KIIRO 6 - Qullaawa Maxaafa

MAGANOHO BAXXATE SEERA

¹ Kaaliiqi Musera,

² «Israeelete, ‹Meyatano ikkito labbaahu isonoo Kaaliiqira badate xa'niro,

³ woyinete xajjenna wole dimbissanno agatto kisi'roonke; woyinete xajjeno ikkito wole dimbissanno agatto agoonke. Woyinete leonna mooshshinoonnita woyinete leono itoonke.

⁴ Baxxanno woyite, woyinete haqqichore mittoreno kisi'roonke. Woyinete laalo woy qoshase nafa itoonke.

⁵ « ‹Xa'ne isonoo Kaaliiqira badinoha dananchosi milaace kissoonke. Isonoo Kaaliiqira bade hee'ranno yanna baalantera qullaawa ikke hee'rona. Umisi dananchono lossi'rona.

⁶ Isonoo Kaaliiqira bade hee'ranno yanna baalante giddo reeshshunniwa shiqoonke.

⁷ Isonoo Maganoho badino malaati umisi aana noo daafira, annisi woy amasi, rodiisi woy rodoosi reyituro nafa reeshshansa kisoonke. Kisiro seeru garinni lagaawinoha ikkanno.

⁸ Isonoo bade hee'ranno yanna baalantera isi Kaaliiqira qullaawaho.

⁹ « ‹Hedeweelcho mannu mulesi ree Kaaliiqira baxxinoha dananchosi lageessiro, keeraa'manno yannara lamalki barra umosi meexxona.

¹⁰ Settikki barra 2 bukukkaama woy 2 lembooli caacurre haa're Qullaawu Dukkani nafarira qeesichunniwa abbona.

¹¹ Qeesichuno mitto cubbo agursiisate kakkalora, layinkiha shilqote kakkalo asse shiqishe, reeshsha kisasinni lagaawino lagonni keereensosina. Hakko barranni dananchisi qullaawa ikkanno.

¹² Umosi qullaawa assi yannano Kaaliiqira baxxitinota ikkitona. Mittu diri goco sao agursiisate kakkalo asse shiqishona. Lagaawino daafira isonoo badinoti sa'ino yanna dikiirantanno.

¹³ « ‹Isonoo Kaaliiqira badino yanna gooffanno woyite wonsha hasiissannosi woga no: Qullaawu Dukkani xullichira mare,

¹⁴ muso afidhinokkita 3 saada Kaaliiqira kakkalona. Kunnirano mittu diriha ge'rechu goco shilqote kakkalora, mittu dirita ge'rechote goodane cubbo agursiisate kakkaloranna mitto ge'rechu goco mittimmate kakkalora shiqishona.

¹⁵ Kuri ledo shiishikkinni gannoonniha mitto saffe tima: Zayitetenni liinse du'minse gannoonnihanna zayite aanaho buurroonniha shaalado tima, gidunna agattote fushshaati ledo shiqishona.

¹⁶ « ‹Qeesichu kore cubbo agursiinsannitanna shilqote kakkalo asse Kaaliiqi albira shiqishona.

¹⁷ Shiishikkinni gannoonniha saffu timanna ge'rechu goco mittimmate kakkalo asse gidunna agattote fushshaati ledo shiqishona.

¹⁸ « ‹Hakkunni gedensaanni, isonoo Kaaliiqira badino manchi umosi Qullaawu Dukkani waalchira mare meexxe, dananchosi mittimmate kakkalora giirroonni giira giddo tugona.

¹⁹ « ‹Kuni manchi qullaawa dananchosi meexxihu gedensaanni, qeesichu ganfoonniha ge'rechu haye, saffu aaninni mitto shiishinokkiha du'ma timanna shaalado tima haa're isonoo badino manchi anga worona.

²⁰ Hakkunni gedensaanni, qeesichu konne baala haa're masse baxxitino kakkalo asse Kaaliiqira shiqishona. Kore qullaawoota, addi kakkalo assine shiqinshoonni rachonna hayu qeesichaho bande qeechasi assine uyinona. Kaaliiqira baxxino manchi woyinete xajje aga dandaannohu hakkunni gedensaanniiti.

²¹ « ‹Kaaliiqira xa'nino manchi xanosi wonshi'ranno woga tenneeti. Ikkollana mittu manchi isonoo badate daafira hendoonnihunni aleenni aara xa'niro, afoo fulino garinni xanosi tidha hasiissannosi yiino› yite kuli» yiisi.

QEESOOTU MANNAHO UYITANNO MAASSO

²² Kaaliiqi Musera,

²³ «Aarooninna oososi Israeelete manna maassidhanno yannara,

²⁴ « ‹Kaaliiqi maassi'rohe; agarohe.

²⁵ Kaaliiqi alba hisatohe; mararohe.

²⁶ Kaaliiqi alba higohe; keereno oohe› yitine maassidhe yite kulinsa» yii.

²⁷ Qoleno Kaaliiqi, «Kunni garinni insa Israeele ane su'minni maassidhuro, anino maassi'reemmo» yii.