KIIRO 36 - Qullaawa Maxaafa

MEYATI BAATTOTE IQQA ADHITANNO GARA

¹ Yooseefi sircho ikkinohu Minaase beetti Makiiri ilinohunniti Geleaadi mini sooreeyye Musewanna Israeelete ga're baalante sooreeyyewa dagge,

² «Baatto Israeelete hixunni beehatto gede Kaaliiqi hajajihe yannara, rodiinke Selofihaadi seennirano qeechansa aattonsa gede kulinohe.

³ Insa wole Israeelete ga'rera mine assi'riro qeechinsa ninke mini iqqi giddonni fule adhanno ayiddira aamamanno. Togo ikkanno woyite iqqinke xearaati.

⁴ Israeelennihu Wolaphote Ayyaani iillanno yannara, insara uyinoonni qeechi galagale dihiganno. Hakkawoyite qeechinsa akaakkanke ga're iqqi aaninni xeanno» yitu.

⁵ Hakkunni gedensaanni Muse Kaaliiqi yiino garinni Israeele, «Minaase ga're coyidhinori garaho.

⁶ Selofihaadi seenni daafira Kaaliiqi: Insa anninsa ga're ikkinohura mine assi'ra hasiisannonsa. Insa giddonni baxinohura assi'ra dandaanno.

⁷ Israeele baalanti akaakkansawiinni adhitino iqqinni heedhona. Israeelete iqqi mitte ga'renni wole ga'rera saoonke.

⁸ Mittu mittunku Israeelichi annisi iqqa adha hasiissannosi daafira, aye ga'reno ikkituro ragidhanno meyati baala, annise ga're ikkinohura assi'ra hasiissannose.

⁹ Kunni garinni mittu mittunku Israeelichi iqqasi amade hee'ra hasiissannosi daafira, iqqu mitte ga'renni wolete saoonke» yee hajajinonsa.

^10-11 Selofihaadi seenni Mahila, Tiritsa, Hogila, Milkanna Noa Kaaliiqi Musera hajajino garinni wosiillansa oosora mine assi'ri.

¹² Insa Yooseefi beetti Minaase ilamara mine assi'rino daafira iqqinsa ayiddinsanna ga'rensa anga gati.

¹³ Iyyaarkora widoonni Yordaanoosi Wayi mule, Moaabi Xawira heedheenna Kaaliiqi Muse widoonni qole Israeelete uyino hajajonna woga tenneeti.