KALAQAMA 34 - Qullaawa Maxaafa

YAIQOOBI OOSO RODOONSARA RABBISSINO RABBA

¹ Mitto barra Yaiqoobira Liya iltinosi beetto Diina hatte gobba seenne la'ara fultu.

² Gobbate gashshaanchi Hiwichu Hamoori beetti Sekeemi afe, wolqatenni amade macca hunise.

³ Qoleno baxillisenni amadame isera wodana hagiirsiisanno coye coyi'rise.

⁴ Sekeemino annisi Hamoorira, «Tenne beetto haa'rie» yee kuli.

⁵ Yaiqoobi beettosi Diina Sekeemi shollishinoseta macciishshi yannara, oososi saada adhite halallira doyite hadhe no; isino oososi dagga geeshsha cince agari.

⁶ Sekeemi anni Hamoori konne coye Yaiqoobi ledo hasaawara dayi.

⁷ Yaiqoobi oosono konne coye macciishshite halallinni daggu; Sekeemi rodoonsa Diina shollishinohura lowo geeshsha dadillite fooggaltu; kuni coyi Israeelete gobbara saalahonna assate hasiisannokkiho.

⁸ Hamoorino, «Beetti'ya Sekeemi beetto'ne baxillinni amadaminona, eeggatena ballo galte ikkitannosi gede uuyyesi» yee huucci'ri.

⁹ Balluwa ikkineemmo gede, beetto'ne uuyyenke; ki'neno ninke seenne adhe.

¹⁰ Baattonke baatto'neetina ninke ledo heedhe; umi'ne baatto amaxxitine dadda'litinanni hasidhiniwa heedhe.

¹¹ Sekeemino Diina anniranna roduuwisera, «Ki'nella maahoyye yitiniero, xa'mitinanniere eemmo.

¹² Mini-woronna miine abbi yiniero, xa'minie geeshsha eemmona, tenne beettolla uuyye"e» yii.

¹³ Sekeemi rodoonsa Diina shollishinohura Yaiqoobi ooso isiranna annisi Hamoorira godowita godowa amadde,

¹⁴ «Rodoonke barciminokki manchira aa saala ikkitinohura, hatto assa didandiineemmo.

¹⁵ Konne coye maahoyye yineemmohu ki'ne ninke labbinanni gede, labballo'ne baalanka barcimshiishshinirooti;

¹⁶ hakkunni gedensaanni, seennenke uyineemmo'ne; ki'ne seenneno adhineemmo; ki'ne ledo mitto manna ikkine hee'neemmo.

¹⁷ Yinoommota macciishshitine barcima gibbiniro kayinni beettonke adhine ha'neemmo» yitunsa.

¹⁸ Hamoorinna beettisi Sekeemi insa yitino coye sumuu yitu.

¹⁹ Sekeemi Yaiqoobi beetto baxino daafira, konne coye assate dikeeshshino; isi annisi mine noori baalunkunni roore wolqaataamoho.

²⁰ Hamoorinna beettisi Sekeemi kataminsaha songote gudumaale e'e, kataminsa mannira,

²¹ «Kuni manni keeraanotena baattonkera hee'rona; ka'a kawa hadhe dadda'litona; kune baattonke hala'ladote; seennensa adhine, insarano seennenke uyinonsa.

²² Ikkirono kuni manni ninke ledo hee'rannohunna ninkeno insa ledo mitto manna ikkineemmohu insante gede ninkehuno labbaahu baalu barcimirooti.

²³ Hatto assinummoro, saadansanna jajjinsa baalu dininkeha ikkanno? Kunni daafira yitinore maahoyye yineenna ledonke heedhona» yitu.

²⁴ Katamu gudumaale fulino manni baalunku Hamoorinna beettisi Sekeemi abbitino mala macciishsheenna labballu baalu barcintu.

²⁵ Sayikki barra barcintino mada qoortukkinni heedheenna, Diina roduuwi Simiooninna Leewi bise adhite mittuno afikkinni katama e'e, labballo baalanka shite guddu.

²⁶ Hamoorinna beettosi Sekeemino shitu; rodoonsa Diinano Sekeemi mininni fushshite adhite hadhu.

²⁷ Wolootu Yaiqoobi ooso rodoonsa Diina shollishshinorinni kainohunni e'e katama saantu.

²⁸ Me"enna ge'reewo, lalonna harre hattono katamahonna katamu gobbaanni noo jajja baala gudhitu.

²⁹ Jironsa baalanta, qaaqquullensanna meentonsa baala qafaddu; mine noore baala soqqe guddu.

³⁰ Yaiqoobi Leewiranna Simioonira, «Tenne gobbara heedhanno Kana"aanootinna Ferizooti mereero su'ma'ya boshshitinoonni; anera lowo manni dinoe; gamba yite amadduero, anenna maate'ya guddanno» yii.

³¹ Insa kayinni, «Rodoonke fooru meenti gede assinanna worre la'noyya?» yite dawartusi.