KALAQAMA 49 - Qullaawa Maxaafa

YAIQOOBI OOSOSI MAASSI'RI

¹ Yaiqoobi oososi woshshe, «Albillittete iillanno'ne coye kuleemmo'nena gamba yiiyye.

² «Ki'ne ane Yaiqoobi ooso, mitteenni gamba yitine macciishshe; ani anni'ne Israeeli kuleemmo'nere wodanche.

³ «Roobeeli, ati bayira beetto'yaati; wolqanna jawaante nooe yannara iloommoheho. Ooso'ya baalanta ayirrinyunninna wolqatenni roorattoho.

⁴ Ikkollana wayi gede daaqattoha ikkoottohura, irkote galte'ya ledo goxxe, ane annikki ma'na batteessoottona, atera gashshootu di"ikkanno.

⁵ «Ki'ne Simiooninna Leewi roduuwaho; gibbo kalaqate ola kayissinanni.

⁶ Ki'ne hanqi'nenni lowo manna shitinoonnihura, kaajjilli'nenni goo'ro fultinara, boottate dagaada murtine dinsiissinoonnihura, ki'ne malira die"eemmo; xaadi'nerano beeqqaancho di"ikkeemmo.

⁷ Lowo geeshsha waajjishannohu hanqi'ne, kaajjillu giddo wo'minohu aari'ne rumaminoha ikko. Sirchi'ya mereero billaalliseemmo'ne; Israeelete baatto baala tuqiseemmo'ne.

⁸ «Yihuda, ate roduuwikki guwissannohe; angakki diinnakki haxo aana ubbanno; roduuwikki atera umo heeshshi yite galtanno.

⁹ Yihuda, ati aju doobbiichi gedeeho; ati beetti'ya, itattore ugaaxxe godakki higatto. Doobbiichu gede diriiffatte goxatto; seyate goxanotenni kayisannohehu dihee'ranno.

¹⁰ Yihuda, mootimmate siqqicho angakkinni difultanno; mootimmate bakali lekkakki qarrira no. Kuni ikkannohuno, gashshate malinohu daa geeshshaatinna, mannu baalu hajajamasi geeshshaati.

¹¹ Ati harrichokki woyinete damattera, ilmichokkino woyinete sinira usudhatto. Uddanokki woyinete xajjenni, seemmakkino duume mundee labbanno huuncamenni hayishshi'ratto.

¹² Illekki woyinete xajjenni roore duu'mitanno; hinkokkino adotenni roore waajjidhanno.

¹³ «Zaabilooni, ati baaru mule hee'ratto; lawokkirano howolla uurritanno; gobbakki danni Sidoona iillanno.

¹⁴ «Yisaakoori, ati miqicho kaajjadu harrichi gedeeho; hogowu mereero ga'ratto.

¹⁵ Fooliishshi'ratto dargi dancha ikkinota affanni, baattono hagiirsiissannota ikkitinota la'anni, badhekki bayi'rate injeessatto. Baxittokkinni soqqamatto.

¹⁶ «Daani, ati Israeelete ga're giddo mittete gede ikkite, mannikkira yoo yaatto.

¹⁷ Daani, ati doogote gami hamashshi gedeeho; sa'nanni doogora noo buute gedeeho. Farashshunnita kotte qasatto; farashshaannino badhera hige uwanno.

¹⁸ «Kaaliiqa'ya! Gatisaanchimmakki agadheemmo.

¹⁹ «Gaadi, atera gaadaano gaaddannohe; ati kayinni faana gante rabbisi'ratto.

²⁰ «Aseeri, ateti sagalekki biiffinote; mooteteno hagiirsiissanno sagale shiqishatto.

²¹ «Nifitaalemi, ati fafisi're hee'rannohunna, biifino wilii'le qalanno bullichi gedeeho.

²² «Yooseefi, ati woyinete haqqicho hunduruurrooti; buichote mule kaansoonni woyineeti; sinnakki huxxu aana daaddanno.

²³ Digaana amaddinori mararro nookkiha gawajjitannohe; giwisidhe qassannohe.

²⁴ Kayinnilla, jawaatu Yaiqoobi Magani wolqanni, allaalaanchu Israeelete agaraanchinni, digaanikki kaajjado ikkanno; wolqakkino jawaattanno.

²⁵ Annikki Magani kaa'lannohe; Wo'manka Dandaanno Magani iima gordunni xeena, baattote giddonnino waa aatenni maassi'rannohe; lowo saadanna lowo oosono aannohe.

²⁶ Albinni kayisse kaajjite heedhanno ilaallanninna, hegerera heedhanno gaarranni afi'nanni maasso baalantenni, ane annikki maasso roortanno. Tini baalanti maasso ate Yooseefi umi aanaanni daaddo. Roduuwikki mereero roorricha ikkoottohu albi aana lolakko.

²⁷ «Biiniyaami, ati hawulukkanno hiyyeeyye gedeeho; gutte ugaaxoottoha callikki itatto. Ittanna gatinoha kayinni hashsha beehatto» yii.

²⁸ Kuri baalunku 12 Israeelete ga'reeti; anninsa maassi'rinsa yannara, mittu mittunkura maltino maasso maassi'rino.

YAIQOOBI REYONNA MADAARAMASI

²⁹ Hakkunni gedensaanni Yaiqoobi, «Ani mannu aalo ikkeemmo yanna iillitinoe; reyummoro, Hitichu Efirooni baattora noo godira annuwa'yawa madaarre"e.

³⁰ Hakku godino Kana"aani gobbara Makiphela yinanniwa Memirera soojjaatoonni nooho; isino Abirihaami waammate yee Hitichu Efirooniwiinni hidhino godaati.

³¹ Abirihaaminna galtesi Saara hakkiicho madaarroonni; Yisihaaqinna galtesi Ribiqano hakkiicho madaarroonni; anino Liya hakkiicho madaadhoommo.

³² Hatti baattonna aanase noo godi Hitootuwiinni hirroonnireeti» yiisi.

³³ Yaiqoobi oososira dhaansa dhaame kaihu gedensaanni, lekkasi daallasu aana xaphi assi're reyi.