LAWISHSHA 22 - Qullaawa Maxaafa

¹ Lowo jironni danchu su'mi woyyanno; ayirrinyuno birrunninna culkunni rooranno.

² Buxichono dureessano kalaqinohu Kaaliiqa ikkinohura, isi albaanni lamunku taaloho.

³ Egennaamu manchi bushare afiro maaxamanno; hawanyu kayinni e"e qarramanno.

⁴ Umo heeshshi assanna Kaaliiqa waajja, jirote, ayirrinyehonna heeshshote.

⁵ Shokkashshu manchi doogora, utunna woshshaado no; umosi agadhannohu kayinni hakkiinni xooqanno.

⁶ Oosote heedhanno gara rosiinsiro, lophite nafa hattenne dihabbanno.

⁷ Dureessu buxane gashshanno; liqii'rannohu liqiissannohura borojjicho ikkanno.

⁸ Bunshe wixannohu qarra mixxanno; woloota assi'ranno beebba diagurtannosi.

⁹ Sagalesi buxichoho beehanno daafira, shooshaqu manchi maassamanno.

¹⁰ Haariimaancho giddonni fushshiniro, yekkeerama diheedhanno; gibbonna xonono uurritanno.

¹¹ Keeraanchu wodanihunna shaqqadu arrawihu, mootete jaala ikkanno.

¹² Kaaliiqi egenno seekke la"anno; yawaawulu qaale kayinni diiganno.

¹³ Cee'maleessu, «Gobba doobbiichu noona, mininni fulummoro itannoe» yaanno.

¹⁴ Foora mancho afii diime baleeti; Kaaliiqi hanqinohu hakko mare uwanno.

¹⁵ Oosote wodanira hambe heedhanno; seejjo kayinni hambe giddonsanni fushshite huntanno.

¹⁶ Jiro umisira lexxaranna, dureessaho aara yee buxicho gadadisannohu, isi umisi buximate aana uwanno.

SAJJOO EGENNOTE MASALO

¹⁷ Maccakki kawa qolte egennaamu coyi'rannore macciishshi; wodanakkino egenno'ya widira qoli.

¹⁸ Giddokki wodhite maaxi'rittoro, qaagittoronna coyi'rittoro hagiirsiissannohe.

¹⁹ Kaaliiqa addaxxatto gede, xa konne coye atera egensiiseemmohe.

²⁰ Kuneeti sajjoo maammaashsha borreessoommohe; kurino egennonna dancha seejjo giddo amaddinoreeti.

²¹ Halaalu maatiro rosiissannohe; soyinohehurano halaalaancho dawaro abba dandaatto.

-1-

²² Noonsari dinooreetina buxanenniha ittooti; gadadaamma yoote darga xiibbooti.

²³ Kaaliiqi insara coyi'ramannonsa; gadadissannonsareno gadadisanno.

-2-

²⁴ Hanqaaleessu manchi ledo jaaloontooti; aaramino manchi ledono hadhooti.

²⁵ Hatto ikkittoro, isi ikkanno gari rosame, giddonni ho'la giwannohe.

-3-

²⁶ Wolu adhino asalira waase ikkite, umokki woshshaadote giddora eessidhooti.

²⁷ Aattore hoogittoro, goxatto daallasa nafa adhitannohe.

-4-

²⁸ Annuwakki wortinoha albi danna xiibbooti.

-5-

²⁹ Jawaata loosaasincho egennootto? Isi shollaataammu manni albaanni ikkikkinni, mootoollate albaanni uurranno.