KALAQAMA 41 - Qullaawa Maxaafa

YOOSEEFI FERIOONI HAAQEE TIRI

¹ Lamu diri gedensaanni Ferioonino haaqee haaqii'ri. Isino haaqeete Abbayi Wayi gama uurre hee'reenna,

² dana biifinorinna misinori 7 lali wayi giddonni fule gamaho hayisso itanni no.

³ Insa gedensaanni dana xu'minokkirinna yaraddu 7 lali wayi giddonni fule, balaxe fuliri mule uurre no.

⁴ Dana xu'minokkirinna yaraddu, dana biifinorenna misinore egemmi. Hatte yannara Feriooni goxanotenni baqqi yii.

⁵ Galagale goxe layinkimeeshsho wole haaqee haaqii'ri. Mittu agashshi aana biiffinotinna dancha 7 shoye fultu.

⁶ Hakkuri gedensaanni ciiggitinotinna halalli bubbe qoorsitinoti wole 7 shoye fultu.

⁷ Lamala ciiggitino shoye danchanna biiffinota lamalanta shoye egemmitu. Feriooni goxanotenni baqqi yaanno woyite, kuni coyi hada haaqeete.

⁸ Lowo geeshsha yaadino daafira, soodita kiilaanonna masaalaano baala soye woshshiishe, haaqee kulinsa; kayinnilla insa giddonni Ferioonira haaqeete tiro kula dandiinohu dino.

⁹ Hatte yannara woyinete xajje xorshannohu Ferioonira, «Ani hambe'ya techolla qaagummo.

¹⁰ Ati soqqamaanokkira hanqite, anenna sagalete mini murricha agaraasinete roorrichi mine usurammeemmo gede assoottonke.

¹¹ Ninkeno mitto hashsha haaqee haaqii'noommo; lamunku haaqee addi addi tiro afidhinote.

¹² Hakkiicho agaraasinete roorrichira soqqamannohu mittu Ibiraawichu wedellichi ninke ledo no; isira kullummota, lamunku haaqee haaqii'noommo garinni tirinonke.

¹³ Tirinonkente gede, ani darga'ya higoommo; ko'onne kayinni suntoonni» yiisi.

¹⁴ Feriooni Yooseefi soye woshshiisheenna, hakkawoyintenni usuru mininni fushshine abbini; isino umonna ereeda meexxe imaanasino soorri're Feriooniwa ei.

¹⁵ Ferioonino Yooseefira, «Haaqee haaqii're tirannoeha hoogoommo; ati kayinni haaqee tira dandaattota macciishshoommo» yiisi.

¹⁶ Yooseefino Ferioonira, «Ani tira didandeemmo; Maganu kayinni atera woyyitanno tiro aannohe» yee dawarisi.

¹⁷ Feriooni Yooseefira, «Haaqeete Abbayi Wayi gama uurre hee'reenna,

¹⁸ dana biifinorinna misinori 7 lali fule, gamaho hayisso itanni no;

¹⁹ hakkurira gedensaanni, dana xu'minokkirinna yaraddu wolu 7 lali fuli; Gibitsete baatto baalate hattoota dana bushshino saada horonta afe diegennoommo.

²⁰ Dana xu'minokkirinna yaraddu lali, umire lamalanka misino lalo egemmi.

²¹ Egemmihu gedensaannino albiwiinni lexxinori dino; daninsano albi gedee bushaantilla. Hatte giddo ani goxanotenni baqqi yoommo.

²² Xaano haaqeete biiffinoti 7 shoye mittu agashshi aana fultanna afoommo.

²³ Hakkurira gedensaannino ciigginorinna halalli bubbe qoorsitinoti 7 shoye fultu.

²⁴ Lamalanti ciiggitino shoye biiffinota lamalanta shoye egemmitu. Kiilaano woshshiishe haaqee kuloommo; insa giddonni tiro kulaera dandiinohu mittuno dino» yiisi.

²⁵ Yooseefino Ferioonira, «Lamente haaqee tiro mittete; Maganu assara hedinore kulinohe.

²⁶ Lamalu biifadu lali, lamala dirooti; lamala biifado shoyeno lamala dirooti; haaqeete tirono mittete.

²⁷ Hakkurira gedensaanni fuliri 7 dana xu'minokkirinna yaraddu lali, 7 dirooti; ciigginorinna halalli bubbe qoorsitinori 7 shoye, 7 hudete dirooti.

²⁸ Balaxe yuummonte gede, Maganu assara hedinore atera kulinohe.

²⁹ Kune Gibitsete baatto baalantera, lowo geeshsha duuwunnihu 7 diri daanno.

