KIIRO 34 - Qullaawa Maxaafa

ISRAEELETE AANTANNO GOBBUWA

¹ Kaaliiqi Musera,

² «Israeele, ‹Oommo'neta Kana"aani gobba martine e'inanni waro, ki'netera aantanno gobbuwa:

³ Wodiidi danni Edoomi qaccera nooha Tsiini Halalla giddo amadanno. Soojjaati ragihu wodiidi danni Maxinete Baari qaccenni kayise,

⁴ Aqirabiimi widoonni hige Tsiini sae wodiidoonni Qaadesi Berne geeshsha iillanno. Hakkiinnino Hatsaari-Adaari sae Atsimooni iille,

⁵ Gibitsete dannira noo lagicha wirri yee sae Mediteraaniyu Baari geeshsha iillanno.

⁶ « ‹Galchimi danni qole Mediteraaniyu Baaraati.

⁷ « ‹Aliyye danni Mediteraaniyu Baarinni kayise Hoori Ilaala iille,

⁸ Hamaatira sa'nanni faro geeshsha iillanno. Hakkiinnino sae Tsedaadi yinanniwa iille,

⁹ Zifirooninni sae Hatsaari-Enaani mare gawa'lanno.

¹⁰ « ‹Soojjaati dannino Hatsaari-Enaaninni Sefaama yinanni dargi geeshsha iillanno.

¹¹ Hakkiinnino sae Ayini yinanni baari malka geeshsha dirre Galiilu Garbira soojjaatoonni hige,

¹² Yordaanoosi Wayira aane Maxinete Baarira mare gawa'lanno. « ‹Qooxeessi'nera aananno danni konneeti› yiino yite kulinsa» yiisi.

¹³ Muse Israeelete, «Tenne honse ga'reranna darateho Kaaliiqi uyino'ne baatto iqqa'ne assidhine hixunni beeqqe.

¹⁴ Roobeeli, Gaadinna Minaase ga're daratu iqqansa adhitino.

¹⁵ Tini lamenti ga'renna daratu Yordaanoosira soojjaatoonni, Iyyaarkora widoonni iqqansa adhitino» yiinsa.

¹⁶ Kaaliiqi Musera,

¹⁷ «Baatto beekke iqqitannori qeesichu Aliaazaariitinna Newe beetti Iyyaasuuti.

¹⁸ Beehate kaa'litannonsa gede ga're ga'rentenni mitto mitto sooreessa haadhona.

¹⁹ Haa'nanni sooreeyyeno: Yihudu ga'renni, Yoofooni beetti Kaaleebiiti.

²⁰ Simiooni ga'renni, Amihuudi beetti Selaamieeliiti.

²¹ Biiniyaami ga'renni, Kisilooni beetti Eldaadiiti.

²² Daani ga'renni, Yugili beetti Buqiiti.

²³ Yooseefi beetti Minaase ga'renni, Sufiidi beetti Anieeliiti.

²⁴ Yooseefi beetti Efireemi ga'renni, Shifixaani beetti Qemueeliiti.

²⁵ Zaabilooni ga'renni, Fernaaki beetti Elsaafeniiti.

²⁶ Yisaakoori ga'renni, Hooza beetti Felxieeliiti.

²⁷ Aseeri ga'renni, Seleemi beetti Ahihuudiiti.

²⁸ Niftaalemi ga'renni, Amihuudi beetti Fedaheeliiti» yiisi.

²⁹ Kana"aani gobbara Israeelete baatto beekkanno gede Kaaliiqi hajajino manni konneeti.