KIIRO 9 - Qullaawa Maxaafa

LAYINKIHA MARARROTE AYYAANA

¹ Gibitsete gobbanni fultuhunni layinki diro, umi aganira Siina Halallittera Kaaliiqi Musera,

^2-3 «Israeelete manni kuni agani eihunni tonaa shoolki barra hawarro arrishshote eora kulloonni seeri garinni Mararrote Ayyaana ayirrisona» yii.

⁴ Museno Israeelete mannira Mararrote Ayyaana ayirrisanno gede kuli.

⁵ Umi aganira tonaa shoolki barra hawarro Siina Halallittera Mararrote Ayyaana ayirrissu. Mannuno Kaaliiqi Muse widoonni qole hajajinore baala wonshi.

⁶ Reeshsha amadino manni kayinni konne barra Mararrote Ayyaana ayirrisara didandiino. Kunnira hakko barranni Musewanna Aarooniwa shiqqi yee,

⁷ «Ninke reeshsha amande battaamboommo; ikkirono wolootuwiinni baxxine Kaaliiqira fushshaate uyineemmota mayira hoollanninke?» yitu.

⁸ Museno daware, «Kaaliiqi yaannore afammo geeshsha agarre» yiinsa.

⁹ Kaaliiqi Musera,

¹⁰ «Israeelete mannira, ‹Ki'nenna ilama'ne giddonni ayino reeshsha kisino daafira lagaawironna xeerto gobba ha'rara kairo Mararrote Ayyaana ayirrisa dandaanno.

¹¹ Layinki agani eihunni tonaa shoolki barra hawarro ayirrisona; ayirrisanno yannarano ge'rechu goco shiishinokki timinna qaraaranno darchi ledo itona.

¹² Sooda geeshsha mittoreno gatissukkinni ittona. Ittanno woyiteno miqicho hiiqqitoonke. Ayyaana kulloonninsa seeri garinni ayirrissona.

¹³ Kayinnilla mittu manchi lagaawikkinni woy xeerto doogo ha'rikkinni Mararrote Ayyaana ayirrisa hoogiro, manni'ya ledo kiiramoonke. Ane Kaaliiqi fushshaate yinoonni yannara shiqishinokki daafira cubbosi umisi duqqanno.

¹⁴ « ‹Giddo'ne hee'rannohu manni gobba manchi Mararrote Ayyaana ayirrisara hasi'riro, kulloonni seeri garinni ayirrisona. Gobbate beettono ikko manni gobba manchi mittu garinni ayirrissona› yite kulinsa» yii.

QULLAAWU DUKKANIRA IIMAANNI LEELLINO GOMICHO

^15-16 Qullaawa Dukkana qansi barra gomichu dirre Dukkana guggushshi. Hawarronni kayise soodi geeshsha Dukkanu aaninni dikaino. Gomichu hashsha giirate gede ikke xawanno.

¹⁷ Gomichu Dukkanu aaninni kae ha'ranno yannara, Israeeleno noo qachinni ka'e gomichu uurrinowa marte baxxisidhanno.

¹⁸ Israeelete manni ha'rannohunna baxxisi'rannohu Kaaliiqi hajajino garinniiti. Gomichu Dukkana guggushshanno yanna baalantera noo qachira keeshshitanno.

¹⁹ Gomichu Dukkanu aana lowo yanna keeshshiro, Israeelete mannino Kaaliiqi hajajo agadhe hakko keeshshanno.

²⁰ Mito mito woyite kayinni, gomichu Dukkanu aana shiima yanna calla keeshshanno. Ikkirono qachinsara keeshshitannohunna ka'e hadhannohu Kaaliiqi hajajo garinniiti.

²¹ Mito mito woyite gomichu hawarronni soodo geeshsha calla keeshshanno. Hashshano ikko barra gomichu ka"anni hee'reennanni insano ka'e hadhanno.

²² Gomichu mitto barra woy mitto agana woy mitto diro Dukkanu aana keeshshiro, Israeelete mannino hakkeeshshi yanna noo qachira keeshshanno. Ka"anno woyite kayinni ka'e hadhanno.

²³ Baxxisidhannohuno hadhannohuno Kaaliiqi Musera hajajino hajajo garinniiti.