KIIRO 19 - Qullaawa Maxaafa

CUBBUNNINNA LAGOTENNI KEERAA'MATE SEERA

¹ Kaaliiqi Museranna Aaroonira,

² «Ani oommo'ne seeri kuneeti: Qambara haxote worre egenninoonnikkita muso afidhinokkita duume adde abbitannoe gede Israeelete kullensa.

³ Adde abbine qeesichu Aliaazaarira uyinona. Iseno qachu gobbaanni fushshine albasiinni gorrinona.

⁴ Hakkunni gedensaanni qeesichu Aliaazaari mundee angichisinni kise, Qullaawu Dukkani widira qole 7 hige wixona.

⁵ Isi la"anna addenniha goga, maala, mundeenna cuma gatinsikkinni gudinse giirrona.

⁶ Qeesichu dagucho, garambichonna xiillicha fatilcho haa're adde giirranni giira giddo tugona.

⁷ Hakkunni gedensaanni qeesichu imaanasinna bisosi hayishshi're qacha higona. Kayinnilla hawarra geeshsha seeru garinni lagaawe keeshshona.

⁸ Adde giirino manchino imaanasinna bisosi hayishshi'rona; isino hawarra geeshsha seeru garinni lagaawe keeshshona.

⁹ «Keeraa'mino manchi giirroonni addeha buluulo haa're qachu gobbaanni fushshe lagaawinokki darga masse worona. Hakkonne buluulo wayi ledo karsineenna keeraa'mate seerira kaa'lannoha ikkanno. Konne seera wonshinannihu cubbuwiinni keeraa'mateeti.

¹⁰ Addete buluulo gamba assanno manchi imaanasi hayishshi'rona. Isino hawarra geeshsha lagaawe keeshshona. Kunino Israeeletenna giddonsa hee'ranno mannira hegere seera ikkonsana» yii.

REESHSHA AMADATENNI DAGGANNO LAGO

¹¹ Kaaliiqi qole, «Mannu reeshsha amadannohu baalu 7 barri geeshsha lagaawanno.

¹² Sayikkinna lamalki barra keereensanno wayinni bisosi hayishshi're keeraa'mona. Sayikkinna lamalki barra bisosi hayishshi'ra hoogiro kayinni dikeeraa'manno.

¹³ Mannu reeshsha amade bisosi hayishshi'rinokkihu ayino Kaaliiqi Dukkana lageessanno. Keereensanno waa winxoonnisikkihu lagaawino daafira, manni'ya ledo dikiiramanno. Lagono aanasi heedhanno.

¹⁴ «Mittu manchi Dukkanu giddo reyiro wonshinanni woga kunninni aante noote: Hakko manchi ledo noohu woy aanaho eannohu baalu 7 barri geeshsha lagaawanno.

¹⁵ Dukkanu giddo noohu tu'nikkinni agurroonni uduunni baaluno lagaawinoha ikkanno.

¹⁶ «Dukkanu gobbaanni mannu shiinoha woy dhiwame reyinoha amadannohu, mannu miqqa woy moogo kisannohu baalu 7 barri geeshsha lagaawanno.

¹⁷ «Lagaawino mancho keereensate, cubbo agursiinsara giirroonni addeha shiima buluulo maaqqete giddo tunge xalala buichote waa aanaho worrona.

¹⁸ Hakkunni gedensaanni keeraa'me noo manchi garambicho haa're hakko wayi giddo wore dukkanaho, giddosi noo uduunni baalahonna hakko noo mannira wixona. Wole widoonni hakku manchi, dukkanu gobbaanni mannu miqqa, moogo, shinoonniha woy dhiwame reyinoha kisannohura baalaho wixona.

¹⁹ Keeraa'me noo manchi lagaawinohura sayikki woy lamalki barra waa wixosina; manchuno lamalki barra keeraa'manno. Hakku manchino imaanasinna bisosi hayishshi're arrishsho e'anno woyite keeraa'minoha ikkanno.

²⁰ «Ikkollana mittu lagaawino manchi keeraa'mikkinni gatiro Kaaliiqi Dukkana lageessannona manni'ya ledo kiiramoonke. Keereensanno waa winxoonnisikki daafira lagaawe hee'ranno.

²¹ Kunino insara hegere seera ikkonsana. «Keereensanno waa wixanno manchi imaanasi hayishshi'rona. Keereensanno waa kisannohuno hawarra geeshsha lagaawanno.

²² Lagaawino manchi kisinori baalunku lagaawanno. Lagaawinoricho kisinohuno hawarra geeshsha lagaawanno» yii.