KALAQAMA 45 - Qullaawa Maxaafa

YOOSEEFI EWELUMMASI RODUUWISIRA KULI

¹ Yooseefino mulesi uurre noo manni baalunku albaanni cinca hooge naggi yiino qaalinni, «Manna baalanka gobbara fushshe"e» yee soqqamaanosira coyi'ri. Yooseefi roduuwisira ewelummasi egensiisinsa yannara, mule wolu noohu dino.

² Qoonqosi naggi asse wi'lanna, Gibitsete manni macciishshi; duduwu Feriooni minirano iilli.

³ Yooseefi roduuwisira, «Ani Yooseefiiti; anni'ya xaa geeshsha lubbotenni nooni?» yiinsa. Roduuwisi kayinni masse jalli yite mittoreno coyi'ra hooggu.

⁴ Qoleno roduuwisira, «Hanni anewa shiqqi yiiyye» yiinsa. Insano shiqqi yiteenna, «Gibitsete mannira hirtiniehu rodii'ne Yooseefi aneeti.

⁵ Maganu mannu lubbo gatisara ki'nera alba asse soyinoena, xa kayinni hirtinoonnie daafira dadillitinoonte; gaabbitinoonte.

⁶ Baattote aana hude ubbunkunni lame diro ikkino; loosi'ne jajja gamba assi'nannikkihu ontu diri gatino.

⁷ Maganu baattote aana sircho gatiseemmo'ne gedenna lubbo'ne gattanno gede ki'nera alba asse soyinoe.

⁸ «Xaano ikkiro kawiira soyinoehu Maganoho ikkinnina, ki'ne di"ikkitinoonni. Isino, Ferioonira umi amaalaasincho assinoe; minisira baalaho mooticha, Gibitsete baatto baalate gashshaancho assinoe.

⁹ Xa rakkine anni'yawa hadhine, ‹Beettikki Yooseefi, Maganu wo'ma Gibitsete gashshaancho assinoe; kunnira keeshshittokkinni rakke anewa amo;

¹⁰ anewa Geeseemi yinanni baattora hee'rattona, oosokki, oosokki ooso, ge'reewokki, me"ekki, wole saadakkinna noohere baalanka adhite amo.

¹¹ Ontu hudete diri alba hige gate noona, atinna maatekki saadakkino hudidhannokki gede Geeseemi heedhinanna towateemmohena› yiino yitine kullesi?» yii.

¹² Qoleno, «Xa coyi'reemmo'nehu ani Yooseefi ikkoommota ki'ne affinoonni; rodii'ya Biiniyaamino afino.

¹³ Anni'yara Gibitsete gobbara nooe ayirrinyenna la'inoonnire baalanka kullesi; isono rakkine kawiira abbe» yiinsa.

¹⁴ Hakkunni gedensaanni, rodiisi Biiniyaami goowa cu'mi're wi'li. Biiniyaamino goowasira marmarame wi'li.

¹⁵ Roduuwasi baalanka sunqanni wi'li; hakkunni gedensaanni roduuwisi isi ledo hasaabbu.

¹⁶ Feriooni mineno, «Yooseefi roduuwi daggino» yinanni duduwi macciishshite, Feriooninna ledosi gashshaano hagiidhitu.

¹⁷ Ferioonino Yooseefira, «Roduuwikkira, ‹Saada'ne hogophitine Kana"aanira hadhe;

¹⁸ anna'nenna maate'ne haadhine anewa amme; anino Gibitsennita woyyitino baatto eemmo'ne; baatto fushshitannota dancha sagaleno ittinannina.

¹⁹ Qolteno roduuwikkira qaaqquulle'ne, meento'nenna anna'ne abbidhinanni gede, Gibitsetenni jawa harrete gaare adhitine hadhe.

²⁰ Gibitsete baattora woyyinore afidhinanni daafira, agurtine dagginanni uduunnirano yaaddinoonte› yiinsa» yee xaamisi.

²¹ Yaiqoobi oosono yinoonninsa gede assitu; Yooseefino Feriooni hajajino garinni harrete gaarenna doogote ikkanno sinqe uyinsa;

²² baalunkura soorridhannoha wo'ma imaana uyinsa; Biiniyaamira kayinni 300 kinchu birranna soorri'rannoha 5 wo'ma imaana uyisi.

²³ Annisirano hattonni Gibitsenniha dancha afansha hogombannire 10 wodala, qoleno daanno woyitira doogote ikkannoha annisira sinqu sagalenna gide hogombannita 10 xala harre soyi.

²⁴ Yooseefino roduuwasi geegiisse higanni, «Doogote aana mimmiti'ne ledo giwantinoonte» yiinsa.

²⁵ Insano Gibitsete gobbanni fulte hadhe, Kana"aani gobba anninsa Yaiqoobiwa iillitu.

²⁶ Anninsarano, «Yooseefi xaa geeshsha lubbotenni no; isino Gibitsete gobba baalantera gashshaancho ikkino» yite kultusi. Yaiqoobino yitinota ammaninokki daafira mase jalli yii.

²⁷ Insa Yooseefi yiinonsata baala kultusitanna, iso abbinanni gede soyinota harrete gaare afi yannara, anninsa Yaiqoobiti lubbosi haaroo'mitu.

²⁸ Yaiqoobino, «Beetti'ya Yooseefi xaa geeshsha lubbotenni nooro ikkie; reyummokkinni afeemmosi gede xa ha'reemmo» yii.