KIIRO 18 - Qullaawa Maxaafa

QEESOOTAHONNA LEEWAAWOOTAHO UYINOONNI LOOSO

¹ Kaaliiqi Aaroonira, «Qullaawu Dukkanira kalaqantanno saora ati, oosokkinna Leewaawootu xa'mantinanni. Qeesimmate soqqansho giddo kalaqantanno saora kayinni atinna oosokki calluwu xa'mantinanni.

² Atinna oosokki Qullaawu Dukkanira soqqantinanni yannara kaa'litannohe gede annikki ga'renni Leewaawoota abbi.

³ Annimma ate anga heedheenna insa Dukkanu giddo soqqantona. Ikkollana Qullaawa darga noo uduunnenna kakkalote uduunnicho kissoonke; kissuha ikkiro kayinni insano ki'neno reyitinanni.

⁴ Insano Dukkanu giddo uyinoonninsa soqqansho soqqantanni ledo'ne heedhona. Wolu mittuno ki'ne heedhinoonniwa shiqqi yoonke.

⁵ «Galagale hanqi'ya Israeelete manni aana dirrannokki gede Qullaawa darga noo uduunninna kakkalote uduunnichi annimma ki'ne anga heedhona.

⁶ Israeelete giddonni ayidde'ne Leewaawoota ki'ne kaa'litanno'ne gede dooroommohu aneeti. Insano Dukkanu giddo loonsanni looso baala loossanno gede ane Kaaliiqira aamantinoreeti.

⁷ Ikkollana kakkalote darginna Qullaawu Holgi giddo soqqansho baala qeesimmatenni soqqantinanniri ateetinna oosokkiiti. Qeesimmate soqqansho ki'nera afansha asse oommo'ne. Ki'ne agurranna hakkiichira shiqqi yaannohu reyanno» yiisi.

QEESOOTAHO UYINANNI FUSHSHAATE

⁸ Hakkunni gedensaanni Kaaliiqi Aaroonira, «Anera shiqinshanni fushshaati baalaho annimma oommohehu aneeti. Israeele shiqishshannoeha qullaawa fushshaate baala ateranna oosokkira qeecha asse oommo'ne.

⁹ Anera shiqinshannihu qullaawu fushshaati baalu giddonni shilqinshannikkihu ki'ne qeechaati. Qullaawa assite shiqishshannoehu gidu fushshaatino ikko cubbo woy sao agursiisate daafira shiqinshanni kakkalo aaninni haa'nannihu baalu atenna oosokki qeechaati.

¹⁰ Qullaawa ikkino daafira qullaawa darga ofoltine itte; tenne sagaleno ki'ne ga're ikkinohu labbaahu baalu itona.

¹¹ «Israeele shiqishshanno afanshi giddonnino, baxxino fushshaati aaninni bande haa'nannihu baalunku ki'neha ikkona. Konneno atera, oosokkiranna seennikkira geedote qeecha asse oommo'ne. Minikki manni giddonni seeru garinni keeraa'minohu baalu itara dandaanno.

¹² «Israeele umi laalcho assite anera shiqishshannore fila ejersu zayite, fila haaro woyinete xajjenna gide baala ki'nera oommo'ne.

¹³ Ane Kaaliiqira abbitannohu baattonnihu umi laalchi baalu ateho. Minikki manni giddonni seeru garinni keeraa'minohu baalunku itona.

¹⁴ «Ane Kaaliiqira co'o assine uyinoonnihu Israeelete gobbara noori baalu ateho.

¹⁵ Anera uyinoonnihu umo ilaminohu woy umo qalaminohu baalu ateho. Umo ilaminoha labbaa beetto woxxannohuwiinni woxe haadhe. Saadannihu umo qalaminohu maala intannikkiha ikkiro dargaho woxe riqimbona.

¹⁶ Qaaqquulleho mitto agana ikkannonsa yannara, worroonni seeri garinni 5 kinchu birra uyine wondona.

¹⁷ Umi qallo lalunnita, ge'reewunnitanna meunnita kayinni diwondanni; tini saada co'onta aneta ikkitinohura kakkalote shiqinshona. Mundeensano kakkalote uduunnichi aana dunnona. Coomansano anera su'naannoe gede assine giirate shilqinshona.

¹⁸ Baxxino fushshaatita assine uyinanni rachonna qiniitichu hayi gede, tenne saada maalino ateho.

¹⁹ Israeele anera shiqishshannoha baxxino fushshaate baala atera, oosokkiranna seennikkira qeecha asse oommo'ne. Kunino Kaaliiqi albaanni ateranna sirchikkira hegereha maxinete gondooro ikkanno» yiisi.

²⁰ Kaaliiqi Aaroonira, «Israeelete baatto aaninni iqqa diadhatto; insa ledo beeqqattori wolirino dinohe. Israeelete mereero atera qeechikkinna iqqikki aneeti.

²¹ «Qullaawu Dukkani giddo soqqantanno yannara daafurinsara ikkanno gede Israeele abbitannoha tonnunni mitto Leewaawootaho iqqa asse oommonsa.

²² Reyo daggannonsana Leewaawoota ikkitinokkiri wolootu layinkimeeshsho Dukkanunniwa shiqqi yitoonke.

²³ Dukkanu giddo looso Leewaawootu callu loossanno. Hakko kalaqantanno saorano insa xa'mantanno. Kunino dagganno ilama baalate hegere seeraati. Kunnira Leewaawootaho Israeelete mereero iqqu dihee'rannonsa.

²⁴ Kunni darga Israeele fushshaate assite anera shiqishshannoha tonnunni mitto Leewaawootaho iqqa asse oommonsa. Ani, ‹Israeelete giddo insara iqqu dinonsa› yoommohu kunniraati» yii.

²⁵ Kaaliiqi Musera,

²⁶ «Leewaawootaho, ‹Iqqa asse eemmo'neha tonnunni mitto Israeeletewiinni adhitinanni woyite, ki'neno adhitinannihu giddonni tonnunni mitto fushshitine anera fushshaate assitine uuyye.

²⁷ Fushshaati'neno mittu manchi, umi laalchi gidunnihunna woyinennihu giddonni uyinohu gede ikke kiiramanno'ne.

²⁸ Ki'neno Israeeletewiinni adhitinannihunni tonnunni mittu giddonni kunni garinni fushshaate shiqishshe. Konne ane qeecha ikkinoha qeesichu Aaroonira uuyye.

²⁹ Adhitinannihu baalunku giddonni fila ikkinoha baala ane Kaaliiqi qeecha assitine shiqishshe.

³⁰ Fila ikkinoha uyitinanni woyite, mittu manchi umi laalcho gidunnihanna woyinenniha aannohu gede ikke kiiramanno'ne.

³¹ Gatinohu kayinni Qullaawu Dukkanira soqqantinanni yannara daafuri'nera hendoonniha ikkinohura, heedhiniwano heedhine mini'ne manni ledo ita dandiitinanni.

³² Fila ikkinoha shiqishshinihu gedensaanni ittiniro sao di"ikkanno'ne. Qoleno qullaawa Israeelete fushshaate dibatteessitinanni; reyotennino gattinanni› yiino'ne yite kulinsa» yii.