KALAQAMA 38 - Qullaawa Maxaafa

YIHUDANNA TAAMAARI

¹ Hatte yannara Yihudi roduuwisiwiinni baxxe Hiira Katamira Adulaami mare hee'ri.

² Hakkiicho Yihudi Kana"aanichu Shua beetto lae baxe adhi.

³ Iseno godobbe labbaa beetto iltu; su'mano Eeri yee fushshisi.

⁴ Layinkimeeshshono godobbe labbaa beetto iltu; su'mano Onaani yite fushshitusi.

⁵ Xaano godobbe labbaa beetto iltu; su'mano Sheela yite fushshitusi; iso iltinohu Yihudi Akiziibi yinanni katamira hee'reennaati.

⁶ Yihudu bayiru beettisi Eerira Taamaari yinanni beetto haa'risi.

⁷ Eeri Kaaliiqi giwanno coye assino; kunnira Kaaliiqi qoome shiinosi.

⁸ Yihudi Eeri rodoo Onaani, «Marte rodiikki galte gashshi; rodiikkirano sircho sayisisi» yiisi.

⁹ Onaani kayinni ilamanno beetti isiha ikkannokkita afe, rodiisi galte ledo galanno yanna baalantera sircho ikkannoricho uulla dunanno.

¹⁰ Kaaliiqi konne coye giwino daafira, isono qoome shii.

¹¹ Hakkunni gedensaanni, Yihudi beettisi galte Taamaarira, «Beetti'ya Sheela lopha geeshsha hadhe annikki mine ofolli» yiise. Hatto yiinohu isino roduuwisi gede reyannoe yee waajjinohuraati. Taamaarino hadhe annise mine ofoltu.

¹² Shiima yanna gedensaanni Shua beetto Yihudi galte reyitu. Yihudino jawaatihu gedensaanni jaalisi Adulaamichu Hiira ledo ge'reewu orda haxxannosiriwa Temina Katama ha'ri.

¹³ Mannu Taamaarira, «Ballikki ge'reewu orda haxi'rara Temina ha'ranni no» yee kulise.

¹⁴ Kunnira, Taamaari gunnimmate uddano soorridhe alba uddanotenni diphite Temina massitanno doogo gama Enayimi Katama e'nanniwa marte ofoltu. Hatto assitinohu Sheela adhate iille hee'reennanni Yihudi adhannota hasi'rinokkita affinohuraati.

¹⁵ Alba uddanotenni diphite noo daafira, Yihudi afi yannara foortanno mancho labbusi.

¹⁶ Beettisi galte ikkitinota afikkinni ofoltinowa doogote gamira shiqqi yee, «Eeggatena ballo ate ledo galoni?» yee huucci'ri. Iseno, «Hedoottore wonshummahero maricho aattoe?» yitusi.

¹⁷ Isino, «Saada'ya giddonni meu wilii'licho soyemmohe» yiise. Iseno, «Soyattoe geeshsha maricho amadisiisattoeyya?» yitusi.

¹⁸ Isino, «Maricho amadisiisohe?» yee xa'mise. Iseno qolte, «Su'makki aanaho borreessinoonnita goowikki qalawatenna angakki noo siqqicho uyie» yitusi. Isino yitinore ee ledose gali; iseno isira godobbu.

¹⁹ Hakkiinnino ka'e hadhe, uddano albisenni hoo'lite gunnimmate uddano uddidhu.

²⁰ Shiima yanna gedensaanni, Yihudi amadisiisinore manchotewiinni haa're abbannosi gede, jaalasi Hiira meu wilii'licho anga wore soyi. Hiira kayinni ise afara didandiino.

²¹ Isino gobbate mannira, «Enayimi Katama e'nanni doogo gama ofoltannoti foora mancho hiikka higgu?» yee xa'mi. Mannuno, «Kawiicho foora mancho dino» yiisi.

²² Kunnira, manchu galagale Yihudiwa mare, «Mancho hoogoommo; gobbate mannino, ‹Hattoo mancho konne dino› yiinoe» yee kulisi.

²³ Yihudino, «Kune meu wilii'licho soommose; ati kayinni ise diafootto; mannu oso'lannonkena amadote adhitinori gatosena aguri» yii.

²⁴ Sasu agani gedensaanni Yihudira, «Beettikki galte Taamaari foortannota ikkitino; foorretennino godobbino» yine kullisi. Yihudino, «Gobbaanni fushshitine giirre» yii.

²⁵ Iseno haa'ne gobbaanni fushshinanni hee'neenna, «Godowoommahu konni uduunni anniraati; tini qalawatenna tini siqqicho ayetero lai» yite ballisera sokku.

²⁶ Yihudino uduunnu umisiha ikkinota afe, «Beettiya Sheela adhannosekki gede hooloommo daafira, so'ro anete; ise halaalaanchotena agurrese» yii. Isino hakkunni ka'a ise ledo digalino.

²⁷ Iltanno yanna iillituta godobbe noohu lakkuwa ikkinota anfi.

²⁸ Iltanni heedheenna mittu balaxe anga fushshi; ilshiishshannotino duumo heqicha haadhe angasira gurdite, «Kuni balaxe ilamanno» yitu.

²⁹ Ikkollana, anga giddora qo'leenna, rodiisi balaxe ilami. Ilshiishshannotino, «Mayira hiiqqite fulitto?» yite su'ma, «Faareesi» yite fushshitusi.

³⁰ Isi gedensaanni, angate duumo heqicha usurroonnihu rodiisi ilami. Isira su'ma, Zaara yite fushshitusi.