KALAQAMA 15 - Qullaawa Maxaafa

MAGANU ABIRAAMI LEDO EINO GONDOORO

¹ Hakkunni gedensaanni Kaaliiqi Abiraamira ajuujatenni, «Abiraami! Waajjitooti; wonqo ikke dano baalantenni agareemmohe; lowo maassono eemmohe» yaanna macciishshi.

² Abiraamino, «Kaaliiqa Mooticha'ya! Ila nooekkihura aattoe maasso ma"assitannoe? Jiro'ya ragi'rannohu Demaasiqote manchi soqqamaanchi'ya Elieezeeriiti» yii.

³ Qoleno, «Anera ila dioottoe; kuneeti, soqqamaanchi'ya ragi'raeraati» yii.

⁴ Kaaliiqi kayinni, «Ragi'rannohehu konne ikkikkinni, ati ilatto beettooti» yee coyi'ranna macciishshi.

⁵ Hakkiinnino gobbara haa're fushshesi, «Iima higge gordo lai; beeddahe kiirattora dandaattoha ikkiro kiiri; sirchikki hatto ikke bati'ranno» yiisi.

⁶ Abiraami Kaaliiqa amma'ni; amma'nasino keeraanchimmate kiirantusi.

⁷ Kaaliiqi qole, «Tenne baatto ragi'ratto gede aammohera Keledootu gobbanni Uurinni fushshoommohehu Kaaliiqi aneeti» yiisi.

⁸ Abiraami kayinni, «Kaaliiqa Mooticha'ya! Tenne baatto ragi'reemmota mayinni afeemmo?» yee xa'mi.

⁹ Kaaliiqino, «Sasu diri adde, sasu diri meichonna sasu diriha ge'rechu goco, hattono bukukkaamanna lemboolcho haadhe abbi» yiisi.

¹⁰ Abiraamino kore baala Kaaliiqiwa haa're masse lame lamewa dare beehi; beehinore lame ragaanni qote qoteho wori; cea kayinni lamewa dibeehino.

¹¹ Doowiru maala itara dirri; Abiraami kayinni doowiro shorre aaninni hooli.

¹² Arrishsho e'anni heedheenna, Abiraami lowo goxano amaddusi; hattenne giddo waajjillunna masillu doyissisi.

¹³ Kaaliiqi Abiraamira, «Sirchikki allaggu gobbara wosi'ne hee'rannota seekkite afi; hakkiichono borojjimmatenninna kadamatenni 400 diro hee'ranno.

¹⁴ Ani kayinni, insa borojje assi'ranno manna qorichisheemmo; hakkunni gedensaanni lowo jiro adhite hatte gobbanni fultanno.

¹⁵ Atino diro duubbe garunni annuwakki gede mannu aalo ikkatto.

¹⁶ Sirchikki kawiichira galagale higannohu 400 diri gedensaanniiti; hakkeeshsha keeshshitannohuno Amooraawoota cubbinsa bati'reenna qorichishe tenne gobbanni fushshe hunammo geeshshaati» yiisi.

¹⁷ Arrishsho e'eenna tunsihu gedensaanni, booso wiliilenna buwanno caabbichi lamewa beenki maali mereeroonni hige sai.

¹⁸ Hakko barra Kaaliiqi Abiraami ledo gondooro eanni, «Gibitsete danninni lowohu Efiraaxisi Wayi geeshsha noo baatto sirchikkira eemmo.

¹⁹ Eemmo'netino Qenaawootu, Qeneezootu, Qadimonootu,

²⁰ Hitootu, Ferizootu, Refootu,

²¹ Amooraawootu, Kana"aanootu, Gergesootu, Iyaabuusootu baattooti» yiisi.