KALAQAMA 11 - Qullaawa Maxaafa

MANNU ADDI ADDI QAALINNI MAYIRA COYI'RANNO?

¹ Umo baattote hee'ranno manni baalunku coyi'rannohu qaalu mitto callaho.

² Mannu soojjaatira hige ha'ri yannara, Baabilooni gobbara mitto xawo afi're, hakkiicho hee'ri.

³ Insa insanaawa, «Amme doru bano seekkine, kaajjanno gede giirrona!» yitu. Kunni garinni mi'nitanno bano afidhu; mitteenni qa'missannota Qixiraani yinanni haphaayyono afidhu.

⁴ «Amme mitto katama minnona; hakkiicho birxesi gordo iillanno mine minnona; kunni garinni baatto baalate aana billaallinumokkinni su'minke woshshamanno gede assinona» yitu.

⁵ Hakkunni gedensaanni, Kaaliiqi mannu mininoha katamanna gordo iillino mine la"ara dirre,

⁶ «Kuneeti kuni manni mitto mannaati; coyi'rannohu mitto qaaleeti; umonni konne assinohu kunni garinni keeshshikkinni hedinoha baalanka assa dihooganno.

⁷ Kunnira amme dirrinona; insa insanaawa sumuu yitannokki gede qaalensa burduunqona» yii.

⁸ Kunnira, Kaaliiqi baatto baalate aana billaallisinsa; insano katama mina agurtu.

⁹ Katamu su'ma, Baabilooni yini; hatto yinoonnihu, hakkiicho Kaaliiqi mannu qaale burduuqinohuranna insano baatto baalate aana billaallisinonsahuraati.

SEEMINNI ABIRIHAAMI GEESHSHA

¹⁰ Seemi sirchi ilama aante noote: Seemi baote wayi gedensaanni 2 diro keeshshe, 100 diro ikkisi yannara Arfakisaadi yinanni beetto ili;

¹¹ Arkafisaadi ilihu kawa 500 diro hee'rino; wole labballonna seenne ili.

¹² Arfakisaadi 35 diro hee'rihu gedensaanni Sheelahi ili.

¹³ Hakkunni gedensaanni, 403 diro hee're, wole labballonna seenne ili.

¹⁴ Sheelahira 30 diro ikkisita Eeboori ili.

¹⁵ Hakkunni gedensaanni 403 diro hee're, wole labballonna seenne ili.

¹⁶ Eeboorira 34 diro ikkisita, Faleeqi ili;

¹⁷ hakkunni gedensaanni 430 diro hee're, wole labballonna seenne ili.

¹⁸ Faleeqira 30 diro ikkisita Reeu ili;

¹⁹ hakkunni gedensaanni 209 diro hee're, wole labballonna seenne ili.

²⁰ Reeu 32 diro ikkisita Seruugi ili;

²¹ hakkunni gedensaanni 207 diro hee're, wole labballonna seenne ili.

²² Seruugi 30 diro ikkisita Naakoori ili;

²³ hakkunni gedensaanni 200 diro hee're, wole labballonna seenne ili.

²⁴ Naakoori 29 diro ikkisita Taara ili;

²⁵ hakkunni gedensaanni 119 diro hee're, wole labballonna seenne ili.

²⁶ Taara 70 diro ikkisita Abiraami, Naakoorinna Kaaraani ili.

TAARA SIRCHO

²⁷ Taara sirchi aane nooho: Taara Abiraami, Naakoorinna Kaaraani ili. Kaaraani Looxi ili.

²⁸ Kaaraani annisi Taara lubbotenni hee'reennanni ilamino katamira Uuri reyino. Uuri Baabilooni Gobbara noo katamaati.

²⁹ Abiraaminna Naakoori lamunku seenne adhitu; Abiraami ayiddaama Saarayiiti; Naakoori galte Milkaati; Milka Kaaraani beettooti; Kaaraani Milkanna Yosika annaati.

³⁰ Saarayi gaana ikkitinohura ooso di"iltino.

³¹ Taara beettosi Abiraami, Kaaraani ilaminoha beettisi beetto Looxinna Abiraami galte Saarayi adhe Baabilooni nooha Uuri Katama agure Kana"aani Gobba ha'rara kai; Kaaraani marte hakkiicho heedhu.

³² Taarara 205 diro ikkisita Kaaraani reyi.