KIIRO 5 - Qullaawa Maxaafa

QACHU KEERAA'MA

¹ Kaaliiqi Musera,

² «Taraawannohu gogu dhibbi woy cingaannorichi manninatisi giddonni fulannoha, woy reeshsha kise lagaawinoha baala qachu gobbaanni fushshitanno gede Israeele hajaji.

³ Kunni garinni lagaawinohu meyatano ikkito labbaahu ki'ne manni'ya mereero ani hee'reemmowa qacha'ne lageessannokki gede qachaho gobbaanni fushshe» yii.

⁴ Kaaliiqi Muse hajajino garinni Israeele hattoo manna qachu gobbaanni fushshitu.

ASSINOONNI SAORA KARRANNI ERECCO

⁵ Kaaliiqi Musera,

⁶ «Israeelootaho, ‹Meyatano ikkito labbaahu ayi garinnino wole gawajje Kaaliiqi hajajo sairo,

⁷ assino saora ifaaxxona. Hakkunni gedensaanni saosira hendoonnire mudhona. Karroonnisi erecci aanano xibbunni lemoo anga lede gawajjamino manchira oona.

⁸ Gawajjamino manchira reenna murroonni muro haa'ranno fiixi hoogiro, Kaaliiqi saosi agurannosi gede shiqishanno goci ge'rechunnihu ledo ane Kaaliiqira ikkanno gede qeesichaho oona.

⁹ Israeele shiqishshannoha qullaawa fushshaate baalanka qeesichaho uyinona.

¹⁰ Mittu mittunku manchi aanno fushshaati umisiho. Qeesichaho uyiro kayinni qeesichunniha ikkanno› yite kulinsa» yii.

FOORRETE DAAFIRA MINAANNISE HULUULLAMINOSE MANCHO

¹¹ Hakkunni gedensaanni Kaaliiqi Musera,

^12-14 «Israeelete, ‹Mittu manchi galte wole labbaaha la'e woy wolu ledo foorte manninatese batteessitino yee huluullamara dandaanno. Ikkollana coyi xawo fula hoogeenna foortinota buuxa hooga dandaanno. Foortanna afa hoogino daafira naqaashsheno hee'ra hooggusiro, woy foortukkinni mulla huluullamiro,

¹⁵ ise haa're qeesichunniwa massona. Ise daafirano mitte kiilo bullee fushshaateho massona. Sao leellishanno fushshaate ikkino daafira, aanaho zayitenna hixaana woroonke. Kuni hinaasu daafira shiqinshoonnihu gidu fushshaati sao leellishate uyinanniho.

¹⁶ « ‹Qeesichuno mancho Kaaliiqi albaanni uurritanno gede assona.

¹⁷ Hakkunni gedensaanni, qullaawa waa dorunni seekkinoonni uduunnichira hinkiile, Qullaawu Dukkani giddo noo bushsha shiima qi'miide haa're wayi giddo worona.

¹⁸ Qeesichu mancho Kaaliiqi albaanni uurritanno gede assihu gedensaanni, umose tire hinaasu daafira shiqinshoonni fushshaate angase wore, isino qaraarannoha rumo abbanno waa anga amadona.

¹⁹ Hakkunni gedensaanni qeesichu mancho kunninni aane noo coyira sumuu yitanno gede assona: Ayiddaannikki hee'reennanni wolu labbaahu ledo foorte umokki batteessoottakkiha ikkiro, kunni rumo abbanno wayiwiinni keeraawi.

²⁰ Ayiddaannikki hee'reennanni wolu labbaahu ledo foorte umokki batteessoottaha ikkiro kayinni,

²¹ Kaaliiqi giwoodakki laansheesse godowakki fuugise gosakki mereero rumonnitanna mukkure yinannita assohe.

²² Kuni rumote wayi giddokkira e"e, godowakki fuugise giwoodakkino laansheesso› yoona. Manchono qolte, ‹Eewanni Kaaliiqi yootto gede asso› » yitona.

²³ « ‹Hakkunni gedensaanni, qeesichu tenne rumo baala borreessona. Borrono hayishshe qaraaranno wayi giddo worona.

²⁴ Manchote dhibba kalaqanno waa hayikkisara albaanni,

²⁵ qeesichu bulleete fushshaate manchote anganni haa're, Kaaliiqira addi fushshaate asse kakkallanni darga shiqishona.

²⁶ Hakkunni gedensaanni, gidu aaninni mitto hoowo haa're, qaaggote fushshaate ikkanno gede kakkalote darga shilqishe, mancho waa agganno gede assona.

²⁷ Mancho umose batteessitinohanna foortinoha ikkiro, aggino wayi giddora e"e lowo geeshsha shetisannose. Godowise fuuganno; giwoodiseno laanshaawanno. Gosase mereerono rumantinota ikkitanno.

²⁸ Battaabbinokkitanna keeraancho ikkituro kayinni fayyitanno; oosono iltanno.

²⁹ « ‹Mitte mancho galte heedheennasenni wolu ledo foorturo,

³⁰ woy ayiddaannise hinaasino daafira huluullamiro, mancho Kaaliiqi albaanni uurriteenna, qeesichu kulloonni seera wo'manka wonshona.

³¹ Manchu keeraa'manno. Ise kayinni assitino sao amaddannose› yiino yite kulinsa» yii.