KALAQAMA 46 - Qullaawa Maxaafa

YAIQOOBI MAATESI BAALANTE LEDO GIBITSE HA'RI

¹ Yaiqoobi noosire baalanka adhe ha'ranni Bersaabehi iille, annisi Yisihaaqi Maganira kakkalo kakkali.

² Maganu hashsha ajuujatenni, «Yaiqoobi! Yaiqoobi!» yee woshshisi. Isino, «Mooticha'ya macciishsheemmona coyi'ri» yii.

³ Maganuno, «Ani annuwakki Maganooti; hakkiicho sirchokki lowo gosa asseemmona Gibitse ha'ra waajjitooti.

⁴ Ani Gibitse ledokki ha'reemmo; hakkiinnino qole sirchokki fushsheemmo; Yooseefino reyatto yannara amadannohe» yiisi.

⁵ Yaiqoobino, Barshaabehinni kae Gibitse ha'ri; oososino annansa Yaiqoobi, qaaqquullenna meentonsa Feriooni soyino gaare harrennite aana wortunsa.

⁶ Saadansanna Kana"aani heedhe afidhino jajja baalanka adhite hadhu; Yaiqoobi Gibitse adhe ha'rinoti maatesi:

⁷ Oososi labballohonna seenneho, oososi oosootinna oososi iltino seenneeti.

⁸ Gibitse hadhinori Israeeli ooso su'mi aane nooho: Yaiqoobihu bayiru beetti Roobeeliiti;

⁹ Roobeeli ooso: Hanooki, Faalu, Hetsirooniitinna Kariimiiti.

¹⁰ Simiooni ooso: Yimueeli, Yamiini, Ohaadi, Yakiini, Tsohaariitinna Kana"aanitte iltinohu Shauuliiti.

¹¹ Leewi ooso: Gershooni, Qohaatiitinna Meraariiti.

¹² Yihudi ooso: Sheela, Faareesiitinna Zaarahiiti; (Yihuditi wole ooso Eerinna Oonaani Kana"aani gobbara reyitino.) Faareesi ooso: Hetsirooniitinna Hamuuliiti.

¹³ Yisaakoori ooso: Tola, Fuha, Yashuubiitinna Shimirooniiti.

¹⁴ Zaabilooni ooso: Sereedi, Elooniitinna Yahilieeliiti.

¹⁵ Kuri labballi oosonna meya beetto Diina Mesiphexoomiyaho hee'reenna Liya Yaiqoobiri iltinosireeti. Yaiqoobira Liya iltinosi oosonna oososi ooso mitteenni sajjiina saseho.

¹⁶ Gaadi ooso: Tseefooni, Haagi, Shuni, Etsibooni, Eeri, Aroodiitinna Arieeliiti.

¹⁷ Asheeri ooso: Imina, Ishiwa, Ishiwiitinna Beriaati. Rodoonsa Seeraahiiti. Beria ooso Hebeeriitinna Malkieeliiti.

¹⁸ Kuri tonaa leyunku, Laaba beettosi Liyara soqqantara uyinoseti Zilfa Yaiqoobira iltino oosootinna oososi oosooti.

¹⁹ Yaiqoobira Raaheeli Yooseefinna Biiniyaami iltinosi.

²⁰ Yooseefi ooso: Minaaseetinna Efireemiiti; insa Yooseefira Gibitsete gobbara Ooni Katami qeesichi Phoxifeera beetto Asenaati iltinosireeti.

²¹ Biiniyaami ooso: Beelai, Bekeeri, Ashibeeli, Geera, Naimaani, Eehi, Rooshi, Mufiimi, Huufiimiitinna Areediiti.

²² Kuri tonaa shoolunku Yaiqoobira Raaheeli iltinosi oosootinna oososi oosooti.

²³ Daani beetti Hushiimiiti.

²⁴ Nifitaalemi ooso: Yahitsieeli, Guuni, Yetseeriitinna Shileemiiti.

²⁵ Kuri lamalunku Laaba beettosi Raaheelira soqqantara uyinoseti Biliha Yaiqoobira iltinosi oosootinna oososi oosooti.

²⁶ Oososi seenne kiirrikkinni Yaiqoobi ledo Gibitse hadhinori Yaiqoobi maate leyayina leeho.

²⁷ Yooseefira Gibitsete ilantinore lame labballi ooso lendiro, Yaiqoobi ledo Gibitse e'inori maatesi mitteenni lamalaaho.

YAIQOOBINNA MAATESI GIBITSETE GOBBA TEESSO ASSIDHU

²⁸ Geeseemi Gobbara xaaddanno gede Yaiqoobi Yihuda umo asse Yooseefiwa soyi; Geeseemi iillitu yannara,

²⁹ Yooseefi annisi ledo xaadara faradi gaare gulufe hakkiira mari; Yooseefi annisi ledo xaade goowisira marmarame lowo yanna wi'li.

³⁰ Yaiqoobi Yooseefira, «Ati lubbotenni noottota afummo woyite reyummoro nafa digaabbeemmo» yii.

³¹ Yooseefino roduuwisiranna annisi mini mannira, «Ani Feriooniwa mare, ‹Kana"aani gobbara heedhannori roduuwi'yanna anni'ya mini manni anewa daggino.

³² Insano saada ce'e heedhannoreeti; ge'reewo, me"e, lalonna noonsare baalanka adhite daggino› yee kuleemmosi.

³³ Feriooni woshshe, ‹Maricho assidhine heedhinanni?› yee xa'manno'ne woyite,

³⁴ ‹Ninke akaakkankente gede anjenkenni kayinse saada ce'ne hee'neemmoreeti› yitine dawarresi. Saada ce'annori Gibitsootaho lago ikkitino daafira, tenne kultiniro, Geeseemi baattora heedhinanni gede assinanni'ne» yiinsa.