³⁰ Hakkunni gedensaanni kayinni, 7 hudete diri daanno; Gibitsete gobbara noo duuwi baalunku hawameenna, baattote aana lowo hude ubbanno.

³¹ Aane noohu hudete diri lowo geeshsha shettonniha ikkanno daafira, albi duuwi diqaagamanno.

³² Atera haaqee lamu daninni leeltinohehu, kuni coyi Maganu yiinohanna mulenni wo'mannoha ikkino daafiraati.

³³ «Xa Gibitsete gobbara egennaamonna hayyicha mancho doorte wori.

³⁴ Gibitsete gobba baalantera anfanni gide ontunni mitte anga gamba assitannore wori.

³⁵ Duuwu diri giddo gamba assinanni gide katamma baalate duunneenna insa agartanno gede hajaji.

³⁶ Gibitsete gobbara ubbannotera 7 diri hudera gide duunne agarrona; hatto assiniro gobba hude digawajjitanno» yiisi.

YOOSEEFI GIBITSETE GOBBARA GASHSHAANCHO IKKE SHOOMAMI

³⁷ Kuni coyi dancha ikkinota Feriooninna ledosi gashshaano affu.

³⁸ Ferioonino ledosi gashshaanora, «Maganu ayyaana afi'rinoha togoo mancho wole diafi'neemmo» yiinsa.

³⁹ Feriooni Yooseefira, «Konne coye Maganu atera leellishinohena, ate gedeehu egennaamunna hayyichu manchi wolu dino.

⁴⁰ Ate gashshooti'yara shoomoommohe; manni'ya baalunku atera hajajamo; ani ate ayirrinyu barcimi'ya callunni rooreemmo.

⁴¹ Kunnira ani ate, Gibitsete baatto baalate aana moohisoommohe» yiisi.

⁴² Feriooni mootete attami aanaho noo cuuicho angasinni fushshe Yooseefi angara wori; waajjo shaalado uddanono uddisiisisi; goowisirano culku cagaage worisi.

⁴³ Moote layinki faradi gaaresira ofoshshiisheennasi agaraasinesi, «Ayirradoho doogo fanne!» yitanni lallabbu. Yooseefi Gibitsete gobbara shoominohu kunni garinniiti.

⁴⁴ Ferioonino Yooseefira, «Ani moote ikkummorono, Gibitsete gobbara ati fajjittokkinni ayino milli yoonke» yiisi.

⁴⁵ Qoleno Yooseefira su'ma, «Tsaafinaati Peinaahi» yee fushshisi. Heliyopoliisi Katami qeesichi Phoxifeera beetto Asinaati galte ikkitannosi gede haa'risi. Yooseefi Gibitsete baatto baalate egennami.

⁴⁶ Yooseefi Gibitsete moote Ferioonira soqqama hanafi yannara dirisi sajjooho. Isino mootete mininni fule, Gibitsete baatto baala ha're towati.

⁴⁷ Lamalunku duuwu diri giddo baatto lowo geeshsha bati'ra gide laashshitu.

⁴⁸ Gibitsete baattora nooha lamalunku diri gide baala gamba asse katammate duuni; katammate gamba assine duunnoonni gidi qooxeessaho noo baattora loonsoonniho.

⁴⁹ Yooseefi baaru gami gede lowo geeshsha bati'ra gide gamba assi; gidu lowo geeshsha bati'rino daafira dikeennoonni.

⁵⁰ Yooseefira Heliyopoliisi Katami qeesichi Phoxifeera beetto Asinaati hudete diri daara albaanni lame labballi ooso iltusi.

⁵¹ Yooseefino, «Maganu qarra'ya baalankanna fiixa'ya qaageemmokki gede assinoe» yee bayiru beettisira su'ma Minaase yee fushshi.

⁵² Qoleno, «Qarramoommo gobbara Maganu ila uyinoe» yee layinki beettira su'ma Efireemi yii.

⁵³ Gibitsete gobbara duuwunnihu lamalunku diri saeenna,

⁵⁴ Yooseefi coyi'rinonte gede lamalu hudete diri hanafi. Gobba baalantera hude ubbu. Gibitsete gobba baalantera kayinni sagale no.

⁵⁵ Gibitsete gobbarano hude batidhuta mannu Feriooniwa daye, «Gide uyinonke» yee raari. Ferioonino Gibitsete manni baalunkura, «Yooseefiwa martine, isi yaanno'nere asse» yiinsa.

⁵⁶ Baatto baalate aana hude ubbu yannara, Yooseefi gidu noo minna baalanta fane Gibitsete mannira hiri; hudeno Gibitsete baattora lowo geeshsha batidhu.

⁵⁷ Baatto baalate aana hude lowo geeshsha batidhinohura, wole gobba mannino gide hidhara Gibitse Yooseefiwa dayi.