KIIRO 29 - Qullaawa Maxaafa

HAARU DIRI AYYAANA

¹ «Lamalki aganira umi barra mittoreno loossinoontena, buudu xurumba ufuuffine magansi'rate gamba yiiyye.

² Muso afi'rinokkiha 1 middicha, 1 ge'rechu goconna mittu dirire 7 ge'reewu wilii'le su'niitannota shilqote kakkalo assitine ane Kaaliiqira shiqishshe.

³ Middichu ledo gidu fushshaatira zayitetenni liinsoonnita 3 kiilo bullee, ge'rechu goci ledo zayitetenni liinsoonnita 2 kiilo bullee shiqishshe.

⁴ Lamalunku ge'reewu wilii'li ledo zayitetenni liinsoonnita mitte mitte kiilo bullee shiqishshe.

⁵ Cubbo agursiisate kakkalora 1 meichu goco leddine shiqishshe.

⁶ Kuri baalu yinoonni garinni gidunna agattote fushshaati ledo barru barrunkunninna aganu aganunkunni shiqinshanni kakkalo shilqonnite aana lende ane Kaaliiqira su'niitanno kakkalo assine shiqinshannireeti.

CUBBO AGURSIISATE BARRA

⁷ «Lamalki aganira tonnikki barra magansi'rate xaadde. Hakko barra sagaleno ittinoonte; loosono loossinoonte.

⁸ Muso afidhinokkire 1 middicha, 1 ge'rechu goconna mittu dirire 7 ge'reewu wilii'le, ane Kaaliiqira su'niitannota shilqote kakkalo assitine shiqishshe.

⁹ Middichu ledo gidu fushshaatira zayitetenni liinsoonnita 3 kiilo bullee, ge'rechu goci ledo 2 kiilo bullee,

¹⁰ ge'reewu wilii'li ledono zayitetenni liinsoonnita mitte mitte kiilo bullee shiqishshe.

¹¹ Cubbo agursiisate shiqinshanni kakkalonna barru barrunkunni shiqinshannihu gidunna agattote fushshaati gobbaanni, cubbo agursiisate ikkanno gede 1 meichu goco leddine shiqishshe.

DAASU AYYAANA

¹² «Lamalki aganira tonaa ontikki barra magansi'rate xaadde. Hakko barra mittoreno loossinoonte. Ane Kaaliiqi ayirrinyira 7 barri ayyaana ayirrisse.

¹³ Muso afidhinokkire 13 middo, 2 ge'reewu goccanna mittu dirire 14 ge'reewu wilii'le su'niitannota shilqote kakkalo assitine ane Kaaliiqira shiqishshe.

¹⁴ Mittu mittunku middichi ledo zayitetenni liinsoonnita sase sase kiilo bulleenna mittu mittunku goci ledo zayitetenni liinsoonnita lame lame kiilo bullee gidu fushshaate assitine shiqishshe.

¹⁵ Mittu mittunku wilii'lichi ledono mitte mitte kiilo bullee shiqishshe.

¹⁶ Barru barrunkunni shiqinshannihu gidu, agattotenna shilqote fushshaati gobbaanni, cubbo agursiisate kakkalora 1 meichu goco leddine shiqishshe.

¹⁷ «Layinki barra muso afidhinokkire 12 middo, 2 ge'reewu goccanna mittu dirire 14 ge'reewu wilii'le shiqishshe.

^18-19 Konne fushshaate baala umi barra shiqishshinanni kakkalo baalate ledo shiqishshe.

²⁰ «Sayikki barra muso afidhinokkire 11 middo, 2 ge'reewu goccanna mittu dirire 14 ge'reewu wilii'le shiqishshe.

^21-22 Konne fushshaate baala umi barra shiqishshinanni kakkalo baalate ledo shiqishshe.

²³ «Shoolki barra muso afidhinokkire 10 middo, 2 ge'reewu goccanna mittu dirire 14 ge'reewu wilii'le shiqishshe.

^24-25 Konne fushshaate baala umi barra shiqishshinanni kakkalo baalate ledo shiqishshe.

²⁶ «Ontikki barra muso afidhinokkire 9 middo, 2 ge'reewu goccanna mittu dirire 14 ge'reewu wilii'le shiqishshe.

^27-28 Konne fushshaate baala umi barra shiqishshinanni kakkalo baalate ledo shiqishshinanni.

²⁹ «Leelki barra muso afidhinokkire 8 middo, 2 ge'reewu goccanna mittu dirire 14 ge'reewu wilii'le shiqishshe.

^30-31 Konne fushshaate baala umi barra shiqishshinanni kakkalo baalate ledo shiqishshe.

³² «Lamalki barra muso afidhinokkire 7 middo, 2 ge'reewu goccanna mittu dirire 14 ge'reewu wilii'le shiqishshe.

^33-34 Konne fushshaate baala umi barra shiqishshinanni kakkalo baalate ledo shiqishshe.

³⁵ «Settikki barra magansi'rate xaadde. Hakko barra mittoreno loossinoonte.

³⁶ Muso afidhinokkire 1 middicha, 1 ge'rechu goconna mittu dirire 7 ge'reewu wilii'le ane Kaaliiqira su'niitannota shilqote kakkalo assitine shiqishshe.

^37-38 Konne fushshaate baala umi barra shiqishshinanni kakkalo baalate ledo shiqishshe.

³⁹ «Xa'nitinoonni xanora uyitinannihu woy baxxine uyitinanni fushshaati aana kulloonni'ne ayyaannara kore baala ane Kaaliiqira shiqishshe. Kuri shilqote kakkalo, gidu fushshaate, agattote fushshaateetinna mittimmate kakkalooti yiinsa» yiisi.

⁴⁰ Kunni garinni Muse Kaaliiqi hajajinosire baala Israeelete kulinsa.