LAWISHSHA 27 - Qullaawa Maxaafa

¹ Barru maa abbannoro diafoottona, ga'a daafira adawadhitooti.

² Ati atenee jaccantenni wolu jajihero woyyate; afiikki naadahentenni wolu naadihero woyyate.

³ Gowwu kalaqanno qarri, kinchunninna shaafunni roore ayirranno.

⁴ Hanqunna aaru mararro diafi'rino; hinaasu kayinni hakkiinni baasanno.

⁵ Xawo fulinokki baxillinni, faajjete rufa woyyate.

⁶ Marmarame sunqihero nafa qahokki amma'nitooti; madiissirono jaalu woyyanno.

⁷ Duuwinoha malawu giwisannosi; hudi'rinohura kayinni qaraarinori nafa coommannosi.

⁸ Dargasi agure ha'ranno manchi, minese agurte buubbanno ceicho gedeeho.

⁹ Buurunna su'naru wodana tashshi assanno; danchu manchi amaaleno hatto hagiirsiissanno.

¹⁰ Jaalakkinna annikki jaala agurtooti; xeertote noo rodiinni, mule noo olliichi woyyatena, qarramatto barra rodiikki minira hadhooti.

¹¹ Beetto'ya, xontannoerira dawaro qola dandeemmo gede, egennaamo ikki; aneno hagiirsiisie.

¹² Egennaamu manchi bushare afiro maaxamanno; hawanyu kayinni e"e qarramanno.

¹³ Egenninokkihura waase ikkanno manchira, imaanisi amadamanno; wosinchoho waase ikkannohura jajjisi adhamanno.

¹⁴ Gute kae qoonqosi naggi asse olliichosi keere haa'rannohu, rumannohu gede kiiramanno.

¹⁵ Coyi'rammitte manchonna, xissanno mini mittoho.

¹⁶ Diilallo uurrinse, zayiteno cu'mine anfannikkinte gede, coyi'rammitte manchono hoolle didandiinanni.

¹⁷ Siwiilu siwiila gamaxannonte gede, mannuno manna gamaxanno.

¹⁸ Laaltanno haqqicho agadhannohu gumase itanno; mootichasi agadhannohuno ayirranno.

¹⁹ Wayi hincilaallote gede ikke alba leellishannonte gede, mannu akatino wodanisi giddo leellanno.

²⁰ Reyonna waamma, «Duuwoomma» yitannokkinte gede, mannuno halcho, «Ikkitinoe» diyaanno.

²¹ Birranna culka giiratenni fonqolle la'nanninte gede, mannu ewelumma bande anfannihuno, isi daafira wolootu dudubbanno duduwinniiti.

²² Gowwa gidu gede uduluumaho worre udullirono, gowwimmasi aanisinni diho'ltanno.

²³ Ge'reewikki dana badde afi; saadakkino ille aanaho worte towati.

²⁴ Jiro hegerera diheedhanno; ayirrinyuno ilamate ilama geeshsha di"iillanno.

²⁵ Moola hayisso midde hoolteenna haaro hayisso mudhuro, ilaalu aana noota shaqqado hayissono gamba assi'ratto.

²⁶ Ge'reewu ordanni imaana ga'natto; meunnino baatto hidhatto.

²⁷ Meu ado ateranna maatekkira sagale ikkitanno; minekki soqqamannorirano iillitanno.