KALAQAMA 6 - Qullaawa Maxaafa

MANNU BUNSHE

¹ Mannu sirchi baattote aana bati'ri yannara seennu ilaminsa;

² Maganu ooso mannunnihu seennu xumuulle ikkinota la'u; giddonsanni baxxinore doodhite adhitu.

³ Kaaliiqi, «Ayyaani'ya mannu aana hegerera dihee'ranno; isi mannahona, dirisi 120 ikkanno» yii.

⁴ Hatte yannaranna hakkunni gedensaanni, «Nefiliimi» yinanniri hojjaameeyyenna wolqaataammu manni no; insano Maganu ooso mannu seenne adhitu yannara ilantinoreeti; kuri, albi yannara su'minsa egennaminore wolqaataamma ikkitu.

⁵ Kaaliiqi mannu bunshe baattote aana batidhinota, wodaninsa hedonna yortonsa duuchanka woyite horonta busha ikkitinota afi.

⁶ Manna baattote aana kalaqasira gaabbi; wodanisinnino dadilli.

⁷ Kaaliiqi, «Kalaqoommonsahura gaabboommona konne manna, saada, godowunni ha'ranno kalaqamanna cea baattote aaninni huneemmo» yii.

⁸ Nohi kayinni Kaaliiqi albaanni ayirrinye afi'ri.

NOHI

⁹ Nohi yannara ikkino coyi aane nooho: Nohi keeraanchoho; bunshe assannokkihonna Maganu ledo qaafanno manchooti.

¹⁰ Nohi Seemi, Kaaminna Yaafeeti yinannire 3 labballi ooso ilino.

¹¹ Baatto Maganu illera bushshe leeltu; barshu wo'minota ikkitu.

¹² Maganu baatto lowo geeshsha bushu loosinni battaabbinota afi; kuneeti mannu baalu baattote aana bunshe loosanni noota lai.

¹³ Maganu Nohira, «Mannu sircho baattote aaninni hunammora murci'roommo; insanni kainohunni baattote barshu wo'minona, ani kuneeti baattote aana noo kalaqama baala huneemmo.

¹⁴ Ati kayinni umikkira dancha haqqichonni markaawe seekki'ri; giddoseno batinye kifilla heedhanno gede assi; wayi giddora eannokki gede qixiraani yinanni suwe markaawete giddoyidiranna gobbayidira xalli.

¹⁵ Seendille 300 cigile, hala'linye 50 cigile, uurrinsha 30 cigile ikkitona.

¹⁶ Markaawete tuana seekki; tuanunna uurrinshase mereero mitte cigile fano darga aguri; markaawete waalcho midaadoho wori; markaawe sase fooqe nooseta ikkitona.

¹⁷ Ani, baattote aana hee'rannoha lubbo afi'rino kalaqama duuchanka hunate baattote aanira baote waa dirriseemmo; baattote aana noohu baalunku ba"anno.

¹⁸ Ate ledo kayinni gondooro e"eemmo; atinna galtekki, oosokkinna oosokki seenni mitteenni markaawete giddora e'e.

¹⁹ «Ate ledo lubbotenni hee'ranno gede lubbo afi'rino kalaqama baala danu danunkunni lame lame labbaahanna meyata haadhe markaawete giddora eessi.

²⁰ Lubbotenni heedhanno gede addi addi cea, addi addi saadanna godowunni ha'rannohu addi addi kalaqami lame lame ikke atewa eona.

²¹ Ateranna kunni kalaqami baalaho ikkitannota addi addi sagaleno markaawete giddora eessite duuni» yiisi.

²² Nohino Maganu hajajinore baala assi.