KIIRO 21 - Qullaawa Maxaafa

ARAADI KATAMI DIIGAMA

¹ Wodiidi gobbara hee'rannohu Kana"aanichu Araadi Katami moote, Israeele Ataariimi yinanni widoonni higge dagginota afe qase shiima manna qafadi.

² Hatte yannara Israeele, «Konne manna angankera sayisse uyittoro, ate daafira insanna katammansa co'o assine gundeemmo» yite Kaaliiqira xa'nitu.

³ Kaaliiqi Israeelete huuccatto macciishshe Kana"aanoota angansara sayise uyinsa. Insano mannanna katammansa co'o assite guddu. Kunninni kainohunni hakkonne darga Herma yini. Hatto yaano goofote yaate.

CAMOTENNI SEEKKINOONNI HAMASHSHO

⁴ Israeelete Edoomi gaangaabbe ha'ra gidde ikkitinonsa daafira, Hoori Ilaalinni ka'e Duumu Baariwa massitanno doogo higge hadhu. Ikkollana doogote aana heedhenni cinca hoogge,

⁵ Maganonna Muse, «Halalla reyinammora Gibitsete gobbanni mayira fushshitininke? Intanniri woy anganniri dino! Tenne busha sagale kokke cee'mitinonke» yite boroortunsa.

⁶ Hatte yannara Kaaliiqi harfaamo hamaso soyi. Hamasuno lowo manna qase shii.

⁷ Mannuno Musewa daye, «Kaaliiqinna ate aana busha coye coyi'rankenni sayinsoommona, hamaso aaninkenni hoolanno gede Kaaliiqa huuccinke» yii. Museno Kaaliiqa huucci.

⁸ Kaaliiqino Musera, «Camotenni hamashsho seekkite haqqu aana suti. Qasaminohu baalu hakka hige lairo gatanno» yiisi.

⁹ Museno camote hamashsho seekke haqqu aana suti. Hamashshu qasinohu baalu camote hamashshi widira hige lae gati.

ISRAEELE MOAABI HADHINO DOOGO

¹⁰ Israeele hakkiinni ka'e hadhe Obooti yinanniwa marte baxxisidhu.

¹¹ Obootinnino ka'e, Moaabira soojjaatoonni Abariimi yinanni halalla marte baxxisidhu.

¹² Hakkiinnino ka'e Zereedi yinanni lagichira marte baxxisidhu.

¹³ Hakkiinnino sa'e Amooraawootu gobbara qasi'rino halalla Arnooni yinanni wayi mule baxxisidhu. Arnooni Wayi Moaabinna Amooni dannira nooho.

¹⁴ Kaaliiqi ola kulanno maxaafira, «Suufa Qoqqowa, laggate giddo nooha Waheebi Katama, Ornooni Waa,

¹⁵ Eeri Katamanna Moaabi danni geeshsha iillitanno lagga» yine borreessinoonnihu kunni daafiraati.

¹⁶ Hakkiinni ka'e Bieeri yinanniwa wayi buewa martu. Hakkiicho Kaaliiqi Musera, «Waa eemmonsana manna mittowa gamba assi» yii.

¹⁷ Hakkunni gedensaanni Israeelete manni aante noo faarso, «Ati bue burqi! Ninkeno faarsotenni haa'neemmohe.

¹⁸ Gashshaano untinotera, sooreeyye gashshootu siqquwanni akeekkinotera, wayi buera faarsese» yaanni faarsi. Hakkunni gedensaanni halallinni ka'e Mataana Katama hadhu.

¹⁹ Mataaninni ka'e Nehalieeli yinanniwa, hakkiinnino sa'e Bamooti yinanniwa iillitu.

²⁰ Bamootinni ka'e, Moaabi gobbara Fisiga Ilaali hunda noo lagichi geeshsha hadhu.

SEWOONINNA AAGI YINANNI MOOTOOLLA QEELAMA

²¹ Israeele Amooraawootu mootewa Sewooniwa,

²² «Gobbakki giddoonni hinge sa'neemmo gede fajjinke. Loosikki woy jajjikki giddora die'neemmo; gobbakki waano dikinseemmo. Tayinse sa'nammo geeshsha jawa doogo calla amande ha'neemmo» yite manna soqqitu.

²³ Sewooni kayinni mannu gobbasi giddoonni hige sa"ara difajjino; olantosi baala gamba assi're Israeele qasara halallira fuli. Yahaatsi Katama iillanni hee'renni Israeelete ledo ola hanafi.

²⁴ Israeele kayinni qasse, Arnooninni kayisse Yaabooqi Wayi geeshsha noo baatto adhitu. Ikkollana Amoonootu danni qiinshoonniha ikkino daafira Yaabooqinni disa'ino.

²⁵ Israeele Hasebooninna qooxeessaho noo katamma lexxite Amooraawootu katamma baala amadde hakkiicho teessu.

²⁶ Hasebooni alba Amooraawootu moote Sewooni katamaati. Isino Moaabi moote albihu ledo gaarame Arnooni Wayi geeshsha noo baatto baala adhino.

²⁷ Kunninni kainohunni geebbannori: «Sewooni Katama Hasebooni, galagalchine minneemmona amme!

²⁸ Olanto Sewooninni giirate gede ikkite fultu; Moaabi Katama Eeri guddu; Arnooni mule noo tulluwano ittu.

²⁹ Moaabi, atera aanne'e! Kamooshi magansidhinanniri ba'inoonni; magani'neno agurino'ne. Amooraawootu moote Sewooni, qafade haa're ha'rino.

³⁰ «Ninke kayinni gundoommonsa; Hasebooni, Dibooni, Noofanna Medeba katamma diingoommo» yitinohu kunni daafiraati.

³¹ Israeeleno Amooraawootu baattora teesse heedhu.

³² Muse dooyyaano Yaizeeri Katama soyihu gedensaanni, Israeele qooxeessinsara noo katamma baala amadde hakko noo Amooraawoota shorritu.

³³ Hakkunni gedensaanni Baasaanira massitanno doogo amadde hadhu. Baasaani moote Aaginna olantosi baala Edirayi yinanniwa olaho fultu.

³⁴ Kaaliiqi Musera, «Iso olantosi baalante ledonna baattosinni asse mitteenni angakkira sayise eemmohena waajjitooti. Hasebooni hee're gashshinoha Amooraawootu moote Sewooni assitto gede assi» yiisi.

³⁵ Kunnira Israeele Aagi, oososinna olantosi baalante ledo mittuno gattukkinni gudde baattonsa ragidhu.