

⁸ Qallotenninna hanaaqunni jiro gamba assi'rannohu, buxane mararannohura qixxeessanno.

⁹ Seerasi ayirrisannokki manchi huuccatto, Maganoho battete.

¹⁰ Suwadda busha doogo qole haa're ha'rannohu, isi umisi umino balera uwanno; keeraanchoho kayinni geedo seekkannosi.

¹¹ Dureessu umosi egennaamo asse kiiranno; wodancha afi'rino buxichi kayinni isi ayimma xunse egennino.

¹² Keeraano qeeltanno yannara, lowo geeshsha hagiidhinanni. Bushuullu roorre afidhanno yannara, kayinni mannu maaxamanno.

¹³ Cubbosi maaxannohu dilatanno; aagintaawannohunna agurannohu kayinni maaro afi'ranno.

¹⁴ Wo'ma woyite Kaaliiqa waajjanno manchi ba'raa'rinoho; wodanasi kaajjishannohu kayinni bushawa uwanno.

¹⁵ Buxane gadadisannohu bushu gashshaanchi, ittananno doobbiichinna kubbe amadanno dagunchi gedeeho.

¹⁶ Wodancha xe'ino gashshaanchi mararro diegennino; hanaaqo giwannohu kayinni lowo diro hee'ranno.

¹⁷ Manna shiinohu, reya geeshsha bararraaqanni hee'ranno; ayino kaa'loonkesi.

¹⁸ Sumbetenni hee'rannohu gatanno; shokkado doogo ha'rannohu kayinni balete uwanno.

¹⁹ Baatto loosi'rannohu sagale duuwanno; mullawa hossannori hoode ha'rannohu kayinni buxanno.

²⁰ Ammanamino manchi lowo maasso afi'ranno; jirote muddamannohu kayinni, qorichishamikkinni digatanno.

²¹ Godowa hosa dancha di"ikkitanno; mitu kayinni shiima sagalera halaale dawisanno.

²² Hafuuraamu manchi jirotella hagaaganno; buxima daggannosita diegennino.

²³ Arrawunni coommishamannohunni roore, seejjannohu gedensaanni baxille afi'ranno.

²⁴ Annanna ama moore, «Cubbo di"ikkino» yaannohu, mulqi'rannohu ledo mittoho.

²⁵ Hafuuraamu manchi gibbo kalaqanno; Kaaliiqa addaxxannohu kayinni duuwanno.

²⁶ Umosi addaxxannohu gowwaho; egennaamu kayinni gatanno.

²⁷ Buxichoho aannohu dihooganno; alba shawwu yee sa"annohu kayinni rumamanno.

²⁸ Bushuullu gashshoote amaddanno yannara, mannu maaxamanno. Insa ba'anno yannara kayinni, keeraano hala'litanno.