KALAQAMA 33 - Qullaawa Maxaafa

YAIQOOBI EESAWU LEDO XAADI

¹ Yaiqoobi gotti yee la"anno woyite, Eesawu 400 manna hoodete adhe daanna afi. Oososino beehe Liya, Raaheelinna lamenta irkote meentisi anga wori.

² Umo asse lamenta irkote meentosi oosonsa ledo albaanni sayisi; hakkiinni aanche Liyanna oosose sayisi; Raaheelinna Yooseefi kayinni baalunkura gedensaanni hadhanno gede assi.

³ Yaiqoobi wo'munkura albaanni hige ha'ri; rodiisi Eesawuwa gamba yiiti, albunni baatto kisanni 7 hige heeshshi gotti yaanni keere ha'risi.

⁴ Eesawu kayinni, isi ledo xaadara dode shiqqi yee, goowisira marmarame sunqisi; lamunku hagiirrunni kainohunni wi'litu.

⁵ Eesawu wirri yee la"anno woyite meentonna ooso afe, «Kuni ledokki noohu aye mannaatiyya?» yii. Yaiqoobino, «Mooticha'ya! Kuri Maganu shaqqillisinni uyinoe oosooti» yee dawari.

⁶ Hakkunni gedensaanni, lamenti irkote meentisi oosonsa ledo daye umo heeshshi yee keere haa'ri.

⁷ Aantete Liyanna oosose daye umo heeshshi yee keere haa'ri; goofimarchoho Yooseefinna Raaheeli daye umo heeshshi yee keere haa'ri.

⁸ Eesawuno, «Alba qolle gannanna doogo xaadummo saada mayinniteyya?» yii. Yaiqoobino, «Mooticha'ya, hatti saada haa'rattoeha ikkiro yee atera soommohete» yii.

⁹ Eesawuno, «Rodoo'ya! Anera ikkitanno geeshshi saada nooena, atehu ateralla ikkohe» yii.

¹⁰ Yaiqoobi kayinni, «Dee'nina, halaalinta haa'rattoeha ikkiro eeggatena afansha'ya adhie; baxillekki leellishsheennae, albakki la"a anera Maganu alba la"ate gedeeti.

¹¹ Kunnira, eeggatena konne shiqishoommohe afansha adhie; Maganu shaqqillisinni hasiisannoere baala uyinoena» yii. Yaiqoobi duu're huucci'rino daafira, Eesawu afanshasi adhi.

¹² Eesawuno, «Kai ha'nona; ani albaanni hige ha'reemmona» yii.

¹³ Yaiqoobi kayinni, «Mooticha'ya, ooso jawaattinore ikkitinokkita ati afootto; qansidhanno saadara, wilii'linsaranna siittinsara qoropha hasiissannoe; mitto barra nafa muddine ganniro saada baalanti gooffanno.

¹⁴ Kunnira, ani suutunni hoodekki dayemmona, mooticha'ya eeggatena ati balaxxe ha'ri; saadatenna oosote wolqa deerrinni qaafanni Seiiri iilleemmohena» yii.

¹⁵ Eesawuno, «Hatto ikkiro ane manni giddonni shiima manna atewa agure ha'roni?» yii. Yaiqoobi kayinni, «Atilla haa'rittoe woyite woliri mitturino dihasiisannoe» yii.

¹⁶ Eesawu hakko barranni Seiiri ha'rara kai.

¹⁷ Yaiqoobi kayinni, Sukooti hari; hakkiicho umisira mine mi'ne saadateno hoowe hoophi; kunninni kainohunni hakkonne darga Sukooti yini.

¹⁸ Yaiqoobi Mesiphexoomiyunni higi yannara Kana"aani gobba Sekeemi yinanni katama keerunni iilli. Hakkiichira mare katamaho albaanni noo xawira baxxisi'ri.

¹⁹ Dukkana qasi'ranno uulla Sekeemi anni Hamoori oosowiinni 100 kinchu birrinni hidhi.

²⁰ Hakkiichono kakkalote darga seekke, Maganu Israeelete Maganooti yii.