LAWISHSHA 24 - Qullaawa Maxaafa

-19-

¹ Busha manna hinaassooti; ledonsa hosateno halchitooti.

² Wodaninsanni wole gawajjate heddanno; coyidhanno coyi baalu xagarrote.

-20-

³ Mine hayyotenni minnanni; ogimmatenni uurrinsanni.

⁴ Egenno heedhuro, wolambinaatu uduunninna jiro mine wo'mitanno.

-21-

⁵ Wolqaataamo ikkantenni egennaamo ikka woyyate; wolqa egenno roortanno.

⁶ Olaho fulate albaanni amaalama hasiisanno; lowo mali hee'riro qeelle afi'nanni.

-22-

⁷ Gowwaho egenno xeertidhe no; danchare hasaambanni woyiteno yee afannori dino.

-23-

⁸ Bunshe malannoha, xagaraamoho yinanni.

⁹ Hawanyu malanno mali cubbo callaho; haariimaancho mannu baalu giwanno.

-24-

¹⁰ Qarru barra wolqiweelittoro, jawaatte diafatto.

-25-

¹¹ Reyote widira bobbahanno manna gatisi; gorramate hadhanni noore gargari.

¹² «Ani diafoommo» yiittoro, wodana la"anno Magani diafanno? La"anni noohehu diegennino? Mannaho loosisi garinni aannohu di"isooti?

-26-

¹³ Beetto'ya, malawu danchahona iti; malawu leono coommitannote.

¹⁴ Egennono lubbokkira hattootena afi; ise afi'rittoro geedo biiffannohe; hexxokkino diba'anno.

-27-

¹⁵ Bushu manchi gede keeraanchu mine duggooti; galannowano diiggooti.

¹⁶ Keeraanchu 7 hige uwiro nafa ka"anno; bushu kayinni baote aana uwanno.

-28-

¹⁷ Baarigaarikki qarrameenna hagiidhitooti; gufi'ranno woyiteno tashshi yoonkehe.

¹⁸ Kaaliiqi konne coye dibaxanno; baarigaarikki aaninnino hanqosi hoolanno.

-29-

¹⁹ Bushu manni ikkito la'e aarantooti; insa la'eno hinaassooti.

²⁰ Bushu geedo diafi'rino; caabbichisino xoanno.

-30-

²¹ Beetto'ya, Kaaliiqa waajji; mooteno ayirrisi; insara hajajantannokkiri ledono sumuu yitooti.

²² Hattoo manni hedeweelcho ba"anno; Maganu woy moote abbitanno qarra afinohu dinona.

WOLE LENDOONNIHA EGENNOTE MAAMMAASHSHA

²³ Aane noo maammaashshino egennaammu coyidhinoho. Yoo yaatto woyite, godowa hossooti.

²⁴ Busha, «Ati keeraanchoho» yaannoha, mannu rumannosi; gosano gibbannosi.

²⁵ Busha rufannohu kayinni, hagiirre afi'ranno; dancha maassono hoode hadhannosi.

²⁶ Suwashsho dawaro qola, baxillu malaateeti.

²⁷ Gobbayidire balaxxe biddi assi'ri; gatikki loosono guxxi; hakkunni gedensaanni mine mi'ni.

²⁸ Jaalikki aana beebbatenni naqqassooti; arrawikkinni doggooti.

²⁹ «Assinoeta asse qo'leemmo; rabba'yano qo'leemmo» yitooti.

³⁰ Cee'maleessu manchi gateenni hige saoommo; jallaagu manchi kaashshi widoonni hige ha'roommo.

³¹ Baalankare utu amade no; baattono ishinu egemme no; huxxuno diigame baino.

³² Anino konne coye heeshshi gotti asse lae, umi'yara seejjo adhoommo.

³³ Shiima geeshsha goxi; shiima yanna liphi assi; shiima geeshsha anga gamba assidhe fooliishshi'ri.

³⁴ Hatto ikkite heedheenna buxima mulqi'rannohu gede, hoongu bagado amaxxino manchi gede hedeweelcho daannohe.