KALAQAMA 26 - Qullaawa Maxaafa

YISIHAAQI GERAARAHO HEE'RI

¹ Abirihaami yannata agurranna layinkimeeshsho wole hudeno ubbu; Yisihaaqino Geraara Filisxeemete mootewa Abemeleekiwa ha'ri.

² Hakkiicho Kaaliiqi isira leelle, «Gibitsete gobba hadhootina, ani kuleemmohe gobbara hee'ri.

³ Kawiicho hee'ri; anino ledokki hee'reemmo; maassi'reemmohe; tenne baatto baala ateranna sirchikkira eemmo; annikki Abirihaamira xaaroommo xaarono wonsheemmo.

⁴ Sirchokkino gordu beeddahe gede asse batiseemmo; tenne baatto baalano sirchikkira eemmo; baattote aana heedhanno gosa baala insanni maassantanno.

⁵ Ate maassi'reemmohu, Abirihaami ani yoommota macciishshe hajajo'ya, seera'yanna woga'ya agadhino daafiraati» yiisi.

⁶ Yisihaaqino Geraara hee'ri.

⁷ Hatte gobba manni Ribiqa lae, «Ise atera maakkiiti» yee xa'misi. Isino qole, «Rodoo'yaati» yiinsa. Hatto yiinohuno, Ribiqa lowo geeshsha xuma ikkitino daafira, hatte gobba manni, «Ise hasi're shaannoe» yee waajjino daafiraati.

⁸ Hakkiicho lowo yanna hee'rihu gedensaanni, Filisxeemete moote Abemeleeki masikootete widoonni qole la"anni hee're, Yisihaaqi Ribiqa kikkisanna afi.

⁹ Kunnira Abemeleeki Yisihaaqi woshshiishe, «Agari, Ribiqa atera galtekkiitini! Mayira, ‹Rodoo'yaati› yiittoyya?» yee xa'misi. Yisihaaqino, «Galte'yaati yuummoro isera yine shinannie yee waajjoommo daafiraati» yee dawari.

¹⁰ Abemeleekino, «Togo mayira assittonke? Mannu galtekki ledo goxara shiimurilla gatino; ninke saote giddora eessite hoogoottonke» yii.

¹¹ Qoleno Abemeleeki, «Konne mancho woy galtesi kisannohu reyanno» yee manna qorophisiisi.

¹² Yisihaaqi hattenne gobbara jajja loosi'ri; Kaaliiqi maassi'rinosi daafira, hakko dironni 100 ero afi'ri.

¹³ Jiro jirote aana lexxitanna, lowo geeshsha dureessa ikki.

¹⁴ Meu, ge'reewunna lalu, hattono borojju lowo geeshsha bati'rinosi daafira, Filisxeemete gosa hinaasse,

¹⁵ annisi Abirihaami borojji untino bu'a baalate bushsha wonshite beeshshite huntu.

¹⁶ Abemeleekino Yisihaaqira, «Ninkenni roore wolqaataamo ikkitanni noottona, gobbankenni ho'li» yiisi.

¹⁷ Yisihaaqino hakkiinni agure ha're, Geraaru lagicha teesso assi're hee'ri.

¹⁸ Hakkiichono Abirihaami lubbotenni hee're unsiisinoti reyihu gedensaanni kayinni Filisxeemootu beeshshite huntino bu'a no; Yisihaaqi hatte bu'a fannanni gede assi; bu'ano annisi fushshino su'minni woshshi.

¹⁹ Yisihaaqi borojji lagichaho bue unte dancha waa afidhu.

²⁰ Geraaru gobba allaalaasine Yisihaaqi allaalaasine ledo, «Wayi ninkeho» yitanni yekkeerantu. Kunnira Yisihaaqi hattenne bue su'ma Eseeqi yii.

²¹ Wole bueno untu; isenni kainohunnino galagalte giwantino daafira, Yisihaaqi su'mase Sixina yii.

²² Hakkiinnino shiimare sa'e wole bue untu; isenni kainohunni giwantinokki daafira su'mase, «Xa Maganu halashshinonke; baattote aanano bati'neemmo» yiino daafira tenne buera su'ma Rehobooti yii.

²³ Yisihaaqi hakkiinni kae Bersaabehi ha'ri.

²⁴ Hakko hashsha Kaaliiqi Yisihaaqira leelle, «Ani annikki Abirihaami Maganooti; ani ate ledo noommona waajjitooti! Maassi'reemmohe; soqqamaanchi'ya Abirihaami daafira yee sirchokki batiseemmo» yiisi.

²⁵ Yisihaaqi hakkiicho kakkalote darga seekke Kaaliiqiha qullaawa su'masi woshshanni magansi'ri; dukkanano kaasi'ri; borojjisi hakkiichono bue untu.

YISIHAAQINNA ABEMELEEKI NAMOONTINO GARA

²⁶ Abemeleeki, amaalaanchisi Ahuzeetinna olantosi hajajaanchi Fiikooli ledo Yisihaaqinni xaadara dayi.

²⁷ Yisihaaqino, «Ki'ne ane digibbine gobba'nenni fushshitine huntinie? Xa anewa mayira dagginiyya?» yiinsa.

²⁸ Insano, «Kaaliiqi ledokki noota seekkine anfoommo; kunnira ate ledo namoomme hee'rate gondooro e'nammora hendoommo; kunnira amo gondooro e'ne,

²⁹ mimmitonke gawajjineemmokki gede assinona; ninkeno ate aana mitte beebbano diassinoommo; wo'manka woyite dancha ikkinnina busha coye diassinoommohe; gobbankennino keerunnilla fulootto; kune ate Kaaliiqino maassi'rinohe» yitusi.

³⁰ Hakkunni gedensaanni, Yisihaaqi jila jileennansa itte aggu.

³¹ Layinki soodo gutte ka'e mimmitu ledo gondooro e'u; Yisihaaqi geegiisseennansa, «Keerunni» yite hadhu.

³² Hakko barrano Yisihaaqi soqqamaasine dagge u'mitino bue daafira coyidhanni, «Waa afi'noommo» yite kultusi.

³³ Isino hatte buera su'ma, «Saabehi» yee su'ma fushshi. Kunni daafira katamu su'ma techo geeshsha «Bersaabehi» yine woshshinanni.

EESAWU GOSASIRA GOBBAYIDINNI SEENNE ADHI

³⁴ Eesawu 40 diro ikkisita Bieeri beetto Yoodiitinna Elooni beetto Baasemaati adhi; lamenti Hitootaho.

³⁵ Insa lamenti Yisihaaqinna Ribiqa lowo geeshsha dadillisino.