KALAQAMA 36 - Qullaawa Maxaafa

EESAWU SIRCHO

¹ Edoomi yinannihunniti Eesawu ilama aante noote:

² Eesawu Kana"aanootu seenne adhi; insano Hitichu Elooni beetto Aada, Hiwichu Tsibaooni beetti Aana ilinoti Ohooliibamaatinna,

³ Nebayooti rodoo Ismaeeli beetto Besemaatiiti.

⁴ Aada Eesawura Elfaazi iltusi; Besemaati Raagueeli iltusi.

⁵ Ohoolibaama Yeuusi, Yailaaminna Qorahi iltusi. Kuri baalunku Eesawura Kana"aani gobbara ilantino oosooti.

⁶ Hakkunni gedensaanni, Eesawu meentosi oososi, minesi noo manna baalanka, saadasinna Kana"aani hee're afi'rino jajja baalanka adhe rodiisi Yaiqoobiwiinni fafe ha'ri.

⁷ Hatto assinohu isiranna Yaiqoobira lowo saada noonsa daafira, baatto ruukkiteennansaati.

⁸ Kunnira, Edoomi yinannihu Eesawu ha're ilaalaame gobbara Seiiri hee'ri.

⁹ Seiiri Ilaalira hee'rannohunniti Edoomootu anni Eesawu ilama aante noote:

¹⁰ Eesawu galte Aada iltinohu Elfaaziiti; Eesawu galte Besemaati iltinohu Raagueeliiti.

¹¹ Elfaazi ooso Temaani, Omaari, Tsefo, Gaitaamiitinna Qenaaziiti.

¹² Eesawu beetti Elfaazira, Timinai yinanniti irkote galte noosi; ise Elfaazira Amaaleqi iltusi; kuri Eesawu galte Aadara beettise oosooti.

¹³ Raagueeli ooso: Nahaati, Zaara, Shaamaatinna Miizaati; kuri Eesawu galte Besemaati beetti Raagueeli oosooti.

¹⁴ Aana beettinna Tsibaooni beetti beetto Ohoolibaama Eesawura iltino ooso Yeuusi, Yalaamiitinna Qorahiiti.

¹⁵ Eesawuhu umi beetti Elfaazi ga're albisooti: Temaani, Omaari, Tsefo, Qenaazi,

¹⁶ Qorahi, Gataamiitinna Amaaleqiiti; kuri Edoomi gobbara Elfaazi sirchi albisootaati; insano Eesawu galte Aada beetti oosooti.

¹⁷ Eesawu beetti Raagueeli ga're albisooti: Nahaati, Zaara, Shaamanna Miizaati; insano Eesawu galte Besemaati beetti oosooti.

¹⁸ Eesawu galte Ohoolibaama iltino ga're albisooti: Yeuusi, Yalaamiitinna Qoreeti; kuri Aana beetto Ohoolibaama Eesawura iltino ga're albisootaati.

¹⁹ Kuri baalunku Edoomi yinannihu Eesawu oosootinna ga'rete albisootaati.

SEIIRI SIRCHO

^20-21 Edoomi gobbara heedhannori Seiiri ooso Horaawootu albisooti: Looxaani, Shobaali, Tsibaooni, Aana, Diishooni, Ezeerinna Diishaaniiti.

²² Looxaani oosono: Hoorinna Heemaamiiti; Looxaani rodoo Timinaiiti.

²³ Shobaali ooso Aliwaani, Manahaati, Eebaali, Shiifootinna Onaamiiti.

²⁴ Tsibaooni ooso Ayaatinna Aanaati. Aanano annisi harre allaalanni hee're halallitte gobbara iibballicho afi'rino manchooti.

²⁵ Aana beetti Diishooniiti; meya beettosi Ohooliibaamaati.

²⁶ Diishooni ooso Hemidaani, Eshibaani, Yitiraaniitinna Keraaniiti.

²⁷ Ezeeri ooso Bilihaani, Sawaaniitinna Aqaaniiti.

²⁸ Diishooni ooso Uutsitinna Aaraaniiti.

²⁹ Horaawootu albisooti aante nooreeti: Looxaani, Shobaali, Tsibaooni, Aana,

³⁰ Diishooni, Ezeeriitinna Diishaaniiti; kuri baalunku Seiiri baattora albisoota ikkitino Horaawooti ilamaati.

EDOOMI MOOTOOLLA

³¹ Israeelete gobbara moote nookki waro, Edoomi gobba mootoolla aante nooreeti:

³² Edoomi gobbara Bioori beetti Beelai moohi; katamisi su'mino Diinihabaati.

³³ Beela reenna isi darga Bootsirichu Zaara beetti Yobaabi moohi.

³⁴ Yobaabino reenna, isi darga Temaani gobbahu Hushaami moohi.

³⁵ Hushaamino reenna isi darga Midiyaami gosa Moaabi xawira qeelihu Beedaadi beetti Hadaadi moohi. Katamisi su'mino Awiitiiti.

³⁶ Hadaadino reenna isi darga Masireeqichu Semila moohi.

³⁷ Semilano reenna isi darga Efiraaxisi Wayi mule hee'rannohu Rehobooti ilama ikkinohu Shauuli moohi.

³⁸ Shaulino reenna isi darga Akiboori beetti Ba"aali Hanaani moohi.

³⁹ Akiboori beetti Ba"aali Hanaanino reenna isi darga Hadaari moohi. Katamisi su'mino Faauuti. Galtesi su'mi Mehexaabieeliiti; amase Maxireedi Me-Zahaabi iltinote.

⁴⁰ Aante noori Eesawu sirchi ga're albisooti, gosa gosansanna heedhanno gobba su'minni woshshantanno. Insano: Timina, Aliwa, Yeteeti,

⁴¹ Ohoolibaama, Eela, Finooni,

⁴² Qenaazi, Temaani, Mibitsaari,

⁴³ Magidieeliitinna Iraamiiti. Heedhanno gobba su'minni woshshantannori Edoomi sirchi ga're albisooti insaati. Edoomootu anni Eesawu isooti.