KALAQAMA 12 - Qullaawa Maxaafa

ABIRAAMI WOSHSHAMA

¹ Kaaliiqi Abiraami, «Gobbakki agurte, fiixikkinna ayiddikkiwiinni baxxite, ani leellisheemmohe gobba ha'ri» yiisi.

² Wolqaataame gosa asseemmohe; maassi'reemmohe; su'makki egennaminoha asseemmo; wolootahono maasso ikkatto;

³ Maassidhannohere maassi'reemmo; runtannohere rumeemmo; baattote aana heedhanno daga baalanti ate widoonni higge maassantanno.

⁴ Abiraami Kaaliiqi kulinosinte gede, Kaaraaninni fule ha'ri; isi hatte yannara 75 diri manchooti; Looxino ledosi ha'ri.

⁵ Abiraami, galtesi Saarayinna rodiisi beetti Looxi Kaaraani heedhe afidhino jajjanna soqqamaasinensa baala adhite Kana"aani gobba hadhu. Kana"aani iillitu yannara,

⁶ Abiraami Sekeemi nootewa More haqqicho qullaawanniwa iilla geeshsha ha'ri; hatte yannara Kana"aanootu hatte gobbara heedhanno.

⁷ Kaaliiqi Abiraamira leelle, «Tenne baatto sirchikkira eemmohe» yiisi. Kunnira, Abiraami leellinosi Kaaliiqira hakko darga kakkalote darga seekki.

⁸ Hakkiinnino kae, Beeteli Katamira soojjaatoonni ilaalaame gobba fuli; Beeteli galchimira, Gayi Katama soojjaatira qole agure dukkana dukka'ni; hakkiicho kakkalote darga seekke Kaaliiqiha qullaawa su'ma gane magansi'ri.

⁹ Dargunni darga sa"anni Negebi dayi.

ABIRAAMINNA SAARAYI GIBITSETE GOBBARA

¹⁰ Kana"aani Gobbara hude ubbu; hude wolqissuta Abiraami hudete yanna hakko sayisara yee Gibitse ha'ri.

¹¹ Abiraami Gibitse iilla rahi yannara, galtesi Saarayira, «Ati lowo geeshsha xuma ikkoottata afoommo.

¹² Gibitsootu ate affanno yannara, ‹Tini galtesiiti› yite ane shitannoe; ate kayinni lubbotenni hee'rattara agurtannohe.

¹³ Kunni daafira, atenni kainohunni lubbotenni hee'reemmo gedenna dancha illenni la'annoe gede, ‹Ani rodoosiiti› yiinsa» yiise.

¹⁴ Gibitse e'u yannara, Gibitsootu Abiraami galte lowo geeshsha xuma ikkitinota affu.

¹⁵ Feriooni ledo gashshaano xumillese affe, Ferioonira kultu; iseno mootete minira haadhe massitu.

¹⁶ Isenni kainohunni Gibitsete moote Abiraami dancha illenni laisi; kunnira ge'reewo, me"e, lalo, harre, gaala, meyanna labbaa soqqamaasine uyisi.

¹⁷ Ikkollana, Abiraami galte Saarayinni kainohunni Kaaliiqi Feriooniranna minisi manni baalaho shetisanno dhibba soyi.

¹⁸ Hakkunni gedensaanni, Feriooni Abiraami woshshiishe, «Togo mayira assittoe? Saarayi galtekki ikkitinota mayira kula hoogittoe?

¹⁹ Rodoo'yaati yite galte'ya assi're mini'yara adhe ha'reemmo gede mayira assittoe? Galtekki kuneetina, haadhe fulie!» yiisi.

²⁰ Moote roorrootisira hajajo uyi; insano hajajinonsa garinni Abiraaminna galtesi jajjisi baalunku ledo gobbatenni fushshitunsa.