IZIRA 3 - Qullaawa Maxaafa

MAGANSI'RATE SEERI GALAGALE HANAFAMI

¹ Katamma katammansara noo Israeele, lamalki agani eita, baalunku mitto ikkite Yerusaalame gamba yitu.

² Iyotsedeqi beetti qeesichu Iyyaasu ledosi qeesooti ledonna Selaatiyaali beetti Zerubaabeelino fiixisi ledo Israeelete Maganiha kakkalote darga galagalchite seekkitu. Hakkunni gedensaanni, Maganu manchi Muse maxaafi seerunnihura borreessinoonni garinni kakkalo shiqishshu.

³ Gaangaawinsara heedhanno daganni kainohunni waajjillu amadinsarono, kakkalote darga albi basera seekkitino. Hakko darga shilqote kakkalo soodonna hawarro Kaaliiqira shiqishshu.

⁴ Hakkunni gedensaanni, seeru garinni Daasu Ayyaana ayirrissu. Mittu mittunku barrira hajanjoonnita hasiissino kakkalo shiqishshu.

⁵ Hakkunni gedensaanni, rosantinota shilqote kakkalo, Aganu Leellanno Ayyaani kakkalo, wole Kaaliiqi ayyaannara shiqqannotanna banxe Kaaliiqira uyinanni fushshaate haadhe shiqishshu.

⁶ Qullaawa Mine sanfoonnikkiha ikkiro nafa, lamalki aganira umi barra Kaaliiqira shilqote kakkalo shiqishshino.

QULLAAWA MINE GALAGALCHINE MINNI

⁷ Hakkunni gedensaanni, kinna boccannoriranna mintannorira woxe uyitu. Faarisi moote Qiroosi fajjino garinni daguwa Libaanoosinni baaru aanaanni qolte Iyophera abbitanno gede Sidoonanna Xiroosi mannira sagale, agattonna zayite uyitu.

⁸ Kaaliiqi Mini noowa Yerusaalame iillituhunni layinki diro layinki aganira, Selaatiyaali beetti Zerubaabeelinna Iyotsedeqi beetti Iyyaasu hattono gattinori roduuwinsa qeesootu, Leewaawootu, qafadotewiinni Yerusaalame higginori baalu mine mintu. Lemuu dirirenna hakkuyi ali Leewaawoota Maganu Mini looso towattanno gede worri.

⁹ Iyyaasu labballi oososinna fiixisi, Hodawuya sirchi Qadimieelinna labballi oososi loosu annimma adhitu. Henadaadi sircho ikkitino Leewaawootino kaa'litunsa.

¹⁰ Mine mintannori Qullaawa mine saffu yannara, qeesootu qeesimmate uddanonsa uddidhe buudu xurumba amadde, Leewaawootu Asaafi ooso qolte tsenaatsile amadde, moote Daawiti yannanni kayise rosamino garinni Kaaliiqa guwissara darga dargansa uurritu.

¹¹ Guwishshunninna galatunni Kaaliiqira, «Shaqqadohona, maarosino Israeelete hegeretena» yitanni faarsitu. Kaaliiqi Mine sanfoonni daafira, mannu baalunku lowo hagiirrinni ilillisanni Kaaliiqira galata shiqishi.

¹² Albiha Qullaawa Mine affinori jajjabbu qeesooti, Leewaawootunna maatete sooreeyye Qullaawa Mine sanfanna la'u yannara, qoonqonsa naggi assite wi'litu. Wolootu kayinni hagiirrunni ilillissu.

¹³ Cancu batinyinni kainohunni ililleettenna wi'la bande afate didandiinoonni. Luuluno xeertote hee'neenna macciishshami.