KALAQAMA 35 - Qullaawa Maxaafa

MAGANU YAIQOOBI BEETELI MAASSI'RISI

¹ Maganu Yaiqoobira, «Ka'e Beeteli hadhe hakkiicho hee'ri; rodiikki Eesawuwiinni xooqqe ha'ritto yannara leellummohe Maganira kakkalote darga seekkie» yiisi.

² Yaiqoobino maatesiranna ledosi noorira baalaho, «Wole gosa maganna mereeri'nenni hoolle; biso'neno hayishshidhe; imaana'neno soorridhe.

³ Qarri'ya yannara macciishshinoehura, ha'rummo doogorano ledo'ya ha'rihura Maganoho kakkalote darga seekkeemmona, ka'e Beeteli ha'nona» yiinsa.

⁴ Insawa noota wole gosa maganna duuchantanna maccansara noo buticha fushshite Yaiqoobira uyitu; isino Sekeemi mule noo haqqicho qullaawate hunda waami.

⁵ Hakkiinni ka'e hadhuta, Maganu qooxeessinsara noo manni wodanira waajjille naqino daafira kisinonsahu dino.

⁶ Yaiqoobi ledosi noo manni ledo Kana"aani noohuwa Beeteli yinanni katama Looza iilli.

⁷ Yaiqoobi hakkiicho kakkalote darga seekke, «Eeli Beeteli» yee su'ma fushshi; hatto yiinohuno, rodiisiwiinni xooqe ha'ranna Maganu leellinosi darga ikkinohuraati.

⁸ Ribiqa awuuto Deboora reyiteenna, Beetelira wodiidoonni qilxote mule madaarrise; hakko dargira su'ma Alonbaakuuti yine fushshini.

⁹ Yaiqoobi Mesiphexoomiyunni higi yannara, Maganu layinkimeeshsho leelle maassi'risi.

¹⁰ Qoleno, «Su'mikki Yaiqoobiiti; kunni ka'a su'makki Yaiqoobi yaa agurre, Israeeli yinona» yii. Kunnira Maganu Israeeli yee woshshisi.

¹¹ Qoleno Maganu, «Wo'manka Dandeemmo Magani aneeti; ili, ilami; lowo manni anna ikki; mootoolla atewiinni fultanno.

¹² Abirihaamiranna Yisihaaqira oommo baatto aterano eemmo; ate gedensaannino sirchikkira eemmo» yiisi.

¹³ Maganu isi ledo hasaawa gudihu gedensaanni agure ha'ri.

¹⁴ Yaiqoobino Maganu ledosi hasaawi darga sooddicha uurrisi; Kaaliiqira baxxinoha assate agattote fushshaatenna zayite aanaho duni.

¹⁵ Hakkonne Maganu ledosi hasaawi darga Beeteli yii.

RAAHEELI REYITU

¹⁶ Yaiqoobinna maatesi Beetelinni ka'e, Efiraata iillitara shiimuri gate hee'reenna, Raaheeli ilate game amadduse; gameno lowo geeshsha kaajjituse.

¹⁷ Game shetisse heedheennase ilshiishshannoti, «Wole labbaa beetto iltanni noottana jawaati» yituse.

¹⁸ Iseno reyitara haafattanni heedhe, qaaqqoho su'ma, «Beeniooni» yite fushshitusi; annu kayinni, «Biiniyaami» yiisi.

¹⁹ Raaheeli reyiteenna, Efiraata massitanno doogo qaccera xa Beeteliheme yinanni katamira madaarrise.

²⁰ Yaiqoobino waammase aana sooddicha uurrisi; hakko sooddichi techo geeshsha Raaheeli waamma leellishanno.

²¹ Israeelino hakkiinni kae, dukkanasi Edeeri Shaera ka'aanni masse qasi'ri.

YAIQOOBI OOSO

²² Israeeli hattenne gobbara hee'ri yannara, Roobeeli mare annisira irkote galte Biliha ledo goxi; Israeelino konne coye macciishshi. Yaiqoobi ooso kiiro tonaa lameho.

²³ Liya ooso giddonni Yaiqoobira bayiru beetti Roobeeliiti; maa'nuullisi Simiooni, Leewi, Yihudu, Yisaakooriitinna Zaabilooniiti.

²⁴ Raaheeli ooso Yooseefiitinna Biniyaamiiti.

²⁵ Raaheeli borojjicho Biliha iltino ooso Daaniitinna Nifitaalemiiti.

²⁶ Liya borojjicho Zilfa iltino ooso Gaadiitinna Aseeriiti. Tini ooso Yaiqoobira Mesiphexoomiyaho ilantinote.

YISIHAAQI REYI

²⁷ Yaiqoobi Kebirooni yinanniwa Qiriyaati Arbai mule Memire noohuwa annisi Yisihaaqiwa dayi; kuni dargino alba annisi Yisihaaqinna ahaahisi Abirihaami heedhinowaati.

²⁸ Yisihaaqi 180 diro hee'ri.

²⁹ Geedhe dirono duuwe mannu aalo ikkeenna, oososi Eesawunna Yaiqoobi madaartusi.