KALAQAMA 40 - Qullaawa Maxaafa

YOOSEEFI USURANYOOTU HAAQEE TIRI

¹ Shiima yanna gedensaanni, Gibitsete mootera ago xorshannohunna sagalete mini murrichi mootichinsa mootete aana sao assitu.

² Ferioonino lamunkura hanqe,

³ Yooseefi usurame noowa agaraasinete roorrichi mine massine usurranninsa gede assi.

⁴ Agaraasinete roorrichi Yooseefi anga woreennansa isi towatinsa. Usuru mine shiima barra keeshshituhu gedensaanni,

⁵ ago xorshitannorihunna sagalete mini murrichi usuru mine heedhe, mitto hashsha haaqee haaqiidhu; lamunku haaqee addi addi tiro afidhinote.

⁶ Yooseefi soodo gute insa noowa eanno woyite, yaaddanni noore afe,

⁷ «Techo mayira dadillitinoonni?» yee xa'minsa.

⁸ Insano, «Haaqee haaqii'ne tirannonkeha hoongeeti» yitusi. Yooseefino, «Haaqee tirate egenno aannohu Maganohona hanni haaqee'ne kulle"e» yiinsa.

⁹ Woyinete xajje xorshannohu, «Haaqeete mitte woyinete haqqicho afoommo;

¹⁰ haqqichote 3 sinna noose; sinnano daro fushshitanni heedhenni daraartu; woyinete hunduruurrono hakkawoyintenni le'u.

¹¹ Feriooni ago aganno finiincho anga amade noommo; laalo haa're giddo huunce, finiincho Ferioonira oommosi» yee kuli.

¹² Yooseefi, «Haaqeete tiro: 3 sinna, 3 barraati.

¹³ Sasu barri giddo moote usurunni tirannohe; saokkino agure bashshokki dargira qolannohe; alba ago xorshitanni soqqamattonte gede, Ferioonira agannore ati angakkinni aatto.

¹⁴ Coyi baalunku qinaannohe yannara kayinni hawittokkinni kaa'lie; Ferioonira hasaabbe, usuru mininni fuleemmo gede assie.

¹⁵ Ane Ibiraawootu gobbanni baxummokkinni wolqatenni abbinoonnie; kawiira dayummohu gedensaannino usuru mine tungannie gede assoommo bunshe dino» yiisi.

¹⁶ Sagalete mini murrichino Yooseefi ku'unni haaqee dancha gede asse tirinota afe, «Anino haaqee haaqii'roommo; waajjo buddeena worroonnita 3 masoowe duhe noommo.

¹⁷ Iimiidi masoowera Feriooni itannoti addi additi dancha sagale no; cea dagge umi'ya aana noo masoowe aana noo sagale ittanna afoommo» yiisi.

¹⁸ Yooseefino daware, «Tenne haaqee tiro: 3 masoowe 3 barraati.

¹⁹ Sasu barri giddo Feriooni usuru mininni fushshe, umokki mure haqqu aana sutannohe; maalakkino cea ittanno» yiisi.

²⁰ Hakku sayikki barri Ferioonira ilamino barra ikkino daafira, ledosi gashshaano baalantera jila jili. Feriooni woyinete xajje xorshannohanna sagalete mini murricha usuru mininni fushshiishe, ledosi gashshaano albira shiqqanno gede assi.

²¹ Woyinete xajje xorshannoha bashshosi dargira qolisi; isino Ferioonira agannore angasinni uyi.

²² Sagalete mini murricha kayinni sutamanno gede assi. Lamunku haaqee tiro Yooseefi yiino garinni wo'mitu.

²³ Woyinete xajje xorshannohu kayinni, Yooseefi hawinosi ikkinnina horontanni diqaaginosi.