KIIRO 35 - Qullaawa Maxaafa

LEEWAAWOOTAHO UYINOONNI KATAMMA

¹ Iyyaarkora widoonni Yordaanoosi Wayi mule, Moaabi Xawira Kaaliiqi Musera,

² «Israeele adhitino baatto aaninni Leewaawootaho heedhanno katamma uyitannonsa gede hajaji. Katammate qooxeessira saada hossanno dargano uyitonsana.

³ Katamma heedhanno darga ikkitannonsa. Hayissote gobba qolte lalu, ge'reewu, meunna wole saada hossannowa ikkitanno.

⁴ «Leewaawootaho uyitinanniti saada hossanno gobba katammansa huxxiwiinni kayisse 450 qaafo ikkitanno.

⁵ Katama mereero qolte shoolunku ragira honse honse xibbe qaafo gatissona.

EEGGOTE KATAMMA

⁶ «Leewaawootaho uyitinanninsa katamma giddonni 6 katamma, manna shiinohu xooqe eannota eeggote katamma ikkitanno. Kuri aanano leddine 42 katamma uuyyensa.

⁷ Saada hossanno gobba ledo mitteenni Leewaawootaho 48 katamma uuyyensa.

⁸ Israeelete iillitino baatto aaninni katamma Leewaawootaho uyitinanni woyite, mitte mittenti ga're adhitino qeechi bikkinni haadhine uuyye. Hala'lado adhitinoriwiinni lowo katamma, shiima adhitinoriwiinni kayinni shiima katamma haadhe» yiisi.

⁹ Qoleno Kaaliiqi Musera,

¹⁰ «Israeelete, ‹Kana"aani e'inara Yordaanoosi fultinanni yannara,

¹¹ danotenni manna shiinohu mare maaxamanno gede eeggote katamma doorre.

¹² Tini katamma manna shiinohu yoote shiqikkinni reyannokki gede rabbisannohuwiinni maaxamannowaati.

¹³ Leewaawootaho uyitinanniri tini leenti katamma eeggonnita ikkitanno'ne.

¹⁴ Yordaanoosira kawaanni 3 Kana"aani gobbara 3 eeggote katamma assitine uuyye.

¹⁵ Tini leenti katamma danotenni manna shiino manchi maaxamanno gede Israeelete, manni gobba manniranna giddo'ne hee'ranno manni baalunkura eeggote darga ikkitona.

^16-18 « ‹Mittu manchi wole siwiilunni woy kinchunni woy haqqunni gane shiiro, afanni shiinohu gede assine kiirranni. Kunnira isono shinona.

¹⁹ Hakkonne mancho reyinohura fiixa ikkannohu shaa hasiissannosi. Illesira xaadi yannara shoona.

²⁰ Mittu manchi wole afanni hee'renni giwannosi daafira wigidiide tugeenna woy mittoricho aanasi oleenna reyiro,

²¹ woy afanni hee're angatenni ganeenna reyiro, isono shinona. Manna shiino daafira shinoonnihura fiixa ikkannohu illetenni xaadi yannara shaa hasiissannosi.

²² « ‹Kayinni gibbotenni ikkikkinni danotenni tugeenna woy hedikkinni mittoricho aanasi oleenna,

²³ woy afikkinni kincho aanaho tugeenna reyiro, baarigaarasi ikkinokki daafiranna gawajjasira hedinokki daafira,

²⁴ mannu lamunku coye lae kunninni aane noo seeri garinni taashshona:

²⁵ Mannu konne shiino mancho rabbisannohuwiinni gatise galagalche masse eeggote katamira worosina. Manchuno hatte yannara noohu qeesete roorrichi reya geeshsha hakkiicho hee'rona.

²⁶ « ‹Ikkollana shiino manchi maaxamino katami eeggonnihura gobbaanni fule hee'reenna,

²⁷ rabbisanno manchi afiro shaasira dandaanno; shaasirano dixa'mamanno.

²⁸ Kunnira shiino manchi qeesete roorrichi reya geeshsha eeggote katami giddo hee'rona. Hakkunni gedensaanni qaesi higara dandaanno.

²⁹ « ‹Heedhinanni gobba baalate, hegere geeshsha wonsha hasiissanno'ne woga tenneeti.

³⁰ « ‹Manna shiino mancho qolle shinannihu lame woy roore naqaashshe naqqassuhu gedensaanniiti. Ikkollana mittu manchi callu naqqaseenna shaa dihasiissanno.

³¹ « ‹Reya hasiissannosi manchiwiinni guma ittinoonte; horonta reyona.

³² « ‹Eeggote katama xooqe einoha guma ittine qeesete roorrichi reyikkinni minisira higanno gede assitinoonte.

³³ « ‹Hatto assitiniro heedhinanni baatto batteessitinanni. Manna shaannohu baatto batteessanno daafira, shiinoha shaa agurranna baatto keereensinanniti wole doogo dino.

³⁴ Ani Kaaliiqi Israeelete mereero hee'reemmo daafira, heedhinannitanna ani galeemmo baatto batteessitinoonte› yiino yite kulinsa» yii.