LAWISHSHA 26 - Qullaawa Maxaafa

¹ Arri kaadenna, gide gamba assi'nanni yanna xeeni gede, gowwaho uyinanni ayirrinyi dibiifanno.

² Ka'anna kawa buubbanno cea gawajjitannokkinte gede, beebbatenni rummanni rumo assitannori dino.

³ Liche faradoho, bixaalu gaangootaho hasiisannonte gede, gowwu badherano siqqo maltino.

⁴ Isi gede ikkattona, gowwaho agadhino garinni qoltooti.

⁵ Hedosi gede ikkinokkita afanno gede, xa'mosira gowwa dawaro qoli.

⁶ Gowwaho sokka soqqa, meessi lekka mudhate, woy shaannore agate ledo mittete.

⁷ Gowwootu maammaashshi, naaffe rarra'ino lekka gedeeho.

⁸ Gowwaho ayirrinye aa, corqaayyete aana usurroonni kinchi gedeeti.

⁹ Gowwu maammaahanno maammaashshi, dimbaanchu anga noo utichi gedeeho.

¹⁰ Doogo sa"anni noo gowwa, woy dimbaancho loosoho wodhannohu, leelliha baala qase madiissanno manchi gedeeho.

¹¹ Gowwimmasira marro higannohu, tufosi qole itanno woshichi gedeeho.

¹² Umosi egennaamo asse kiiranno manchinni roore, gowwu manchira hexxo noosi.

¹³ Cee'maleessu manchi, «Doogote doobbiichu no; lowo doogorano doobbiwu no» yee mininni difulanno.

¹⁴ Cufanu tanqu mereero hosannonte gede, cee'maleessuno ma'nasira gangalatanni hosanno.

¹⁵ Cee'maleessaho xilteho worino anga fushshe, afooho massi'ra nafa daafuroho.

¹⁶ Cee'maleessaho, afinore coyi'rannohu lamalu manninni roore, isi woyyannoha lawannosi.

¹⁷ Mulla kae manni coyira eannohu, doogo ha'ranni noo woshicho macca amadinohu ledo mittoho.

^18-19 «Haariimannilla noommo» yaanni olliichosi dogannohu, bagado godo'lanno macharaaraami gedeeho.

²⁰ Haqqe gooffuro giira xo'annonte gede, hemaanchu nookkiwa gibbo diheedhanno.

²¹ Cilaatte kashilo, haqqe giira kalaqqannonte gede, hanqaaleessu manchi gibbo halashshanno.

²² Heme sagalete gede, kushshi yite coo'mitanno.

²³ Giddo bunshe amade hee're suumetenni dogannohu, birra aanaho xallinoonni midaano gedeeho.

²⁴ Wodanunni gudise baxannokkihu, goowi alita suumetenni doganno.

²⁵ Wodanisira batte wo'mitinona, shaqqadu arrawinni coyi'reennahe amma'ntootisi.

²⁶ Xagarro giddo maaxi'riro, bunshesi songote albaanni reqecci yitanno.

²⁷ Woleho bale umannohu, u'minotera isinni umanno; wolu aanira kincho gongo'mishannohura, kinchu aanaho jigannosi.

²⁸ Mannu giwannohura nookkire coyi'ranno; ikkollana, manna beebbatenni bokkeessa bao abbitanno.