KIIRO 10 - Qullaawa Maxaafa

BIRRUNNI SEEKKINOONNI XURUMBUWA

¹ Kaaliiqi Musera,

² «Manna woshshite gamba assatenna kakkayisate birra daashshine seekkinoonniha 2 xurumba qixxeessi.

³ Lamenka xurumba ufuunfanni yannara, mannu baalunku ati noottowa Qullaawu Dukkani xullicho shiqona.

⁴ Mitto xurumba ufuunfanni yannara Israeelete roorrooti callu atewa shiqqona.

^5-6 Heedhinoonni qacha agurtine hadhinara ka'inanni yannara, xurumba ufuuffe. Umi xurumba ufuunfanni yannara soojjaatoonni noori ka'e hadhona; layinkiha ufuunfanni woyite wodiidoonni noori hadhona.

⁷ Mannu gamba yaanno gede xurumbuwa seedissine ufuuffe.

⁸ Xurumba qeesootu Aarooni ooso ufuuffona. Kuni coyino ki'neranna ooso'ne oosora geedote seera ikkona.

⁹ Gobba'nera ki'ne qasara ka"anno diini ledo olantinara fultinanni yannara, xurumba ufuuffe. Ani Magani'ne Kaaliiqino qaageemmo'ne; gatiseemmo'ne.

¹⁰ Qoltineno hagiirri'ne barra: Aganu Leellannoteranna wole hirqinoonni ayyaannara, shilqote kakkalonna mittimmate kakkalo shiqishshinanni yannara xurumbuwa ufuuffe. Konne macciishsheemmo woyite qaageemmo'ne. Ani Kaaliiqi Magano'neeti» yii.

ISRAEELE SIINA ILAALINNI KA'E HADHU

¹¹ Gibitsetenni fultuhunni layinki diro layinki aganira lemiikki barra gomichu Dukkanu aaninni kai.

¹² Israeelete mannino Siina Halallittenni kae, gomichu mare Faaraani Halallittera uurra geeshsha basetenni base sai.

¹³ Hadhinohuno umo asse Kaaliiqi Muse widoonni qole hajajino garinniiti.

¹⁴ Balaxxe Yihudu ga're sumudansa la'anni Aminaadaabi beetti Neasooni albiseenna gaamo gaamotenni hadhu.

¹⁵ Yisaakoori ga'rera sooreessu Tsuaari beetti Naatinaeeliiti.

¹⁶ Zaabilooni ga'rera sooreessu Helooni beetti Eeliyaabiiti.

¹⁷ Dukkanano dirrinseenna Gershooninna Meraari ilama dukke Yihudu ga're hoode hadhu.

¹⁸ Roobeeli ga'reno sumudansa la'anni Shedeuuri beetti Elitsuuri albiseenna gaamo gaamotenni hadhu.

¹⁹ Simiooni ga're sooreessi Tsurishaadayi beetti Shelumieeliiti.

²⁰ Gaadi ga're sooreessi Deueeli beetti Eeliyaasaafiiti.

²¹ Hakkunni gedensaanni Qehaati ilama qullaawa uduunne dukke hadhu. Insa marte iillita geeshsha Dukkana qanse agarrona.

²² Efireemi ga'reno sumudansa la'anni Amihuudi beetti Elishamai albiseennansa gaamo gaamotenni hadhu.

²³ Minaase ga'rera Phedaatsuuri beetti Gemaalieeli sooreessaho.

²⁴ Biiniyaami ga'rera sooreessu Gidiooni beetti Abidaaniiti.

²⁵ Goofimarchoho, Daani ga're ledo Aseerinna Niftaalemi ga're sumuda la'anni wo'munkura badheenni hadhu. Daani ga'rera albisu Amishaadayi beetti Ahiezeeriiti.

²⁶ Aseeri ga'rera sooreessu Okiraani beetti Faagieeliiti.

²⁷ Niftaalemi ga'rera sooreessu Enaani beetti Ahiraiiti.

²⁸ Israeele noo qachinni ka'e hadhanno woyite gaamo gaamotenni kunni garinni hadhino.

²⁹ Muse Midiyaamichu Yootoori beettira galtesi rodiira Hobaabira, «Kune Kaaliiqi eemmo'ne yiino gobba ha'nammora ka'noommo. Kaaliiqi Israeele duroonsannota coyi'rinona, atino tenne jiro adhattona ledonke kai» yiisi.

³⁰ Hobaabino daware, «Ani dihasi'reemmo; ilamoommo gobba ha'reemmo» yii.

³¹ Museno qole, «Gobba egennootto daafira doogo kulattonkena eeggatena ballo agurte hadhootinke.

³² Ledonke ha'rittoro Kaaliiqi aannonke atoote beeqqattona» yiisi.

³³ Hakkunni gedensaanni Siina Ilaali Kaaliiqihuwiinni ka'e sasu barri doogo hadhu. Kaaliiqi marte baxxisidhanno base leellishannonsa gede Leewaawootu Gondooru Taaboota balaxxe alba qolte haadhe hadhu.

³⁴ Qachinsanni ka'anni heedheennanni Kaaliiqi gomichi barra barra dukkisinsa.

³⁵ Museno Gondooru Taabooti ha'ra hanafanno yanna baalantera, «Kaaliiqa ballo kai! Diinnakki billaallitona; gibbannoherino albikkinni xooqqo» yii.

³⁶ Taabootu uurranno yannarano, «Kaaliiqa'ya ballo, kumunni kiirranni manni Israeelennihuwa higi!» yii.